រាជធានីភ្នំពេញ ៖ ស្រ្តីម្នាក់បានបាត់បង់ជីវិតនៅក្នុងបន្ទប់ជួលមួយកន្លែងរហូតមានសភាពហើមស្អុយទៅហើយ ទើបត្រូវបានអ្នកភូមិ និងកូនស្រីដឹងថា បាត់បង់ជីវិត ។ ពាក់ព័ន្ធនឹងករណីនេះគេមានការសង្ស័យថា ប្ដីចុងរបស់ស្ត្រីរងគ្រោះជាអ្នកប្រព្រឹត្ត ព្រោះបន្ទប់មានចាក់សោរពីខាងក្រៅ…
រាជធានីភ្នំពេញ ៖ ស្រ្តីម្នាក់បានបាត់បង់ជីវិតនៅក្នុងបន្ទប់ជួលមួយកន្លែងរហូតមានសភាពហើមស្អុយទៅហើយ ទើបត្រូវបានអ្នកភូមិ និងកូនស្រីដឹងថា បាត់បង់ជីវិត ។ ពាក់ព័ន្ធនឹងករណីនេះគេមានការសង្ស័យថា ប្ដីចុងរបស់ស្ត្រីរងគ្រោះជាអ្នកប្រព្រឹត្ត ព្រោះបន្ទប់មានចាក់សោរពីខាងក្រៅ ហើយប៉ុន្មានថ្ងៃមកនេះ បុរសជាប្ដីនៅផឹកសុីក្នុងភូមិនោះរហូត លុះក្រោយពេលមានការភ្ញាក់ផ្អើលថា ស្ត្រីរងគ្រោះបាត់បង់ជីវិត ស្រាប់តែបុរសជាប្តីចុងនោះគេចខ្លួនបាត់ស្រមោលតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង១១ព្រឹកថ្ងៃទី១៦ ខែមិថុនា ឆ្នាំ២០២០ នៅបន្ទប់ផ្ទះជួលមួយកន្លែង ស្ថិតក្នុងភូមិគោកខ្សាច់ សង្កាត់ប្រទះឡាង ខណ្ឌកំបូល រាជធានីភ្នំពេញ។
ស្រ្តីបាត់បង់ជីវិតខាងលើឈ្មោះហេង សុឃឿន អាយុ៤៥ឆ្នាំ មុខរបរកម្មកររោងចក្រ មានទីលំនៅក្នុងភូមិជ្រួល ឃុំបាល្ល័ង្ក ស្រុកកំពង់ត្របែក ខេត្តព្រៃវែង និងស្នាក់នៅក្នុងបន្ទប់ជួលកើតហេតុខាងលើ ដោយមានប្ដីចុងឈ្មោះពេជ្រ ចន្ថា អាយុ៤២ឆ្នាំ មុខរបរកម្មករសំណង់ ។ អ្នកទាំងពីរបានទទួលយកគ្នាជាប្ដីប្រពន្ធអស់រយៈពេល៣ឆ្នាំមកហើយ ។ នេះបើតាមការប្រាប់ឲ្យដឹងពីកូនស្រីបង្កើតរបស់ស្ត្រីរងគ្រោះជាមួយប្ដីមុន ឈ្មោះម៉ន សុភា អាយុ១៨ឆ្នាំ ជាកម្មការិនីរោងចក្រកាត់ដេរ និងស្នាក់នៅក្នុងភូមិឃុំកើតហេតុនោះដែរ។
កូនស្រីរបស់ស្ត្រីរងគ្រោះបានឱ្យដឹងបន្តថា កន្លងមក ម្ដាយរបស់នាង និងប្ដីចុងបានស្នាក់នៅបន្ទប់ជួលផ្សេងមួយជាមួយគ្នា ចំណែករូបនាងនិងប្ដីបានស្នាក់នៅបន្ទប់ផ្សេងដាច់ដោយឡែកមួយទៀត ហើយម្ដាយនាងមិនសូវមានសេចក្ដីសុខ និងសុភមង្គលនោះទេ ព្រោះតែឧស្សាហ៍កើតរឿងឈ្លោះប្រកែក និងវាយតប់គ្នាជាមួយបុរសជាប្ដីចុងខាងលើជាញឹកញាប់។
កូនស្រីរបស់ស្ត្រីរងគ្រោះបានឱ្យដឹងបន្តថា កាលពី៣ថ្ងៃមុនពេលកើតហេតុ ម្តាយរបស់នាងនិងឪពុកចុងបាននាំគ្នារើផ្ទះចេញពីបន្ទប់ជួលដែលជាកន្លែងស្នាក់នៅចាស់ មកស្នាក់នៅក្នុងបន្ទប់ផ្ទះជួលក្នុងភូមិឃុំកើតហេតុខាងលើនេះវិញ ហើយក៏មានទំនាស់គ្នាទៀត ។ ប៉ុន្តែក្រោយមក នាងមិនបានដឹងថាមានរឿងអ្វីកើតឡើងទៀតឡើយ ព្រោះតែផ្ទះជួលស្ថិតនៅក្នុងភូមិជាមួយគ្នាក៏ពិតមែន ប៉ុន្តែនៅដាច់ឆ្ងាយពីគ្នាបន្តិចដែរ ។
កូនស្រីរបស់ស្ត្រីរងគ្រោះបានរៀបរាប់បន្តទៀតថា លុះ២ថ្ងៃក្រោយមកទៀត នាងអត់បានឃើញម្ដាយទេ ហើយក៏បានទៅជួបឪពុកចុង ពេលនោះនាងសួររកម្ដាយដែរ តែត្រូវឪពុកចុងប្រាប់ថា ម្ដាយរបស់នាងទៅស្នាក់នៅធ្វើការងារនៅឯសង្កាត់ទឹកថ្លា ក្នុងខណ្ឌសែនសុខ រាជធានីភ្នំពេញបាត់ហើយ ដោយនៅដេកជាមួយមិត្តភក្ដិនៅទីនោះ ។ មុនដំបូង នាងអត់ជឿសម្ដីឪពុកចុងនេះទេ តែក្រោយមកមើលឃើញទ្វារបន្ទប់មានចាក់សោរពីខាងក្រៅ ក៏ជឿថា ម្ដាយប្រហែលជាទៅធ្វើការនៅសង្កាត់ទឹកថ្លាមែនហើយ ទើបអត់បានចាប់អារម្មណ៍ថាម្ដាយបាត់បង់ជីវិតនៅក្នុងផ្ទះនោះ ។
កូនស្រីរបស់ស្ត្រីរងគ្រោះបានរៀបរាប់បន្តទៀតថា លុះដល់ថ្ងៃទី១៥ ខែមិថុនា ខណៈជួបគ្នានៅក្នុងភូមិ បុរសជាឪពុកចុងបានបបួលនាងជិះកង់បី ដោយប្រាប់ថា នាំទៅមើលម្ដាយនាងនៅឯសង្កាត់ទឹកថ្លា ប៉ុន្តែនាងបានប្រកែកថាអត់ទៅទេ ព្រោះខ្លាចប្ដីនាងដឹងគាត់ខឹង ដោយនាងមិនបានដឹងថា ការបបួលនាងជិះកង់បីជាមួយនោះ ឪពុកចុងមានបំណងអ្វីឡើយ។ នាងបានបន្តថា ក្រោយមកនាងបានធ្វើដំណើរហួសទៅកាន់ផ្ទះជួលរបស់នាងនិងប្ដី ហើយក៏នៅតែអត់បានដឹងថាម្ដាយបាត់បង់ជីវិតដដែល ចំណែកឪពុកចុងក៏មិនបានរត់ទៅណាឡើយ គឺបានដើរផឹកសុីនៅក្នុងភូមិនោះដដែល ។
កូនស្រីរបស់ស្ត្រីរងគ្រោះបានរៀបរាប់បន្តទៀតថា លុះរហូតដល់វេលាម៉ោង១១ព្រឹកថ្ងៃទី១៦ មិថុនា ខណៈធុំក្លិនស្អុយចម្លែក ទើបម្ចាស់ផ្ទះជួលនិងអ្នកភូមិបាននាំគ្នាកាត់សោរចូលមើល ស្រាប់តែប្រទះឃើញម្ដាយរបស់នាងបានបាត់បង់ជីវិតរហូតហើមស្អុយទៅហើយ ទើបមានការភ្ញាក់ផ្អើល ហើយនាងមានការតក់ស្លុតខ្លាំងណាស់ ចំណែកឪពុកចុងក៏បានរត់គេចខ្លួនបាត់នៅពេលនោះដែរ។
ដោយឡែកអ្នកភូមិបាននិយាយថា កាលពីវេលាល្ងាចថ្ងៃទី១៣ ខែមិថុនា ឆ្នាំ២០២០ ពួកគាត់បានឃើញស្រ្តីរងគ្រោះនិងប្ដីចុងជិះម៉ូតូ១គ្រឿងឌុបគ្នាទៅចូលរួមកម្មវិធីខួបកំណើតគេ ប៉ុន្តែអត់ដឹងថាអ្នកធ្វើខួបកំណើតត្រូវជាមិត្តភក្ដិឬជាសាច់ញាតិរបស់ពួកគាត់ឡើយ។ រហូតដល់យប់ជ្រៅ ទើបឃើញត្រឡប់មកវិញ លុះដល់ព្រឹកឡើងថ្ងៃទី១៤ ខែមិថុនា ស្រាប់តែបាត់មិនឃើញស្រ្តីជាប្រពន្ធចេញពីក្នុងបន្ទប់ជួលរហូត គេឃើញតែប្ដីចេញដើរផឹកសុីពេញភូមិ។ រហូតមកដល់វេលាកើតហេតុ ទើបប្រទះឃើញសពស្ត្រីជាប្រពន្ធហើមស្អុយ ដែលគេសង្ស័យថា ប្រហែលជាស្ត្រីរងគ្រោះបាត់បង់ជីវិតតាំងពីវេលាយប់ថ្ងៃទី១៣ មិថុនា មកម៉្លេះ ហើយពួកគាត់សង្ស័យថា ការបាត់បង់ជីវិតរបស់ស្រ្តីរងគ្រោះខាងលើមានជាប់ពាក់ព័ន្ធជាមួយនឹងប្ដីចុងរូបនោះ។
ក្រោយពេលកើតហេតុ កម្លាំងនគរបាលប៉ុស្តិ៍ប្រទះឡាង និងនគរបាលខណ្ឌកំបូលបានចុះទៅកាន់កន្លែងកើតហេតុ ដើម្បីពិនិត្យមើលជុំវិញទីតាំងកើតហេតុ និងបានរាយការណ៍បន្តទៅកាន់នគបាលការិយាល័យបច្ចេកទេសនៃស្នងការដ្ឋានរាជធានីភ្នំពេញដើម្បីចុះទៅពិនិត្យកោសល្យវិច័យរកមូលហេតុនៃការបាត់បង់ជីវិតរបស់ស្រ្តីរងគ្រោះ ។
សូមបញ្ជាក់ថា កាលពីថ្ងៃទី១៧ ខែតុលា ឆ្នាំ២០១៩ បុរសជាប្តីចុងខាងលើ ធ្លាប់ត្រូវសមត្ថកិច្ចឃាត់ខ្លួនពាក់ព័ន្ធនឹងករណីប្រើអំពើហិង្សាមកលើស្ត្រីរងគ្រោះជាប្រពន្ធផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ