កសិករខ្មែរកំពុងធ្វើកសិកម្មក្នុងបច្ចេកទេសទាន់សម័យ

ថ្ងៃទី ១៦ ខែ មិថុនា ឆ្នាំ ២០២០

ម៉ោង ០៩:៥៩

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានវាយតម្លៃថា កសិកម្មនៅកម្ពុជាកំពុងដើរលើបច្ចេកទេសទាន់សម័យ ដោយសារប្រជាកសិករបានទទួលយកបច្ចកទេសថ្មីទៅអនុវត្តក្នុងការបង្ករបង្កើនផល ។

លោកវេង សាខុន រដ្ឋមន្ត្រីក្រសួងកសិកម្មបានអះអាងថា ការអនុវត្តបច្ចេកទេសថ្មីទាំងអស់នោះជាចុងក្រោយ គឺទិន្នផលស្រូវ និងដំណាំមានការកើនឡើង ។ «និយាយរួម ល្បឿនការងារបង្កបង្កើនផលក៏ដូចជា ការលូតលាស់ដំណាំស្រូវរដូវវស្សានាឆ្នាំនេះ គឺបានល្អប្រសើរ បើទោះបីកម្រិតទឹកភ្លៀងដែលយើងទទួលបានតាមបណ្តាខេត្តទាបជាងកាលពីឆ្នាំ២០១៩ យ៉ាងណាក៏ដោយ »។

ការវាយតម្លៃដូច្នេះ ក្រោយពីលោករដ្ឋមន្ត្រីបានចុះពិនិត្យដំណើរការកសិកម្ម និងដំណាំកសិឧស្សាហកម្ម នៅខេត្តកំពង់ឆ្នាំង ពោធិសាត់ បាត់ដំបង ប៉ៃលិន បន្ទាយមានជ័យ និងខេត្តសៀមរាប ក្នុងសប្តាហ៍នេះ។ នៅក្នុងបេសកកម្មនេះ លោករដ្ឋមន្ត្រីបានពិនិត្យឃើញថា ទីផ្សារកសិកផលមានស្ថានភាពល្អប្រសើរផងដែរ ។

លោក វេង សាខុនអះអាងថា ផលិតផល ស្រូវ ដំណាំ បន្លែ និងសត្វ មានទីផ្សារ ក្នុងតម្លៃខ្ពស់សមរម្យ ដែលកសិករអាចទទួលយកបាន ។ តែលោករដ្ឋមន្ត្រីទទួលស្គាល់ថា កសិផលមួយចំនួនទៀត កំពុងប្រឈមបញ្ហាទីផ្សារដែរដូចជា មៀនប៉ៃលិន ជាដើមនោះ ។

រដ្ឋមន្ត្រីក្រសួងកសិកម្មបានសំណូមពរឲ្យម្ចាស់ចំការ និងក្រុមហ៊ុនស្វែងយល់អំពីលក្ខខណ្ឌតម្រូវនៃភូតគាមអនាម័យរបស់ប្រទេសនាំចូលកសិផលកម្ពុជា ដើម្បីឲ្យកសិផលមានទីផ្សារ និងតម្លៃខ្ពស់ ។ ករណីមៀនប៉ៃលិន លោករដ្ឋមន្ត្រីសន្យាថា នឹងពិភាក្សាជាមួយប្រទេសចិន ក្នុងការនាំចូលមៀនប៉ៃលិននេះ ដូចជា ផ្លែស្វាយផងដែរ ។