ខេត្តស្ទឹងត្រែង ៖ សោកស្តោយយ៉ាងខ្លាំង ចំពោះការបាត់បង់អាយុជីវិតសត្វស្វាកន្ទុយស ដ៏កម្រមួយប្រភេទនៅលើពិភពលោកដែលត្រូវស្លាប់ ដោយសារព្រានព្រៃប្រើប្រាស់កាំភ្លើងច្នៃបាញ់សម្លាប់ នៅចំណុចក្រឡាពុះ ភូមិស្វាយ រៀង ឃុំតាឡាត ស្រុកសេសាន ខេត្តស្ទឹងត្រែង កាលពីថ្ងៃទី១២ ខែមិថុនា ឆ្នាំ២០២០ ។
ជនសង្ស័យដែលបាញ់សម្លាប់សត្វស្វាកន្ទុយស ត្រូវបានអាវុធហត្ថខេត្តស្ទឹងត្រែងឃាត់ខ្លួន នៅថ្ងៃទី១២ ខែមិថុនា ឆ្នាំ២០២០ ហើយបានប្រគល់ទៅឲ្យមន្ទីរបរិស្ថានខេត្ត ដើម្បីរៀបចំកសាងសំណុំរឿងបញ្ជូនទៅអយ្យការអមសាលាដំបូងខេត្តស្ទឹងត្រែង នៅព្រឹកថ្ងៃទី១៣ ខែមិថុនា ឆ្នាំ២០២០នេះ ។ បើតាមការអះអាងរបស់រដ្ឋលេខាធិការ និងជាអ្នកនាំពាក្យក្រសួងបរិស្ថាន ។
លោក នេត្រ ភក្ដ្រាបាននិយាយថា សត្វស្វាកន្ទុយ ស នៅក្នុងប្រទេសកម្ពុជាមានប្រមាណជាង២ម៉ឺនក្បាល ដែលកំពុងមានវត្តនៅភាគខាងកើត និងខាងជើងទន្លេមេគង្គ ពោលគឺមាននៅខេត្តមណ្ឌលគិរី ស្ទឹងត្រែង រតនគិរី និង ខេត្តព្រះវិហារ ក្នុងនោះខេត្តមណ្ឌលគិរី ជាខេត្តដែលមានសត្វស្វាកន្ទុយសច្រើនជាងគេ ពិសេសក្នុងដែនជម្រកសត្វព្រៃកែវសីម៉ា ។
មន្ត្រីកងរាជអាវុធហត្ថខេត្តស្ទឹង ត្រែងបានបញ្ជាក់ថា សត្វស្វាកន្ទុយសនោះត្រូវព្រានព្រៃបាញ់ចំកណ្ដាលក្បាលបណ្ដាលឲ្យបាត់បង់ជីវិត ។
ក្រោយមានហេតុការណ៍នេះកម្លាំងអាវុធហត្ថខេត្តស្ទឹងត្រែងក្រោមការបញ្ជាផ្ទាល់ពីលោកឧត្តមសេនីយ៍ត្រី អៀង វ៉ាន់ឌី បានស្រាវជ្រាវភ្លាមៗ ដោយសហការជាមួយអាវុធហត្ថលើផ្ទៃប្រទេសរហូតឈានដល់ការចាប់ខ្លួនបានជនសង្ស័យ ។
ជនសង្ស័យដែលធ្វើសកម្មភាពបាញ់សម្លាប់សត្វស្វាកន្ទុយសនេះឈ្មោះ ណាំ យ៉ុន អាយុ៣៥ឆ្នាំមុខ របរកសិកររស់នៅភូមិស្វាយរៀង ឃុំតាឡាត ស្រុកសេសាន ខេត្តស្ទឹងត្រែង។
សមត្ថកិច្ចដកហូតបានសត្វស្វា (ប្រភេទស្វាកន្ទុយស) ចំនួន០១ក្បាល និងអាវុធកែច្នៃ (កាំភ្លើងខ្យល់) ចំនួន០១ដើមផងដែរ ។ បច្ចុប្បន្នជនសង្ស័យខាងលើត្រូវមន្ត្រីនៃមន្ទីរបរិស្ថានខេត្តស្ទឹង ត្រែងកសាងសំណុំរឿងបញ្ជូនទៅតុលាការតាមនីតិវិធីច្បាប់ ៕
ចែករំលែកព័តមាននេះ