រាជធានីភ្នំពេញ ៖ ជាងកាត់សក់ម្នាក់ បានក្លាយទៅជាអ្នកទោសស្នេហា ត្រូវនគរបាលចាប់វាយខ្នោះ បន្ទាប់ពីបង្កាត់ភ្លើងស្នេហ៍ ជាមួយយុវតីសិស្សសាលាម្នាក់ដែលនៅជាអនីតិជនតាមរយៈហ្វេសប៊ុក ហើយឈានទៅណាត់គ្នាផឹកស៊ីស្រវឹង រួចនាំគ្នាទៅរួមភេទនៅផ្ទះសំណាក់ ក៏ត្រូវម្តាយខាងស្រីប្តឹងចោទប្រកាន់ពីបទចាប់រំលោភសេពសន្ថវៈ ។
ការឃាត់ខ្លួនបុរសជាងកាត់សក់រូបនេះ គឺកាលពីវេលាម៉ោងប្រមាណ៩និង៣០នាទីព្រឹកថ្ងៃទី៤ ខែមិថុនា ឆ្នាំ២០២០ នៅចំណុចផ្ទះសំណាក់ម៉ូតូ ស្ថិតនៅផ្លូវលេខ២៨៥ សងា្កត់បឹងកក់ទី១ខណ្ឌទួលគោក ។ បុរសជាប់ចោទឈ្មោះ អ៊ុកតុលា អាយុ៣១ឆាំ្ន ស្នាក់នៅផ្ទះជួលក្នុងភូមិចុងខ្សាច់ សងា្កត់ទួលសងែ្កទី១ ខណ្ឌ ឫស្សីកែវ ចំណែកយុវតីខាងលើ មានអាយុ១៧ឆាំ្ន ។ មន្ត្រីនគរបាលឲ្យដឹងថា បុរសជាងកាត់សក់រូបនេះ ត្រូវបានឪពុកម្តាយក្មេងស្រីឃាត់ខ្លួននាំយកមកប្រគល់ឲ្យសមត្ថកិច្ច ដោយចោទប្រកាន់ថា បានចាប់ រំលោភកូនស្រីរបស់គាត់ ។
តាមព័ត៌មានឲ្យដឹងថា កាលពីយប់ថ្ងៃទី៣ខែមិថុនា ឆាំ្ន២០២០ ពួកគេទាំង២នាក់បានណាត់គ្នាផឹកនៅផ្ទះកាត់សក់របស់បុរសរូបនេះ រហូតដល់់ស្រវឹង លុះនៅវេលាម៉ោងប្រមាណ១២អធ្រាត្រ ក៏នាំគ្នាទៅដេកនៅផ្ទះសំណាក់ខាងលើ ។ នៅយប់នោះ ដោយសារបាត់កូនស្រី ក្រុមគ្រួសារក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទួលសង្កែទី១ ។
តាមព័ត៌មានឲ្យដឹងទៀតថា លុះព្រឹកឡើងថ្ងៃទី៤ ខែមិថុនា តាមរយៈប្រព័ន្ធជីភីអេស ក៏បានតាមរកឃើញ និងឃាត់ខ្លួនបុរសនេះប្រគល់ឲ្យនគរបាលប៉ុស្តិ៍បឹងកក់ទី១ ។ បន្ទាប់មកទៀត សមត្ថកិច្ចខណ្ឌទួលគោក ក៏ប្រគល់ជនជាប់ចោទឲ្យនគរបាលខណ្ឌឫស្សីកែវដើម្បីកសាងសំណុំរឿងចាត់ការតាមច្បាប់ ដោយចោទប្រកាន់ពីបទរួមភេទជាមួយក្មេងស្រីជាអនីតិជន ។
នាវេលាម៉ោងប្រមាណ៥ និង៥០នាទីល្ងាច ថ្ងៃដដែល សមត្ថកិច្ចបាននាំជនជាប់ចោទនិងក្មេងស្រីទៅបង្ហាញផ្ទះសំណាក់ ។ បើតាមក្មេងស្រីនិយាយថា នៅយប់នោះ បន្ទាប់ពីផឹកសុីស្រវឹងវង្វេងស្មារតី នាងពុំបានដឹងខ្លួនថា ត្រូវគេដឹកចូលផ្ទះសំណាក់ទេ លុះពេលដឹងខ្លួនស្វាងពីស្រវឹងគឺអ្វីៗជ្រុលហួសអស់ទៅ
ហើយ ។
ប៉ុន្តែអ្នកទោសស្នេហារូបនេះប្រកែកថា ខ្លួនអត់បានរំលោភទេតែគឺជាការព្រមព្រៀងគ្នា ។ បុរសរូបនេះ និយាយថា ខ្លួនមិនបានបង្ខិតបង្ខំចាប់រំលោភទេ គីពួកគេស្រឡាញ់គ្នាហើយក៏នាំគ្នាទៅដេកនៅផ្ទះសំណាក់ ។ ពួកគេទាំង២នាក់ស្រឡាញ់គ្នាប្រមាណ១ខែមកហើយ តាមរយៈហ្វេសប៊ុក ។
នៅយប់នោះ បន្ទាប់ពីផឹកសុីរួច ខ្លួនបានប្រាប់ថា ជូនទៅផ្ទះ តែនាងមិនទៅ ថាទៅក្រៅក៏នាំគ្នាទៅដេកនៅផ្ទះសំណាក់តែម្តង ។ ទោះបីជានាងព្រមស្ម័គ្រសាងស្នេហ៍ក៏ដោយចុះ តែអាយុរបស់នាងមិនទាន់គ្រប់ការ ដែលអ្នករួមភេទជាមួយនាង គឺចៀសមិនផុតពីមានទោសឡើយ ៕
ចែករំលែកព័តមាននេះ