រាជធានីភ្នំពេញ៖ ករណីភិក្ខុ ឡុង ចន្ថា មិនទាន់ស្ងប់រឿងដោយសារតែគេចខ្លួនបាត់រហូតដល់ស្រមោលដែលមិនព្រមសឹកតាមសម្រួល ហើយបានគេចខ្លួនមិនដឹងជ្រែកដីដល់ស្ថានណា ស្រាប់តែពេលនេះភិក្ខុ លួន សុវ៉ាត មួយករណីទៀតក៏ត្រូវបានថេរសភាខេត្តសៀមរាប…
រាជធានីភ្នំពេញ៖ ករណីភិក្ខុ ឡុង ចន្ថា មិនទាន់ស្ងប់រឿងដោយសារតែគេចខ្លួនបាត់រហូតដល់ស្រមោលដែលមិនព្រមសឹកតាមសម្រួល ហើយបានគេចខ្លួនមិនដឹងជ្រែកដីដល់ស្ថានណា ស្រាប់តែពេលនេះភិក្ខុ លួន សុវ៉ាត មួយករណីទៀតក៏ត្រូវបានថេរសភាខេត្តសៀមរាប បានសម្រេចប្រកាសផ្សឹកចេញពីភេទជាបុព្វជិត ចាប់ពីថ្ងៃចេញសង្ឃប្រកាសថ្ងៃទី៣ មិថុនាតទៅ ។
ព្រះប្រធានថេរសភាខេត្តសៀមរាប ព្រះតេជគុណ ជុំ គឹមឡេង បានចេញសង្ឃសម្រេចផ្សឹកភិក្ខុ លួន សុវ៉ាត ដែលគង់មិនអចិន្ត្រៃយ៍នៅវត្តស្លែង ក្នុងភូមិព្រីង ឃុំជីក្រែង ស្រុកជីក្រែង ខេត្តសៀមរាប ។ ការប្រកាសផ្សឹកភិក្ខុ លួន សុវ៉ាតនេះ ក្រោមសេចក្តីសន្មត់ថា បានសេពមេថុនធម្ម (មាតុគ្រាម) ខុសធម៌វិន័យ ។ព្រះ ប្រធានថេរសភាខេត្តសៀមរាប បានមានថេរដីកាថា អង្គប្រជុំថេរសភា បានស្ដាប់វីដេអូសារជាសំឡេងសន្ទនារៀបរាប់សេចក្តីស្នេហាស៊ីជម្រៅរវាង ភិក្ខុ លួន សុវ៉ាត ជាមួយស្ត្រីជាម្ដាយ និងកូនស្រី ។
ក្នុងវីដេអូបែកធ្លាយមួយនេះ រួមទាំងកំណត់ហេតុ ស្តាប់ការបំភ្លឺរបស់កូនស្រីទើបឈានដល់ការសន្មត់ថា ព្រះអង្គសេពមេថុនធម្ម (មាតុគ្រាម) ជាមួយស្ត្រីភេទពិតប្រាកដមែន ។ព្រះតេជគុណ ជុំ គឹមឡេង ប្រធានថេរសភាខេត្តសៀមរាប មានថេរដីកាក្នុងសង្ឃប្រកាសថា៖«តាមព្រះវិន័យចែងក្នុងសិក្ខាបទ ត្រង់អាបត្តិបរាជិក (សេពមេថុនធម្ម) ភិក្ខុអង្គណាបានប្រព្រឹត្តធ្វើឱ្យកន្លង ត្រូវតែចាកចេញពីភិក្ខុភាវៈ» ។
តាមរយៈសេចក្តីប្រកាសនេះ ប្រធានថេរសភាខេត្តសៀមរាបបានសង្កត់ធ្ងន់ថា ភិក្ខុ លួន សុវ៉ាត លែងជាបុព្វជិតទៀតហើយ ។ ក្រោយថ្ងៃចេញសង្ឃសម្រេចនេះ បើឈ្មោះ លួន សុវ៉ាត នៅតែបន្តគ្រងសង្ឃចីវរជាបុព្វជិតដូចអ្នកបួសក្នុងព្រះពុទ្ធសាសនា ចាត់ទុកជាបុគ្គលប្រព្រឹត្តក្លែងភេទ សូមព្រះមេគណរាជធានី ខេត្ត និងសមត្ថកិច្ចពាក់ព័ន្ធចាត់វិធានការតាមច្បាប់ជាធរមាន» ។
ខាងលើនេះ បើតាមព្រះប្រធានថេរសភាខេត្តសៀមរាប មិនខុសពីភិក្ខុ ឡុង ចន្ថា ដែលសម្តេចព្រះសង្ឃ នាយកហាមដល់ចៅអធិការវត្តទូទាំងប្រទេសមិនត្រូវឱ្យបុគ្គលអង្គនេះគង់នៅឡើយ ។ ពេលនេះស្រាប់តែបាត់ខ្លួនឈឹងតែម្រ៉ង ។
ចែករំលែកព័តមាននេះ