រាជធានីភ្នំពេញ ៖ សិល្បៈប្រមាណ១៩រួប បានរួមគ្នាចូលរួមហ្វឹកហាត់សម្តែងល្ខោនខោល ដើម្បីចូលរួមផ្សព្វផ្សាយ និងស្វែងរកមូលនិធិសម្រាប់ព្រឹត្តិការណ៍សម្តែងល្ខោនខោលដ៏ធំក្នុងឆ្នាំ២០២០ ខណៈពេលការជួបជុំមួយនេះនឹងធ្វើឡើងនៅរសៀលថ្ងៃអាទិត្យ ទី៧ ខែខែឧសភា ឆ្នាំ២០២០…
រាជធានីភ្នំពេញ ៖ សិល្បៈប្រមាណ១៩រួប បានរួមគ្នាចូលរួមហ្វឹកហាត់សម្តែងល្ខោនខោល ដើម្បីចូលរួមផ្សព្វផ្សាយ និងស្វែងរកមូលនិធិសម្រាប់ព្រឹត្តិការណ៍សម្តែងល្ខោនខោលដ៏ធំក្នុងឆ្នាំ២០២០ ខណៈពេលការជួបជុំមួយនេះនឹងធ្វើឡើងនៅរសៀលថ្ងៃអាទិត្យ ទី៧ ខែខែឧសភា ឆ្នាំ២០២០ នៅមជ្ឈមណ្ឌលហ្វឹកហ្វឹននៃកងយោធិពោលខេមរៈភូមិន្ទ ស្តាតចាស់ នាពេលខាងមុខនេះហើយ។
សិល្បករទាំង១៩រូបនោះ រួមមាន ៖ លោក ឌី វ៉ាន់ដា លោក ចន ស័ក្ត លោក ហៃ ប៉ោហុង លោក នូ ឧសភា លោក រស់ រាជ្ជសាល លោក ចន្ថា ដារ៉ា លោក អ៊ុន សុទ្ធា លោក ធៀន លោក សន ពិសិដ្ឋ លោក នេន ទុំ លោក ដារ៉ាត់ លោក សិរី វង្ស លោក រាជ្យបុត្រ នាគមាស លោក ពឹង ពុទ្ធិស័ក្ក លោក យុទ្ធ និស្ស័យ លោក កូដូម៉ូ លោក សយ រតនៈ លោក ពង្ស ពុទ្ធិស័ក និងលោក ថៃ សាន ។
លោក ស៊ុប សក្ករ៉ា ប្រធានគណៈកម្មការរៀបចំព្រឹត្តិការណ៍សម្តែងល្ខោនខោលខាងលើបានអះអាងប្រាប់ថា តារាទាំងអស់នេះ នឹងចូលរួមដោយស្ម័គ្រចិត្ត ដើម្បីហ្វឹកហាត់តែមួយថ្ងៃប៉ុណ្ណោះ ដើម្បីស្វែងយល់ខ្លះៗអំពីល្ខោនខោល និងជួយផ្សព្វផ្សាយស្វែងរកមូលនិធិសម្រាប់ឆ្ពោះទៅកាន់ព្រឹត្តការណ៍សម្តែងល្ខោនខោលដ៏អស្ចារ្យនាពេលខាងមុខ។ លោកបញ្ជាក់ថា ព្រឹត្តការណ៍នេះ គឺចូលរួមផ្សព្វផ្សាយ និងស្វែងរកមូលនិធិបន្ថែមសម្រាប់កម្មវិធី ព្រោះថានៅខ្វះថវិកាជាច្រើនសម្រាប់ការផលិតសំភារៈ និងរៀបចំកម្មវិធី។
បើតាមលោក ស៊ុប សក្ករ៉ា តារាទាំងអស់នោះ គឺយើងតម្រូវឲ្យពួកហាត់រៀនក្បាច់ខ្លះៗនៃល្ខោនខោល ដើម្បីឲ្យគាត់ស្វែងយល់អំពីភាពលំបាកនៃក្បាច់រាំរបស់ល្ខោនខោល ហើយឲ្យពួកនឹងស្លៀកពាក់តួរអង្គមេទ័ពស្វាទាំង១៩អង្គ ដែលសម្ភារទាំងអស់នេះ គឺបានមកពីការចូលរួមមូលនិធិមហាគ្រួសារខ្មែរ។
លោកថា អ្នកចូលរួមទស្សនាអាចបរិច្ចាគដោយផ្ទាល់ ឬអាចចូលទៅគណនេយ្យធនាគារដែលយើងបានរៀបចំ ឬក៏តាមរយៈតារាសម្តែងដែលជា Idol នៅក្នុងចិត្តពួកគេក៏បាន ខណៈពេលដែលអ្នកចូលរួម គឺយើងមានកំណត់ មិនអាចបើកទូលាយធំឡើយ ដោយសារយើងនៅមានការពារនៃការឆ្លងជំងឺកូវីដ១៩។
លោក ស៊ុប សក្ករ៉ា សម្រាប់ការចូលរួមពីតារាទាំងអស់នេះ គឺមិនមែនជាការសម្តែងនោះឡើយ ពោលគឺគ្រាន់តែជាការថតផ្សព្វផ្សាយអំពីកម្មវិធីរបស់យើង ដោយនៅក្នុងនោះមានការបង្ហាត់បង្រៀនពីលោកគ្រូ អ្នកគ្រូ និងសិស្សសាលាមួយចំនួនទៀតដែលយើងបានកំណត់រួចហើយ។
លោកបញ្ជាក់ថា កម្មវិធីនេះយើងមិនមានបំណងចាក់ផ្សាយតាមកញ្ចក់ទូរទស្សន៍ឡើយ ប៉ុន្តែយើងថតទុកដើម្បីផ្សព្វផ្សាយនៅតាមផេកផ្សេងៗសម្រាប់ព្រឹត្តិការណ៍ល្ខោនខោល ហើយនឹងបញ្ចូលទៅគណនេយ្យហ្វេសប៊ុករបស់តារានីមួយៗដែលបានចូលរួមហ្វឹកហាត់ប៉ុណ្ណោះ។
យ៉ាងណាលោក ស៊ុប សក្ករ៉ា បានស្នើសុំការចូលរួមឧបត្ថម្ភបន្ថែមទៀតពីទសុ្សនិកជន ហើយអ្នកចង់ចូលរួមហាត់ល្ខោនខោល គឺអាចមកហាត់បាននៅទីតាំងស្តាតចាស់ រាល់ថ្ងៃសៅរ៍ អាទិត្យ ចាប់ពីម៉ោង៣ដល់៦ល្ងាច ហើយពួកនឹងមានឱកាសចូលរួមសម្តែងក្នុងព្រឹត្តិការណ៍ដ៏អស្ចារ្យនៃល្ខោនខោលនាពេលខាងមុខនេះផងដែរ។
លោកធ្លាប់លើកឡើងថា តាមគម្រោងព្រឹត្តិការណ៍សម្តែងល្ខោនខោលដ៏ធំមួយនេះ គ្រោងនឹងធ្វើឡើងនៅបំណាច់ឆ្នាំ២០២០ ប៉ុន្តែដោយសារការរីករាលដាលនៃជំងឺកូវីដ១៩ កម្មវិធីអាចនឹងលើកពេលទៅសម្តែងនៅឆ្នាំក្រោយ។
យ៉ាងណាលោកថា ប្រសិនបើស្ថានភាពជំងឺកូវីដ១៩ នៅកម្ពុជា អាចមានភាពប្រសើរឡើងវិញនោះ យើងក៏នឹងរៀបចំកម្មវិធីសម្តែងតូចមួយនៅចំថ្ងៃដដែលនោះ សម្រាប់មហាជនទស្សនា ហើយក៏ឆ្លៀតពេលប្រកាសពីការពន្យាពេលការសម្តែងដ៏ធំរបស់យើងនៅឆ្នាំក្រោយផងដែរ។
រហូតមកដល់បច្ចុប្បន្ន សម្រាប់មូលនិធិ១០០០រៀល សម្រាប់រ៉ៃអង្គាសថវិកាទ្រទ្រង់ការសម្តែងល្ខោនខោលដ៏ធំនេះ គឺនៅទទួលបានមួយចំណែកតូចប៉ុណ្ណោះ ប៉ុន្តែយ៉ាងណាមូលនិធិនេះនៅតែបន្តទទួលក្នុងពេលដែលកម្មវិធីសម្តែងនេះ ទទួលបានការគាំទ្រច្រើនផងដែរពីមហាជន។
តាមគម្រោងកម្មវិធីទាំងមូលត្រូវការថវិកាប្រមាណ១លានដុល្លារ ដែលថវិកាទាំងនោះត្រូវបានបែងចែកទាំងការសម្តែង និងការបញ្ជៀបទម្រង់ល្ខោនខោលទៅកាន់មហាវិទ្យាល័យចំនួន៣០នៅក្នុងប្រទេសកម្ពុជា៕ (កែសម្រួលដោយ ៖ បុប្ផា)
ចែករំលែកព័តមាននេះ