រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីវ័យក្មេងម្នាក់ជិះម៉ូតូមួយគ្រឿងយ៉ាងលឿន និងបញ្ច្រាសទិសដៅចរាចរណ៍ ក៏ជ្រុលទៅបុករទះលក់មីឆា បណ្តាលឱ្យដួលបែកក្បាលរងរបួសធ្ងន់ខ្លួនឯងតែម្តង ចំណែកទូលក់មីឆាជ្រុះរាយប៉ាយពេញផ្លូវ បង្កឱ្យមានការភ្ញាក់ផ្អើលកាលពីម៉ោង11និង15នាទីយប់ ថ្ងៃទី27 ខែឧសភា ឆ្នាំ2020 តាមបណ្តោយផ្លូវ154កែងផ្លូវ19 ស្ថិតនៅក្នុងសង្កាត់ផ្សារកណ្តាល2 ខណ្ឌដូនពេញ ។
បើតាមប្រភពពីសន្តិសុខដែលឃើញហេតុការណ៍បានឱ្យដឹងថា មុនពេលកើតហេតុ រូបគាត់បានឃើញម៉ូតូរ៉ឺម៉កលក់មីឆា និងប្រហិតចៀនម្នាក់មិនស្គាល់ស្លាកលេខនោះទេ បើកបរតាមបណ្តោយផ្លូវ19 ពីត្បូងទៅជើង ខណៈពេលបើកមកដល់ចំណុចកើតហេតុខាងលើនេះ ម៉ូតូរ៉ឺម៉កលក់ប្រហិតចៀន និងមីឆា បានបត់ឆ្វេងទៅស្តុបរោងកុនលុច្យ ។
សន្តិសុខខាងលើបន្តថា ស្របពេលនោះស្រាប់តមានម៉ូតូអែរប្លេត ពណ៌ខ្មៅលាយទឹកក្រូច ពាក់ស្លាកលេខកំពង់ចាម4129 បើកបរតាមបណ្តោយផ្លូវ154 ពីលិចទៅកើត បើកក្នុងល្បឿនយ៉ាងលឿន ហើយមិនបានប្រយ័ត្នផងនោះ ក៏ជ្រុលទៅបុកជាមួយនឹងម៉ូតូរ៉ឺម៉កមីឆា ដែលកំពុងបត់ បណ្តាលឱ្យម្ចាស់ម៉ូតូអែរប្លេតដួលបែកក្បាលហូលឈាមសន្លប់រងរបួសធ្ងន់ខ្លួនឯងនៅនឹងកន្លែងកើតហេតុតែម្តង ហើយត្រូវរថយន្តគ្លីនិកដឹកយកជនរងគ្រោះយកទៅព្យាលបាល រីឯម៉ូតូរ៉ឺម៉កលក់មីឆា និងប្រហិតចៀនវិញ ជ្រុះរាយប៉ាយពេញផ្លូវ ។
ក្រោយពេលកើតហេតុខាងលើនេះ ម៉ូតូរបស់ជនរងគ្រោះត្រូវបានសមត្ថកិច្ចធ្វើការវាស់វែង រួចយកទៅរក្សាទុកនៅអធិការដ្ឋាននគរបាលខណ្ឌដូនពេញ ដើម្បីធ្វើការដោះស្រាយនៅពេលក្រោយ៕ (កែសម្រួលដោយ ៖ បុប្ផា)
ចែករំលែកព័តមាននេះ