ខេត្តបាត់ដំបង៖ «មុខរបរផលិតកូនជ្រូកសន្សំលុយរបស់ខ្ញុំ នៅតែមានទីផ្សារល្អដដែល ទាំងការនាំចេញទៅតាមទីផ្សារក្រៅខេត្ត ទាំងនៅលើទីផ្សារក្នុងខេត្ត គឺមិនរងផលប៉ះពាល់ ដោយសារជំងឺកូវីដ១៩ថ្មី ទេ»។ នេះជាការអះអាងរបស់អ្នកស្រី សឹង្ហ…
ខេត្តបាត់ដំបង៖ «មុខរបរផលិតកូនជ្រូកសន្សំលុយរបស់ខ្ញុំ នៅតែមានទីផ្សារល្អដដែល ទាំងការនាំចេញទៅតាមទីផ្សារក្រៅខេត្ត ទាំងនៅលើទីផ្សារក្នុងខេត្ត គឺមិនរងផលប៉ះពាល់ ដោយសារជំងឺកូវីដ១៩ថ្មី ទេ»។ នេះជាការអះអាងរបស់អ្នកស្រី សឹង្ហ វណ្ណៈ ហៅ ដា ដែលជាម្ចាស់សិប្បកម្មផលិត«រូបតុក្កតា ឬរូបកូន ជ្រូកសន្សំលុយ»ដ៏ធំសម្បើមមួយកន្លែង នៅក្នុងក្រុងបាត់ដំបង ដែលធ្វើពីម្ស៉ៅ«ម្នាងសិលា»។
សិប្បកម្មផលិត «កូនជ្រូកសន្សំលុយ»របស់អ្នកស្រី សឹង្ហ វណ្ណៈ ហៅ ដា នេះ មានទីតាំងនៅក្នុងបូរីមួយកន្លែង ស្ថិតនៅភូមិកម្មករ សង្កាត់ស្វាយប៉ោ ក្រុងបាត់ដំបង ។ អ្នកស្រី សឹង្ហ វណ្ណៈ បានផ្ដល់បទសម្ភាសន៍អំពីមុខរបរផលិតរូបតុក្កតាសិប្បនិម្មិតនេះ ជាមួយកោះសន្តិភាព កាលពីព្រឹកថ្ងៃទី២៧ ឧសភា នៅពេលដែលអ្នកស្រីកំពុងមមារញឹកយ៉ាងខ្លាំង ជាមួយនឹងក្រុមកម្មករប្រុស ស្រីរបស់គាត់ជិត២០នាក់ទៀត ។ ម្ចាស់សិប្បកម្មរូបនេះបាននិយាយថា «នៅក្នុងអំឡុងពេលដែល ជំងឺកូវីដ១៩ថ្មី ផ្ទុះឡើងតាំងពីដំបូងរហូតមកដល់ពេលនេះ ពិតមែនតែវាធ្វើឲ្យប៉ះពាល់ធ្ងន់ធ្ងរ ទៅលើមុខរបរឬមុខជំនួញដទៃទៀត តែវាមិនបានរំខានដល់មុខរបរផលិតកូនជ្រូកសន្សំលុយរបស់ខ្ញុំទេ គឺនៅតែមានទីផ្សារល្អដដែល ទាំងការនាំចេញក្រៅខេត្ត ទាំងនៅលើទីផ្សារក្នុងខេត្ត»។
ជារូបភាពចម្រុះបែបសិល្បៈធ្វើអំពីម្ស៉ៅ «ម្នាងសិលា» និងបានរំលេចពណ៌ចម្រុះយ៉ាងប្រណីតទៅតាមរូបភាពនីមួយៗ ដែលកម្មករជំនាញបានចាក់ពុម្ពរូចជាស្រេច ។ រោងសិប្បកម្មរបស់អ្នកស្រីសឹង្ហ វណ្ណៈ មើលទៅហាក់មិនរឹងម៉ាំទេដែលគ្របដណ្ដប់ទៅដោយស័ង្កសីយ៉ាងយីករយាក ។ ប៉ុន្តែនៅទីនោះគេមិនឃើញមានកម្មករណាម្នាក់ទំនេរដៃឡើយ។ ជាមួយកិច្ចការដ៏មមារញឹកនេះ អ្នកស្រីសឹង វណ្ណៈ បាននិយាយថា ក្រុមកម្មករជិត២០នាក់ ត្រូវបានបែងចែកមុខជំនាញផ្សេងៗគ្នា គឺ មានអ្នកចាក់ពុម្ពរូបភាព មានអ្នកសំអាត មានអ្នកជញ្ជូនរូបភាពទៅហាលថ្ងៃ មានអ្នកបាញ់ថ្នាំពណ៏ និង មានអ្នកវេចខ្ចប់ ដើម្បីរៀបចំចែកចាយទៅឲ្យម៉ូយនៅតាមទីផ្សារ ។ល។
បើតាមការពិនិត្យទៅលើរូបភាពដែលផលិតរូច គេឃើញមានរូបភាពចម្រុះដែលមានលក្ខខណៈដូចរូបតុក្កតា តែភាគច្រើនជាប្រភេទរូបសត្វចម្រុះ មិនមានតែរូបកូនជ្រូកមួយមុខប៉ុណ្ណោះទេ។ អ្នកស្រី សឹង្ហ វណ្ណៈ បានរៀបរាប់បែបនេះថា «រូបសិប្បនិម្មិតដែលសិប្បកម្មខ្ញុំ បានផលិតនេះ គឺមានរូបភាពផ្សេងៗគ្នា ប្លែកៗបែបសិល្បៈ ហើយរំលេចពណ៏ចម្រុះស្រស់ឆើតឆាយ ដើម្បីទាក់ទាញភ្នែកអតិថិជន តែវាជារូបភាពដែលធ្វើឡើង សម្រាប់តែសន្សំលុយ ឬ អាចដាក់តាំងលំអក៏បានដែរ»។ ម្ចាស់សិប្បកម្មវ័យ៣៣ឆ្នាំរូបនេះ បានប្រាប់ថា ដំបូងឡើយ គាត់និងក្រុមគ្រួសារខាងស្វាមីបានប្រកបមុខរបរនេះ នៅឯភ្នំពេញ តែក្រោយមកគាត់ក៏បែកមកធ្វើនៅខេត្តបាត់ដំបង ដែលមានរយៈពេលជាង៣ឆ្នាំកន្លងមកហើយ។
បើនិយាយពីទីផ្សារ «កូនជ្រូកសន្សំលុយ» នេះវិញ អ្នកស្រី វណ្ណៈ ហៅ ដា បានបញ្ជាក់យ៉ាងដូច្នេះថា «កូនជ្រូកសន្សំលុយរបស់ខ្ញុំ នៅមានទីផ្សារល្អ មិនស្រកស្រុតទេ ទាំងការនាំចេញទៅតាមបណ្ដាខេត្ត ទាំងនៅលើទីផ្សារក្នុងខេត្ត បើទោះជាជំងឺ កូវីដ១៩ថ្មី នេះ បានអុកឡុកខ្លាំងធ្វើឲ្យប៉ះពាល់ដល់មុខរបរ ឬមុខជំនួញដទៃទៀតបែបណាក្ដី ។ បច្ចុប្បន្ន ទីផ្សារកូនជ្រូកសន្សំលុយរបស់ខ្ញុំនេះល្អជាងគេ គឺនៅខេត្តបាត់ដំបង និង ខេត្តសៀមរាប»។
ដោយឡែក ពាក់ព័ន្ធនឹងការផលិតវិញ ម្ចាស់សិប្បកម្មរូបនេះបានប្រាប់ថា ក្នុងមួយថ្ងៃ សិប្បកម្មរបស់គាត់ផលិតរូបភាពគ្រប់ប្រភេទបានប្រមាណជាង៣០០រូប និងត្រូវចំណាយម្ស៉ៅ«ម្នាងសិលា» ប្រហែលកន្លះតោន។ រូបភាពដែលផលិតបានលាបពណ៌រួច ត្រូវវេចខ្ចប់ដឹកជញ្ជូនយកទៅឲ្យម៉ូយភ្លាមៗ ទាំងនៅតាមបណ្ដាខេត្ត និងនៅក្នុងខេត្ត ព្រោះម៉ូយកុម្ម៉ង់ទិញមិនដែលសល់ក្នុងស្ដុកទេ។ រីឯតំលៃវិញ អ្នកស្រី មិនបានប្រាប់ពីតំលៃរូបនីមួយៗទេ តែគាត់បានបញ្ជាក់ថា តំលៃគឺស្ថិតទៅលើរូបតូច ឬរូបធំ ហើយក៏មិនចំពោះទៅលើរូបអ្វីនោះដែរ គឺតំលៃប្រហាក់ប្រហែលគ្នាទាំងអស់។
សិប្បកម្មផលិតរូបភាពតុក្កតាសន្សំលុយ ឬរូបកូនជ្រូកសន្សំលុយនេះ គេសង្កេតឃើញនៅក្នុងខេត្តបាត់ដំបង មានច្រើនកន្លែងដែរ តែមានលក្ខណៈតូចៗ លើកលេងតែសិប្បកម្មរបស់អ្នកស្រី សឹង្ហ វណ្ណៈ ហៅ ដា នេះមួយប៉ុណ្ណោះ ដែលមានទ្រង់ទ្រាយធំដុំគ្រាន់បើ ។ ទំនិញនេះ ត្រូវបានគេដាក់លក់ព្រោងព្រាតនៅលើទីផ្សារ តែអតិថិជនភាពច្រើនដែលចូលចិត្តទិញបំផុត គេសង្កេតឃើញពួកក្មេងៗ ដែលពួកគេទិញទុកសម្រាប់សន្សំលុយ ឬលេងជាល្បែង៕
ចែករំលែកព័តមាននេះ