រាជធានីភ្នំពេញ ៖ នោមឈាមគឺជាសញ្ញាបញ្ជាក់ថា លោកអ្នកកំពុងតែប្រឈមនឹងជំងឺប្រព័ន្ធមូត្រ ដែលបណ្តាលឱ្យមានគ្រោះថ្នាក់ដល់អាយុជីវិតគ្រប់ពេលវេលា ជាពិសេស បើសិនជាការនោមឈាមច្រើនហើយមិនបានមកព្យាបាលទេ អាចឱ្យអ្នកជំងឺប្រឈមនឹងបញ្ហាធ្ងន់ធ្ងរឈានដល់ស្លា.ប់បាន
រាជធានីភ្នំពេញ ៖ នោមឈាមគឺជាសញ្ញាបញ្ជាក់ថា លោកអ្នកកំពុងតែប្រឈមនឹងជំងឺប្រព័ន្ធមូត្រ ដែលបណ្តាលឱ្យមានគ្រោះថ្នាក់ដល់អាយុជីវិតគ្រប់ពេលវេលា ជាពិសេស បើសិនជាការនោមឈាមច្រើនហើយមិនបានមកព្យាបាលទេ អាចឱ្យអ្នកជំងឺប្រឈមនឹងបញ្ហាធ្ងន់ធ្ងរឈានដល់ស្លាប់បាន ដោយសារតែខ្វះគ្រាប់ឈាមក្រហម ។
លោកសាស្ត្រាចារ្យមហាបរិញ្ញាវេជ្ជបណ្ឌិត ថុង សុខហ៊ាន ឯកទេសវះកាត់ជំងឺទូទៅ និងប្រព័ន្ធមូត្រសាស្ត្រ នៃមន្ទីរពេទ្យព្រះកុសុមៈ បានប្រាប់កោះសន្តិភាពឱ្យដឹងថា នោមឈាមគឺជាបញ្ហាដែលគួរឱ្យព្រួយបារម្ភ ។ នោមឈាមមានពីរប្រភេទ៖
១-៨០ភាគរយ នៅពេលដែលលោកអ្នកបន្ទោបង់នោះនឹងឃើញថា ទឹកនោមមានពណ៌ដូចជាឈាម ។
២-២០ភាគរយ នៅពេលដែលអ្នកបន្ទោបង់ទឹកនោមមិនមានឈាមនោះទេ តែអាចមានពណ៌ក្រហមដូចជា ពណ៌តែចាស់ បើគេយកទៅពិនិត្យនឹងឃើញមានគ្រាប់ឈាមក្រហមជាច្រេើននៅក្នុងទឹកនោម ។
នោមឈាមគឺជារោគសញ្ញាដែលបញ្ជាក់ថា លោកអ្នកកំពុងតែប្រឈមនឹងជំងឺប្រព័ន្ធនោមហើយមានតែគ្រូពេទ្យឯកទេសយកទឹកនោមទៅពិនិត្យប៉ុណ្ណោះទើបដឹងច្បាស់ ។ ជាទូទៅនោមឈាមអាចបណ្តាលមកពីមូលហេតុច្រើនយ៉ាងដូចជាៈ
-កើតទ្បើងដោយសាររលាកប្រព័ន្ធនោម
(រលាកប្លោកនោម រលាកតម្រងនោម ជាពិសេសស្ត្រីភាគច្រើននោមលាយឈាមបណ្តាលមកពីការរលាកនៅក្នុងប្លោកនោម) ។
-នោមឈាមក៏អាចបណ្តាលមកពីលោកអ្នកកើតមានជំងឺដុំក្រួស ដុះដុំសាច់នៅក្នុងប្រព័ន្ធនោម ឬក៏លោកអ្នកប្រើប្រាស់ថ្នាំមួយចំនួន ដែលធ្វើឱ្យមានបញ្ហាចរន្តឈាមជាដើម ។
-កាលណាបុរសឬស្ត្រីដែលមានវ័យកាន់តែចាស់ គឺប្រឈមនឹងនោមមានឈាមលាយជាមួយ ។ ក្រៅពីការរលាកប្រព័ន្ធទឹកនោម សូមគិតដល់ដុំសាច់នៅក្នុងប្លោកនោម ឬមានដុំដុះនៅក្នុងក្រលៀន ដែលឈានដល់ជំងឺមហារីក ។
ចំពោះការព្យាបាលវិញ មានដំណាក់កាលផងដែរ ទៅតាមឯកទេសរបស់គ្រូពេទ្យដូចជា បើសិនជាមានការនោមឈាម វិធីដែលល្អបំផុតគឺត្រូវតែធ្វើការព្យាបាលបំបាត់កុំឱ្យនោមឈាម។ បន្ទាប់ពីបំបាត់នោមឈាមហើយ គ្រូពេទ្យនិងរកមូលហេតុ ដែលបង្កឱ្យកើតមានបញ្ហានោមឈាម និងធ្វើការព្យាបាលតែម្តង ។
ក្នុងករណីដែលលោកអ្នកនោមឈាម ឬមានគ្រាប់ឈាមក្រហមនៅក្នុងទឹកនោម គួរតែប្រញាប់់ទៅជួបពិភាក្សាជាមួយគ្រូពេទ្យឯកទេស ជាពិសេសសម្រាប់មនុស្សចាស់ ចាប់ពីវ័យ៤០ឆ្នាំទ្បើងទៅ ដើម្បីរកវិធីការពារនិងរកមូលហេតុរបស់វា ។ ជាងនេះទៅទៀត ក្នុងរយៈពេលពី៣ទៅ៦ខែម្តង លោកអ្នកគួរទៅពិនិត្យទឹកនោមម្តងទើបជាការប្រសើរ ៕
ចែករំលែកព័តមាននេះ