រាជធានីភ្នំពេញ ៖ ស្ថានីយទូរទស្សន៍ MyTV រៀបចំការប្រកួតជាអន្តរជាតិលើកដំបូងបង្អស់សម្រាប់នារីវ័យក្មេងនៅទូទាំងប្រទេសកម្ពុជា ដែលមានក្ដីសុបិនចង់ក្លាយជាកំពូលតារាបង្ហាញម៉ូដ ដើម្បីប្រកួតប្រជែងគ្នាដណ្ដើមពានរង្វាន់ដ៏មានកិត្យានុភាពជា «កំពូលតារាបង្ហាញម៉ូដកម្ពុជា» ។
រាជធានីភ្នំពេញ ៖ ស្ថានីយទូរទស្សន៍ MyTV រៀបចំការប្រកួតជាអន្តរជាតិលើកដំបូងបង្អស់សម្រាប់នារីវ័យក្មេងនៅទូទាំងប្រទេសកម្ពុជា ដែលមានក្ដីសុបិនចង់ក្លាយជាកំពូលតារាបង្ហាញម៉ូដ ដើម្បីប្រកួតប្រជែងគ្នាដណ្ដើមពានរង្វាន់ដ៏មានកិត្យានុភាពជា «កំពូលតារាបង្ហាញម៉ូដកម្ពុជា» ។
បេក្ខនារីរាប់ពាន់នាក់អាយុចន្លោះពី១៨ឆ្នាំ ដល់២៧ឆ្នាំ និងកម្ពស់ចាប់ពី១,៦៥ម៉ែត្រឡើងទៅមកពីទូទាំងប្រទេសបានដាក់ពាក្យសុំចូលរួមប្រកួតពីខែកុម្ភៈ ដល់ខែមិថុនា ២០១៤ ហើយក្នុងចំណោមរាប់រយនាក់នេះ មានតែបេក្ខនារីមានសំណាង និងសក្ដានុពល៣៥នាក់ប៉ុណ្ណោះដែលត្រូវបានជ្រើសរើសប្រកួតនៅវគ្គជម្រុះរយៈពេល២ថ្ងៃ គឺថ្ងៃទី១៤-១៥ មិថុនា ២០១៤ នៅឯសណ្ឋាគារកាំបូឌីយ៉ាណា ដើម្បីជ្រើសរើសយកតែ១៥នាក់សម្រាប់ការប្រកួតនៅវគ្គផ្ដាច់ព្រ័ត្រ ។ នៅទីបញ្ចប់នៃការប្រកួត ជ័យលាភីតែមួយរូបគត់ដែលនឹងទទួលបានពានរង្វាន់ អមដោយប្រាក់រង្វាន់សរុប២០.០០០ដុល្លារអាមេរិក និងឱកាសអាជីពដ៏មានអនាគតនៅក្នុងវិស័យបង្ហាញម៉ូដ ។
កម្មវិធីប្រឡងជ្រើសរើសកំពូលតារាបង្ហាញម៉ូដដែលរៀបចំដោយស្ថានីយទូរទស្សន៍ម៉ាយធីវី ដែលមានអ្នកនាងយុគ ចិន្ដា ជាពិធីការិនីដ៏ល្បីល្បាញរបស់កម្ពុជា តាមដានជីវិតរបស់បេក្ខនារីទាំង១៥រូប ដែលរស់នៅក្នុងផ្ទះរបស់កម្មវិធី «កំពូលតារាបង្ហាញម៉ូដកម្ពុជា» ក្នុងរយៈពេល១៦សប្ដាហ៍ ខណៈដែលពួកគេនឹងត្រូវប្រែក្លាយខ្លួនពីនារីដែលមានរូបសម្រស់ស្អាតធម្មតា ទៅជាតារាបង្ហាញម៉ូដអាជីពតាមរយៈការអនុវត្តកិច្ចការ និងលំហាត់បង្ហាញម៉ូដជាច្រើន ។
កម្មវិធីនេះបង្ហាញជូននូវឈុតនានានៃការបង្ហាត់បង្រៀនការដើរបង្ហាញម៉ូដ និងជំនាញទាន់សម័យ ដែលចែករំលែកដោយអ្នកជំនាញ និងតារាជើងចាស់ ខណៈដែលតារាបង្ហាញម៉ូដនឹងត្រូវធ្វើតេស្តតាមរយៈលំហាត់ដ៏ លំបាកៗ ដើម្បីឈ្នះរង្វាន់ប្រចាំសប្ដាហ៍ ។ បន្ទាប់មក បេក្ខនារីត្រូវថតរូបភាព ឬថតស្ប៉តពាណិជ្ជកម្មទូរទស្សន៍ ដោយផ្អែកលើប្រធានបទ និងគោលគំនិតច្នៃប្រឌិត ប្លែកៗ ហើយរៀងរាល់សប្ដាហ៍ នីមួយៗ បេក្ខនារីមួយរូបនឹងត្រូវជម្រុះចេញពីកម្មវិធី ដោយអាស្រ័យលើគុណភាពរូបថត និងការអនុវត្តទូទៅរបស់ខ្លួន ។
ក្នុងគោលបំណងដើម្បីលើកកម្ពស់វិស័យបង្ហាញម៉ូដនៅកម្ពុជា និងលើកកម្ពស់ចំណេះដឹង និងជំនាញទាក់ទងនឹងម៉ូដទាន់សម័យរបស់ទាំងបេក្ខនារី និងទាំងអ្នកទស្សនាកម្មវិធីនេះនឹងត្រូវថតនៅទីតាំង ខុសៗគ្នានៅទូទាំងប្រទេសកម្ពុជា។ ជាមួយគ្នានេះដែរ ដើម្បីត្រៀមលក្ខណៈបេក្ខនារីសម្រាប់ការដើរបង្ហាញម៉ូដលើឆាកអន្តរជាតិ បេក្ខនារីឆ្នើមមួយចំនួននឹងមានឱកាសធ្វើដំណើរទៅក្រៅប្រទេសដើម្បីបន្តការប្រកួតបង្ហាញម៉ូដផងដែរ ។ កម្មវិធីនេះចាប់ផ្ដើមថតនៅខែមិថុនា ឆ្នាំ២០១៤ ហើយនឹងត្រូវចាក់ផ្សាយចាប់ពីថ្ងៃសុក្រ ទី១៤ ខែវិច្ឆិកា ឆ្នាំ២០១៤ តទៅ នៅលើកញ្ចក់ទូរទស្សន៍ MyTV ។
លោកលី អុងម៉ារឌី សហផលិតករនៃកម្មវិធីនិយាយអំពីការប្រឡងនេះថា មិនមែនសម្រាប់តែតារាបង្ហាញម៉ូដប៉ុណ្ណោះទេ ។ បេក្ខនារីទាំងអស់នឹងទទួលបានអាជីព ផ្សេងៗដែលមានសក្ដានុពលនៅចុងបញ្ចប់នៃកម្មវិធី ។
គណៈមេប្រយោគដែលរួមមានពិធីការិនីយុគ ចិន្ដា អ្នករចនាម៉ូដទាន់សម័យអន្តរជាតិ ហ៊ូរ រ៉េមី តារាបង្ហាញម៉ូដដ៏ល្បីរបស់កម្ពុជា គួយ ច័ន្ទដានិច និងអ្នកថតរូបបង្ហាញម៉ូដ ព្រមទាំងអ្នកដឹកនាំការសម្ដែង លោកចែម វុឌ្ឍសុវិន្ទ នឹងកំណត់ថា តើបេក្ខនារីណាដែលត្រូវបន្តនៅ និងបេក្ខនារីណាដែលត្រូវចាកចេញពីការប្រឡង ។
លោកចែម វុឌ្ឍសុវិន្ទ មានប្រសាសន៍ថា «ការប្រឡងជ្រើសរើសកំពូលតារាបង្ហាញម៉ូដកម្ពុជានេះ នឹងផ្ដល់ឱកាសឱ្យបេក្ខនារីប្រឡងបានឃើញពីវិស័យបង្ហាញម៉ូដដែលមានស្តង់ដាខ្ពស់ពិតប្រាកដ ហើយខ្ញុំជឿជាក់ថា បេក្ខនារីយើងនឹងមានភាពចាស់ទុំក្នុងអាជីពបង្ហាញម៉ូដនេះ តាមរយៈការបង្ហាត់បង្រៀនទាំងឡាយដែលពួកគេនឹងចូលរួម ហើយរូបខ្ញុំផ្ទាល់ដែលជាអ្នកថតរូបការបង្ហាញម៉ូដ និងគណៈមេប្រយោគដទៃទៀត ដែលមានបទពិសោធន៍ធ្វើការជាមួយតារាបង្ហាញម៉ូដជាតិ និងអន្តរជាតិ នឹងផ្ដល់មតិរិះគន់ស្ថាបនា និងដំបូន្មានដើម្បីធ្វើឱ្យបេក្ខនារីទាំងអស់ក្លាយជាតារាបង្ហាញម៉ូដអាជីពដែលមានជោគជ័យទៅថ្ងៃមុខ ទោះបីពួកគេឈ្នះ ឬមិនឈ្នះនៅក្នុងការប្រឡងនេះក្ដី» ។
កម្មវិធីប្រឡងជ្រើសរើសកំពូលតារាបង្ហាញម៉ូដកម្ពុជា យកលំនាំតាមកម្មវិធីកំពូលតារាបង្ហាញម៉ូដអាមេរិកដែលទទួលជោគជ័យនៅលើពិភពលោក និងចាក់ផ្សាយនៅជាង២០ប្រទេសជុំវិញពិភពលោក ។
កម្មវិធីកំពូលតារាបង្ហាញម៉ូដនេះ ផលិតដោយពិធីការិនី និងអតីតកំពូលតារាបង្ហាញម៉ូដសហរដ្ឋអាមេរិក Tyra Banks ៕
ចែករំលែកព័តមាននេះ