ខេត្តឧត្តរមានជ័យ ៖ ជនម្នាក់ត្រូវបានសមត្ថកិច្ចខេត្តឧត្តរមានជ័យឃាត់ខ្លួននៅព្រឹកថ្ងៃទី១៣ ខែឧសភា ឆ្នាំ២០២០ ក្រោយពីមានពាក្យបណ្តឹងរបស់ម្តាយក្មេងរងគ្រោះ ដែលបានប្តឹងចោទថា បានធ្វើទារុណកម្មកូនខ្លួន កាលពី១ឆ្នាំមុន ។
ជនដែលសមត្ថកិច្ចឃាត់ខ្លួននេះឈ្មោះ ធួន ផានណា ហៅហុន អាយុ៣៤ឆ្នាំ រស់នៅសង្កាត់សំរោង ក្រុងសំរោង ខេត្តឧត្តរមានជ័យ ។ ស្ត្រីដែលប្តឹងមានឈ្មោះ ខេន ធារី អាយុ២៩ឆ្នាំ ចំណែកក្មេងរងគ្រោះជាកូនដែលទទួលទារុណកម្ម មានអាយុ១ឆ្នាំ៧ខែ ឈ្មោះ ភី វាសនា ។ ជនជាប់ចោទ គឺជាប្តីក្រោយ ហើយកូនក្មេងរងគ្រោះនេះ គឺជាកូនរបស់ប្តីមុន ។
បើតាមការអះអាងរបស់សមត្ថកិច្ច តាមបណ្តឹងករណីធ្វើទារុណកម្មនេះ បានកើតឡើងកាលពីថ្ងៃទី២៨ ខែមេសា ឆ្នាំ២០១៩ នៅភូមិឈូក សង្កាត់សំរោង ក្រុងសំរោង ខេត្តឧត្តរមានជ័យ ។ ជនសង្ស័យបានប្រើប្រាស់អំពើហិង្សា ដោយចាប់កាច់ដៃកាច់ជើងកូនប្រុសចុង ដែលពេលនោះទើបមានអាយុ៧ខែ ឲ្យរងរបួសជាទម្ងន់ ដោយបាក់ដៃ និងបាក់ជើង ។
ទោះជារឿងនេះ បានកើតឡើងកាលពី១ឆ្នាំមុនក្តី ប៉ុន្តែជនរងគ្រោះទើបនឹងដាក់ពាក្យបណ្តឹងទៅកាន់សមត្ថកិច្ច កាលពីថ្ងៃទី១៩ ខែឧសភា ឆ្នាំ២០២០ប៉ុណ្ណោះ ដោយមានបង្ហាញភស្តុតាងមួយចំនួន ។ ក្រោយមានការដាក់ពាក្យបណ្តឹងនេះ កម្លាំងការិយាល័យប្រឆាំងការជួញដូរមនុស្ស និងការពារអនីតិជនស្នងការដ្ឋាននគរបាលខេត្តឧត្តរមានជ័យ បានចុះឃាត់ខ្លួនឈ្មោះ ធួន ផានណា តែម្តង ។
នៅវេលាម៉ោងប្រមាណ៦ព្រឹកថ្ងៃទី១៣ ខែឧសភា ឆ្នាំ២០២០ ។ រហូតមកដល់ពេលនេះ ជនរងគ្រោះកំពុងស្ថិតនៅក្នុងការសួរនាំរបស់សមត្ថកិច្ច ដែលនឹងបញ្ជូនទៅសាលាដំបូងនៅពេលក្រោយ ៕
ចែករំលែកព័តមាននេះ