រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ គ្រោងបញ្ជូនយុវជនឈាមរាវម្នាក់ទៅសាលាដំបូងរាជធានីភ្នំពេញ នៅព្រឹកថ្ងៃទី១៤ ខែឧសភា ឆ្នាំ២០២០ដើម្បីធ្វើការសាកសួរលើសំណុំរឿង បង្កាត់ភ្លើងស្នេហ៍តាមហ្វេសប៊ុក បង្គាប់ឲ្យខាងស្រីថតស្រាត លុះដល់ពេលស្នេហាប្រេះឆា ខាងប្រុសបង្ហោះរូបអាសអាភាសបរិហារហែកកេរ្តិ៍ ។
យុវជនរូបនេះឈ្មោះ ឈុន កុយ អាយុ១៨ឆ្នាំ ជាកម្មករសំណង់ មានស្រុកកំណើតនៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។ ទាក់ទិននឹងករណីខាងលើនេះ លោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ បានឲ្យដឹងថា ជនសង្ស័យត្រូវបាននគរបាលការិយាល័យរបស់លោក ឃាត់ខ្លួនកាលពីថ្ងៃទី១២ ខែឧសភា ឆ្នាំ២០២០ តាមពាក្យបណ្តឹងរបស់នារីរងគ្រោះ ។
ក្នុងពាក្យបណ្តឹងបានបញ្ជាក់ថា នាអំឡុងខែមួយក្នុងឆ្នាំ២០១៧ យុវជនម្នាក់ខាងលើបានបង្កាត់ភ្លើងស្នេហ៍ជាមួយនារីរងគ្រោះ ដោយឆាតតាមហ្វេសប៊ុកទាក់ទងរហូតបាក់ចិត្តស្រឡាញ់គ្នាទៅវិញទៅមកពេញបេះដូង ។ ក្រោយពីអណ្តាតភ្លើងស្នេហ៍បាក់ចិត្តងប់ងុលរកគ្នាទៅវិញទៅមកហើយ ខាងប្រុសបានអន្ទងលួងលោមខាងស្រីឲ្យថតរូបអាក្រាតកាយផ្ញើឲ្យគេមើល ។ ដើម្បីបញ្ជាក់ពីភាពស្មោះស្ម័គ្រផងនោះ ខាងស្រីក៏យល់ព្រមថតស្រាត ផ្ញើតាមឆាតឲ្យប្រុសស្នេហ៍ដើម្បីបំពេញបំណង ព្រោះខ្លាចខាងប្រុសមិនស្រឡាញ់។
លុះបានជាង១ឆ្នាំក្រោយមក ស្រាប់តែចំណងស្នេហ៍តាមហ្វេសប៊ុកបានប្រេះឆា ហើយយុវជនឈាមរាវរូបនេះបានយករូបអាក្រាតកាយរបស់នារីជាអតីតសង្សារនោះ ទៅបង្ហោះលើបណ្តាញសង្គមហ្វេសប៊ុក ដូចហែកសំពត់ឲ្យគេមើល ដែលនោះហើយធ្វើឲ្យខាងស្រីអាប់ឱនកិត្តិយសពេញនគរ ។ដោយការបង្ហោះរូបអាសអាភាសធ្វើឲ្យភ្ញាក់ផ្អើលពីសំណាក់យុវជនកំហូចបង្ខូចកេរ្តិ៍ឈ្មោះខាងស្រីនេះ នាងជាជនរងគ្រោះបានសម្រេចចិត្តដាក់ពាក្យបណ្តឹងដល់សមត្ថកិច្ច ដើម្បីឲ្យចាត់ការយុវជននោះ ។
លោក អេង សោភា បន្តថា ក្រោយពីទទួលបានពាក្យបណ្តឹងពីជនរងគ្រោះ ស្នងការនគរបាលរាជធានីភ្នំពេញ បានអនុញ្ញាតឲ្យនគរបាលការិយាល័យព្រហ្មទណ្ឌកម្រិតធ្ងន់ បើកការស៊ើបអង្កេតនិងស្រាវជ្រាវ ហើយរហូតមកដល់ថ្ងៃទី១២ ខែឧសភា ក៏ឈានដល់ការឃាត់ខ្លួនជនសង្ស័យនៅក្នុងខណ្ឌពោធិសែនជ័យ រាជធានីភ្នំពេញ ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា រូបគេនិងនារីរងគ្រោះពិតជាបានស្រឡាញ់គ្នាតាមហ្វេសប៊ុកមែន តែមិនដែលបានជួបមុខគ្នាផ្ទាល់ទេ ។ ក្រោយមក រូបគេបានលួងលោមនារីរងគ្រោះឲ្យថតរូប និងថតវីដេអូអាក្រាតកាយ ផ្ញើមកឲ្យខ្លួនមើល ដើម្បីឲ្យចំណងស្នេហ៍កាន់តែផ្អែមល្ហែមថែមទៀត ។
លុះដល់ខែមេសា មុនបុណ្យចូលឆ្នាំថ្មីឆ្នាំនេះ នាងជាសង្សារបានសុំបែកដោយប្រាប់ថា នាងមានសង្សារថ្មីហើយ ឈប់ទាក់ទងនាងទៀតទៅ ។ ចំណុចនេះ ធ្វើឲ្យរូបគេខឹងសម្បា ទើបបង្ហោះវីដេអូ និងរូបថតរូបអាក្រាតកាយរបស់នាងលើហ្វេសប៊ុកដើម្បីបង្ខូចកិត្តិយសកេរ្តិ៍ឈ្មោះនាងតែម្តងទៅ ហើយទីបំផុតក៏ត្រូវសមត្តកិច្ចចាប់ខ្លួន ៕
ចែករំលែកព័តមាននេះ