រាជធានីភ្នំពេញ ៖ តារាសម្តែងអ្នកនាង លី ច័ន្ទសីហា បានប្រកាសផ្អឹបបេះដូងមួយរយៈ ដោយមិនទាន់គិតបញ្ហាស្នេហានៅក្នុងអំឡុងពេលនេះឡើយ បន្ទាប់ពីនាងបានជួបប្រទះការបែកបាក់ស្វាមី ដោយបន្សល់ទុកកូនស្រីមួយរូបជាចំណងដៃ ក្រោមរួមរស់ជាមួយគ្នាបានប៉ុន្មានឆ្នាំមកនេះ។…
រាជធានីភ្នំពេញ ៖ តារាសម្តែងអ្នកនាង លី ច័ន្ទសីហា បានប្រកាសផ្អឹបបេះដូងមួយរយៈ ដោយមិនទាន់គិតបញ្ហាស្នេហានៅក្នុងអំឡុងពេលនេះឡើយ បន្ទាប់ពីនាងបានជួបប្រទះការបែកបាក់ស្វាមី ដោយបន្សល់ទុកកូនស្រីមួយរូបជាចំណងដៃ ក្រោមរួមរស់ជាមួយគ្នាបានប៉ុន្មានឆ្នាំមកនេះ។
បើគិតមកទល់ពេលនេះ លី ច័ន្ទសីហា បានបែកបាក់ស្វាមីបានប្រមាណជា២ឆ្នាំមកហើយ ខណៈពេលដែលដំណឹងនៃការបែកបាក់ស្វាមីពីតារាសម្តែងពូកែបង្ហូរទឹកភ្នែករូបនេះហាក់មិនសូវបានប្រកាសឲ្យដឹងជាទូទៅឡើយ ក្នុងពេលដែលតារារូបនេះបានបញ្ជៀបខ្លួនចូលក្នុងសិល្បៈជាបណ្តើរឡើងវិញ។
លី ច័ន្ទសីហា បានបង្ហាញមុខជាបន្តបន្ទាប់ក្នុងកម្មវិធីអ្នកសិល្បៈផ្សេងៗ និងខ្សែភាពយន្តខ្នាតខ្លី ជាមួយនឹងរូបសម្រស់ស្រស់ប្លែកជាងពីពេលមុន ក្រោយពេលដែលនាងបានបែកបាក់ស្វាមីដែលជាមន្ត្រីមានបុណ្យស័ក្តិខ្ពស់មួយរូប។ យ៉ាងណា បើទោះបីជារក្សាបាននូវរូបសម្រស់ឲ្យនៅស្រស់សោភាយ៉ាងណាក៏ដោយ ប៉ុន្តែ លី ច័ន្ទសីហា បានអះអាងថា នាងមិនទាន់គិតរឿងមានគ្រួសារថ្មីនាពេលនេះឡើយ ដោយសារតែនាងជាប់ភារកិច្ចបីបាច់ថែរក្សាកូនស្រី និងមុខរបររកស៊ីមួយចំនួនទៀត។
នាងបញ្ជាក់ថា បច្ចុប្បន្នក្រៅពីការងារមើលថែកូន នាងក៏លក់គ្រឿងសម្អាងមួយចំនួនតាមអនឡាញ និងការងារលក់ដីឡូតិ៍ ដែលការងារទាំងអស់បានធ្វើឲ្យនាងមានភាពមមាញឹកច្រើន ស្ទើរតែមិនមានពេលសម្រាប់ការងារសិល្បៈ។
លី ច័ន្ទសីហា បាននិយាយថា ឥឡូវរឿងស្នេហា គឺមិនទាន់គិតទេ ទុកពេលសំរាប់កូនសិន រឿងជីវិតគ្រួសារសុំសម្រាកផ្លូវចិត្ត ទុកពេលមើលថែកូនខ្ញុំសិន ឬអាចនិយាយបានសឹងថា មិនបាច់ក៏បាន ខណៈពេលដែលនាងមមាញឹករឿងការងាររកស៊ីផងនោះ។ ដោយឡែកសម្រាប់ការងារសិល្បៈវិញ ត្រូវបានតារារូបនេះលើកឡើងថា កន្លងមក មានបណ្តាផលិតកម្មផ្សេងៗបានទាក់ទងឲ្យនាងចូលរួមសម្តែងដែរ ប៉ុន្តែនាងបានទទួលខ្លះ អត់ខ្លះ ក្នុងពេលដែលនាងអាចទទួលថតបានតែរឿងខ្លីប៉ុណ្ណោះ ព្រោះខ្លាចមិនមានគ្រប់គ្រាន់។
នាងនិយាយថា ខ្ញុំទទួលតែរឿងខ្លីរឿង ពេលម៉ែចាស់ទៅ របស់អ្នកមីង ពាន់ ភួងបុផ្ផា និងក្រៅពីនេះឡើងកម្មវិធី ទូរទស្សន៍ផ្សេងៗ ចំណែករឿងភាគគេហៅដែរ តែអត់ទទួលទេ ដោយសារតែខ្ញុំរវល់រកស៊ី និងមើលថែកូន។ លី ច័ន្ទសីហា បានក្លាយទីជាតារាវ័យក្មេង ដែលធ្លាក់ខ្លួនមេម៉ាយកូន១ ក្រោយពីចំណងស្នេហ៍ជាង១ឆ្នាំ ជាមួយអតីតប្ដីមន្ដ្រីប៉ូលិស និងជាអតីតនិស្សិតយោធា បានដើរដល់ទីបញ្ចប់ ឈានទៅលែងលះគ្នាក្រោមអំណាចតុលាការ។
លី ច័ន្ទសីហា ធ្លាប់បានលើកឡើងប្រាប់បណ្តាញសារព័ត៌មាននៅក្នុងស្រុកថា ចំណងស្នេហ៍របស់នាងមានភាពរកាំរកូស តាំងពីមុនរៀបការ តែមិនជាបញ្ហាធំដុំ ទើបអាចការបានតាមគម្រោង។
នាងបញ្ជាក់ថា ក្រោយរៀបការហើយអតីតស្វាមីរបស់នាង មិនសូវមានពេលវេលានៅក្បែរខ្លួននាងឡើយ ពិសេសគឺពេលដែលនាងមានផ្ទៃពោះ៦ខែ គឺប្ដីរបស់នាងបែរជារវល់រហូតមិនសូវបាននៅក្បែរនាងបានយូរឡើយ។
រឿងដែលនាងកាន់តែតូចចិត្តថែមទៀត គឺនៅពេលនាងសម្រាលកូនស្រីនៅមន្ទីរពេទ្យ ពេលនោះប្ដីក៏គ្មានពេលមកមើលថែ និងផ្ដល់កម្លាំងចិត្តដល់រូបនាងឡើយ គឺគ្រាន់តែមកអើតមើលមួយភ្លែតប៉ុណ្ណោះ។ ក្រោយមកក៏មិនអាចផ្សះផ្សាគ្នាបាន រហូតឈានទៅដល់ការចែកផ្លូវគ្នាតែម្ដង តាមតុលាការ ខណៈពេលនេះអតីតស្វាមីរបស់នាងមានប្រពន្ធថ្មីទៀតហើយដែរ៕ (កែសម្រួឡដោយ ៖ បុប្ផា)
ចែករំលែកព័តមាននេះ