រាជធានីភ្នំពេញ៖ ក្រោយការតស៊ូជម្នះនឹងជំងឺក៏កាចសាហាវមួយរយៈពេលទីបំផុតប្អូនប្រុសរបស់តារាចម្រៀងស្រីស្រគត់ស្រគំអ្នកនាង សុន ស្រីពេជ្រ ដែលរងជំងឺធ្ងន់ធ្ងរឥឡូវលាចាកលោកយើងទៅហើយនៅម៉ោង ១០ព្រឹក ថ្ងៃទី៣០ ខែមេសា ឆ្នាំ២០២០ ដែលនេះចាត់ទុកជាដំណឹងដ៏ក្រៀមក្រំបំផុតសម្រាប់គ្រួសារអ្នកសិល្បៈមួយដួង ។
ប្អូនប្រុសរបស់តារាចម្រៀងរូបនេះមានឈ្មោះថា សុន សំណាង ហៅ សុនសឺត អាយុ ៣២ឆ្នាំ ជាកូនប្រុសទី៦ ក្នុងគ្រួសារ ។ ប្អូនប្រុសបានធ្លាក់ខ្លួនឈឺជាមួយនឹងជំងឺនៃការ «ខូចខួរឆ្អឹងខ្នង» ។ ការបាត់បង់ជីវិតប្អូនប្រុសរបស់ អ្នកនាង សុន ស្រីពេជ្រ ទៅកាន់ទីឆ្ងាយមិនអាចវិលត្រឡប់មកវិញ ចាកចោលលោកអ្នកមានគុណ បងប្អូនសាច់ញាតិ គឺជាបាត់បង់ដ៏ធំធេងដែលចាត់ទុកបានថាអ្នកនាង សុន ស្រីពេជ្រ ជួបទុក្ខធំ ព្រោះកន្លងមករូបនាងផ្ទាល់និងក្រុមគ្រួសារបានខិតខំគ្រប់មធ្យោបាយក្នុងការរកប្រាក់មកព្យាបាលមនុស្សជាទីស្រលាញ់របស់ខ្លួន ។
អំឡុងពេលព្យាបាលប្អូនប្រុសកន្លងមក អ្នកនាង សុន ស្រីពេជ្រ ក្នុងនាមជាបងស្រី បានព្យាយាមស្វែងរកជំនួយពី សប្បុរសជនជាច្រើននៅពេលដឹងថា អស់លទ្ធភាពបូកទាំង បញ្ហាកូវីដធ្វើអោយនាង មិនអាចចេញក្រៅរកលុយបាន។ បើយោងតាមស្ថានភាពជំងឺប្អូន ប្រុសរបស់ សុន ស្រីពេជ្រ មានជំងឺរបេងឆ្អឹងខ្នង ព្យាបាលច្រើនខែមកហើយ រាប់ទាំងការចេញទៅប្រទេសជិតខាង។
ដោយសារតែស្ថានភាពជំងឺកាន់តែធ្ងន់ធ្ងរឡើងៗ ប្អូនប្រុសដ៏កម្សត់រូបនេះបានផុតដង្ហើមនៅព្រឹកថ្ងៃទី ៣០ មេសា ដែលការបាត់បង់បង្កអោយមានការសោកស្តាយចំពោះញាតិមិត្តជាពិសេសសប្បុរសជន នានាដែលបានបរិច្ចាក ថវិកា ជួយដល់ គ្រួសារអ្នកជំងឺម្នាក់ៗ ក៏បានសម្តែងការអាណិត ចូលរួមរំលែកទុក្ខគ្រប់គ្នា។
បើតាមអោយដឹងពីអ្នកនាង សុន ស្រីពេជ្រ បានអោយដឹងថា សពប្អូនប្រុសរបស់នាងគឺតម្កល់ធ្វើបុណ្យសពនៅវត្តសំរោងអណ្តែត រាជធានីភ្នំពេញ ហើយអ្នកនាងនិងក្រុមគ្រួសារ កំពុងពិភាក្សារឿងពេលវេលានៃការបូជាសព ។ នេះជាការជូនដំណឹងដល់មិត្តសិល្បៈ និងអ្នកស្គាល់នាងទាំងអស់ទៅចូលរួមពិធីបុណ្យសពរបស់ប្អូនប្រុសអ្នកសិល្បៈរូបនេះ ៕
ចែករំលែកព័តមាននេះ