ខេត្តព្រះសីហនុ ៖ ក្នុងន័យបង្កើតការទាក់ទាញទេសចរណ៍មកកំសាន្តខេត្តព្រះសីហនុឲ្យបានច្រើន និងប្លែកភ្នែក លោក គួច ចំរើន អភិបាលខេត្តមាត់សមុទ្រមួយនេះបានលើកទឹកចិត្តដល់ម្ចាស់កសិដ្ឋានចិញ្ចឹមបង្គា គួរប្រែក្លាយការចិញ្ចឹមបង្គាមិនគ្រាន់តែយកទិន្នផលលក់លើទីផ្សារប៉ុណ្ណោះទេ តែត្រូវពង្រីកតំបន់នេះទៅជាតំបន់កសិ.ទេសចរណ៍ជាមួយនិងការចិញ្ចឹមបែបវារីវប្បកម្ម សម្រាប់អ្នកទេសចរណ៍ជាតិនិងអន្តរជាតិមកលេងកំសាន្ត និងស្វែងយល់ពីធម្មជាតិ ។
លោក គួច ចំរើន បានថ្លែងបែបនេះនាឱកាសចុះទៅពិនិត្យស្រែចិញ្ចឹមបង្គារបស់ក្រុមហ៊ុន ហេង ហេង នៅក្នុងភូមិអូរតាសេក (ប៉ុលឌែ២) ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ កាលពីថ្ងៃទី ២៨ ខែមេសា ឆ្នាំ២០២០ ។
បើតាមលោក សូ សុរិយា តំណាងក្រុមហ៊ុនខាងលើអោយដឹងថា ស្រែបង្គានេះមានផ្ទៃដីជាង១០០ហិកតា ហើយបច្ចុប្បន្ន ផលបង្គាចិញ្ចឹមបែបធម្មជាតិនេះ បានផ្គត់ផ្គង់ទីផ្សារក្នុងខេត្តព្រះសីហនុផង និងបណ្តាខេត្តតំបន់ឆ្នេរ ហើយលោកនឹងខិតខំកែច្នៃទៅតាមអ្វីដែលថ្នាក់ដឹកនាំខេត្តបានជម្រុញ ៕ (កែសម្រួលដោយ ៖ ធីតា)
ចែករំលែកព័តមាននេះ