ខេត្តសៀមរាប ៖ ក្មេងប្រុសអាយុ១២ឆ្នាំដែលទទួលការចម្លងជំងឺកូវីដ-១៩ពីម្តាយ បានជាសះស្បើយវិញហើយ បន្ទាប់ពីគ្រូពេទ្យបង្អែកខេត្តសៀមរាប ផ្តល់ការព្យាបាលដោយយកចិត្តទុកដាក់អស់រយៈពេលជិត២០ថ្ងៃកន្លងមក និងបានវិលត្រឡប់ទៅផ្ទះវិញហើយនារសៀលថ្ងៃទី១៩ ខែមេសា ឆ្នាំ២០២០នេះ ។…
ខេត្តសៀមរាប ៖ ក្មេងប្រុសអាយុ១២ឆ្នាំដែលទទួលការចម្លងជំងឺកូវីដ-១៩ពីម្តាយ បានជាសះស្បើយវិញហើយ បន្ទាប់ពីគ្រូពេទ្យបង្អែកខេត្តសៀមរាប ផ្តល់ការព្យាបាលដោយយកចិត្តទុកដាក់អស់រយៈពេលជិត២០ថ្ងៃកន្លងមក និងបានវិលត្រឡប់ទៅផ្ទះវិញហើយនារសៀលថ្ងៃទី១៩ ខែមេសា ឆ្នាំ២០២០នេះ ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានបង្ហាញសាវតានៃការឆ្លងនៅរសៀលថ្ងៃទី១៩ មេសា ឆ្នាំ២០២០ថា កុមារាអាយុ១២ឆ្នាំនេះ ជាកូនបង្កើតរបស់បុរសខ្មែរទី២ ដែលរកឃើញវិជ្ជមានវីរុសកូវីដ-១៩នៅខេត្តសៀមរាប បន្ទាប់ពីឪពុកបានវិលត្រឡប់មកពីបុណ្យសាសនានៅប្រទេសម៉ាឡេស៊ី ។ ចំណែកបុរសជាឪពុកនោះ ត្រូវបានមន្ទីរពេទ្យបង្អែកខេត្តសៀមរាបតាមស្រាវជ្រាវរក និងផ្តល់ការព្យាបាលចាប់ពីថ្ងៃទី១៣ ខែមីនា ឆ្នាំ២០២០ និងបានជាសះស្បើយចេញពីមន្ទីរពេទ្យបង្អែកខេត្តសៀមរាប នៅថ្ងៃទី២ ខែមេសា ឆ្នាំ២០២០កន្លងមក ។
ការវិលត្រឡប់របស់បុរសជាឪពុកនោះ មិនបានដាក់ឱ្យនៅដាច់ដោយឡែកចំនួន១៤ថ្ងៃនោះឡើយ ដោយសារការចន្លោះខ្វះខាតនេះហើយ គឺក្រោយពេលដែលបុរសជាឪពុកព្យាបាលបានជាសះស្បើយហើយ រោគសញ្ញាវីរុសកូវីដ-១៩បានបង្ហាញវត្តមានទៅលើភរិយា និងចម្លងពីភរិយាទៅកូនបន្តទៀត ។
ម្តាយនិងកូន ត្រូវបានមន្ទីរពេទ្យបង្អែកខេត្តសៀមរាបទទួលព្យាបាលជាបន្តបន្ទាប់ ។ ស្ត្រីជាភរិយានិងជាម្តាយរបស់កុមារាអាយុ១២ឆ្នាំនោះ ពិនិត្យឃើញអវិជ្ជមានវីរុសកូវីដ-១៩ ចំនួន៣លើកហើយកាលពីសប្តាហ៍មុន ប៉ុន្តែស្ត្រីជាម្តាយនោះមិនព្រមចេញពីមន្ទីរពេទ្យនោះទេ ដោយសុំនៅកំដរកូនសិនរហូតដល់ថ្ងៃកូនប្រុសបានជាសះស្បើយ ។
យ៉ាងណាក៏ដោយ ស្ត្រី(ជាម្តាយកុមារា)ម្នាក់នោះ បានបង្ហាញនូវការសោកស្តាយចំពោះការធ្វេសប្រហែសនោះ និងបន្ថែមនូវការផ្តាំផ្ញើយ៉ាងដូច្នេះថា យោងតាមការដាក់ចេញនូវវិធានការជាច្រើនរបស់ក្រសួងសុខាភិបាល និងការអំពាវនាវដ៏ខ្ពង់ខ្ពស់របស់ប្រមុខនៃរាជរដ្ឋាភិបាល ប្រជាពលរដ្ឋកម្ពុជាទាំងអស់ មិនអាចប្រើពាក្យថា សោកស្តាយចំពោះការធ្វេសប្រហែសនោះឡើយ លោកស្រីបានបង្ហាញនូវការដឹងគុណយ៉ាងជ្រាលជ្រៅចំពោះសម្តេចតេជោ ហ៊ុន សែន និងគ្រូពេទ្យជួរមុខនៃសមរភូមិកូវីដ-១៩ទាំងអស់ ដែលបានលះបង់គ្រប់បែបយ៉ាងដើម្បីសុខភាពនិងអាយុជីវិតប្រជាជន ។
លោកវេជ្ជបណ្ឌិត ក្រុស សារ៉ាត់ គូសបញ្ជាក់ឱ្យដឹងបន្ថែមអំពីការយកចិត្តទុកដាក់របស់គ្រូពេទ្យជួរមុខរបស់កម្ពុជា ដែលក្រៅអំពីការព្យាបាលប្រកបដោយប្រសិទ្ធភាព នោះគឺការពិនិត្យយ៉ាងហ្មត់ចត់ លើករណីសុខភាពផ្លូវដង្ហើមរបស់អ្នកជំងឺ មុននឹងមានការអនុញ្ញាតឲ្យចាកចេញពីមន្ទីរពេទ្យ រួមទាំងត្រូវអនុវត្តឲ្យបានល្អផងដែរ បន្តការដាក់ខ្លួន១៤ថ្ងៃ មុននឹងមានការជួបជុំក្រុមគ្រួសារ និងញាតិមិត្តជិតឆ្ងាយនោះ ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍បញ្ជាក់ទៀតថា ដោយយោងតាមសេចក្តីប្រកាសរបស់ក្រសួងសុខាភិបាល ចំពោះអ្នកឆ្លងមេរោគកូវីដ១៩ ដែលកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តសៀមរាប មានចំនួន៧នាក់ ក្នុងនោះក្មេងម្នាក់ និងស្ត្រីម្នាក់ ខណៈពេលនេះបានជាសះស្បើយត្រូវចាកចេញពីមន្ទីរពេទ្យបង្អែកខេត្ត ចំនួន៦នាក់ នៅសល់តែម្នាក់ គឺបុរសជាជនជាតិខ្មែរ អ្នកបើករថយន្តឱ្យក្រុមជនជាតិបារាំងដែលមានមេរោគកូវីដ១៩ ។
លោកបានបញ្ជាក់ថា អ្នកឆ្លងទាំង៧នាក់ប្រុស ស្រី ដែលធ្វើតេស្តរកមេរោគកូវីដ១៩ តាំងពីថ្ងៃទី៥ រហូតមកដល់ថ្ងៃទី១៩ ខែមេសា ឆ្នាំ២០២០នេះ ឃើញថា ពួកគាត់ពិតជាបានជាសះស្បើយបន្តបន្ទាប់ ចំនួន៦នាក់ ពិតប្រាកដមែន ។ លោកប្រធានមន្ទីរសុខាភិបាលខេត្តបានបញ្ជាក់ថា នេះជាប្រពន្ធ និងកូនរបស់បុរសខ្មែរទី២ ដែលបានឆ្លងជំងឺកូវីដ១៩មកពីប្រទេសម៉ាឡេស៊ី ។
ដូច្នេះ ក្រុមគ្រូពេទ្យត្រូវតែមានការប្រុងប្រយ័ត្ន ជាទីបំផុតចំពោះអ្នកដែលនៅជាប់ពាក់ព័ន្ធប៉ះពាល់ជិតបំផុត អ្នកដែលមានវិជ្ជមានមេរោគហ្នឹង គឺសំខាន់ណាស់ ហើយបើយើងអត់មានការពាក់ព័ន្ធវិជ្ជមានមេរោគនោះទេ យើងមិនមានបញ្ហាទេ ឬមួយយើងមិនធ្លាប់បានធ្វើដំណើរទៅប្រទេសណាដែលមានការឆ្លងរាលដាលនៃមេរោគហ្នឹង ក្នុងរយៈពេល១៤ថ្ងៃកន្លងទៅ វាគ្រាន់តែជារោគសញ្ញានៃការគ្រុនផ្តាសាយធម្មតា ។
ក្នុងនាមជាប្រធានមន្ទីរសុខាភិបាល ក៏ដូចជាមន្ទីរពេទ្យបង្អែកខេត្តសៀមរាប រួមនិងលោកគ្រូពេទ្យ និងមន្ត្រីសុខាភិបាលទាំងអស់ ដែលបានធ្វើការនៅជួរមុខ ក្នុងមន្ទីរពេទ្យខេត្តសៀមរាបនេះ សូមជូនពរដល់ក្រុមគ្រួសារអ្នកទាំង៣ មានប្តី-ប្រពន្ធ និងកូនប្រុសមួយនេះ សូមឱ្យមានសំណាងល្អរៀងរហូតទៅ ៕
ចែករំលែកព័តមាននេះ