ក្រុមហ៊ុន Facebook មានបុគ្គលិកសរុបចំនួនប្រមាណ ៤៣,០៣០នាក់ដែលធ្វើការជុំវិញពិភពលោក ហើយក្នុងកំឡុងពេលដែលប្រទេសនីមួយៗប្រឈមមុខនឹងកូវីដ ១៩ នេះ Facebook ក៏បានសម្រេចចិត្តឲ្យបុគ្គលិកស្ទើរតែទាំងអស់ធ្វើការពីផ្ទះដែរ ។ ប៉ុន្តែកាលពីថ្ងៃព្រហស្បត្តិ៍កន្លងមកនេះលោក ម៉ាក ហ្សាក់កាបឺក (Mark Zuckerberg) ដែលជាស្ថាបនិក និងនាយកប្រតិបត្តិរបស់ក្រុមហ៊ុននេះបានប្រកាសពីគម្រោងការក្នុងការបើកដំណើរការក្រុមហ៊ុនសាជាថ្មីដែលមានដូចខាងក្រោមនេះ៖
១. ចាប់ផ្តើមយឺតៗ
បុគ្គលិកភាគច្រើនរបស់ Facebook អាចធ្វើការពីកន្លែងណាក៏បានដែរដូច្នេះលោក ហ្សាក់ កាបឺកមានគម្រោងចាប់ផ្តើមបើកដំណើរការក្រុមហ៊ុនវិញបន្តិចម្តងៗ ។ បុគ្គលិកភាគច្រើននឹងបន្តធ្វើការពីផ្ទះរហូតដល់ចុងខែឧសភាដើម្បីបង្កើតបរិស្ថានដែលមានសុវត្ថិភាពសម្រាប់មនុស្សដែលចាំបាច់ត្រូវទៅធ្វើការនៅក្រុមហ៊ុន និងអ្នកដទៃក្នុងសហគមន៍ ។
២. ផ្តល់អាទិភាពសម្រាប់ការងារមួយចំនួន
ទោះជាបុគ្គលិកភាគច្រើនអាចធ្វើការពីផ្ទះពិតមែនក្តី មានបុគ្គលិកមួយចំនួនមានភាពចាំបាច់ណាស់សម្រាប់ក្រុមហ៊ុនដូចជាអ្នកតាមដានការចែករំលែកទាក់ទិននឹងភេវរកម្ម ឬការសម្លាប់ខ្លួន ឬវិស្វករដែលធ្វើការជាមួយ Hardware ស្មុគស្មាញជាដើម ។
៣. ផ្តល់ការអនុគ្រោះមួយចំនួន
លោក ហ្សាក់ កាបឺក បានបញ្ជាក់ថា Facebook នឹងផ្តល់ការអនុគ្រោះជាច្រើនសម្រាប់មនុស្សដែលត្រូវការឧទាហរណ៍ដូចជាប្រសិនបើពួកគេមានបញ្ហាសុខភាព ឬមិនមានអ្នកមើលថែកូនៗនៅផ្ទះព្រោះតែសាលារៀនបិទដំណើរការមួយរយៈជាដើម ។
៤. ផ្អាកកម្មវិធី និងការធ្វើដំណើររបស់ Facebook
Facebook បានប្រកាសថាក្រុមហ៊ុននឹងហាមឃាត់រាល់ការធ្វើដំណើរសម្រាប់បំពេញការងាររហូតដល់ចុងខែមិថុនា និងផ្អាកកម្មវិធីដែលមានការចូលរួមច្រើនជាង ៥០នាក់រហូតដល់ខែមិថុនាឆ្នាំក្រោយផងដែរ ៕
ចែករំលែកព័តមាននេះ