ជំងឺដុះសាច់ច្រមុះបានស្តែងឱ្យដឹងតាមរយៈអាការៈមួយចំនួនដូចជា ហៀរសម្បោរ តឹងច្រមុះ ឬក៏មានតំណក់ទឹកភ្នែកជាប់នឹងផ្ទៃខាងក្នុងច្រមុះជាដើម ។ បើកូនតូចមានអាការៈ សង្ស័យថា មានដុះសាច់ច្រមុះ លោកអ្នកគួរនាំគេទៅពិគ្រោះជាមួយគ្រូពេទ្យជំនាញ ដើម្បីព្យាបាលឱ្យបានទាន់ពេលវេលាតាមឯកទេសរបស់គ្រូពេទ្យ ។
ជំងឺដុះសាច់ច្រមុះបានស្តែងឱ្យដឹងតាមរយៈអាការៈមួយចំនួនដូចជា ហៀរសម្បោរ តឹងច្រមុះ ឬក៏មានតំណក់ទឹកភ្នែកជាប់នឹងផ្ទៃខាងក្នុងច្រមុះជាដើម ។ បើកូនតូចមានអាការៈ សង្ស័យថា មានដុះសាច់ច្រមុះ លោកអ្នកគួរនាំគេទៅពិគ្រោះជាមួយគ្រូពេទ្យជំនាញ ដើម្បីព្យាបាលឱ្យបានទាន់ពេលវេលាតាមឯកទេសរបស់គ្រូពេទ្យ ។
ជួបជាមួយលោកវេជ្ជបណ្ឌិត ហុង សុខឃាង ឯកទេសជំងឺកុមារនៃមន្ទីរពេទ្យកុមារជាតិ បានប្រាប់កោះសន្តិភាពឱ្យដឹងថា ការដុះសាច់ច្រមុះ ជាប់នឹងផ្ទៃច្រមុះខាងក្នុងមានលក្ខណៈជាដុំសាច់ទន់ៗ ហើយមិនឈឺមានរាងដូចតំណក់ទឹកភ្នែក ឬកញ្ចុំផ្លៃទំពាំងបាយជូរ ។ ការដុះសាច់ច្រមុះនេះ គេពុំសូវឃើញកើតមាននៅលើក្មេងតូចៗទេ ប៉ុន្តែភាគច្រើនកើតមាននៅលើក្មេងធំ ឬមនុស្សចាស់ ។ ចំពោះរោគសញ្ញាដែលបង្ហាញឱ្យដឹងថា មានដុះសាច់ច្រមុះដូចជា៖ ហៀរសម្បោរ តឹងច្រមុះជាប់រហូតពុំមានពេលធូរស្បើយ មានស្លេស្ម៍ធ្លាក់ពីច្រមុះទៅក្នុងបំពង់ក មិនសូវដឹងក្លិន ឬបាត់បង់ការដឹងក្លិន មិនសូវដឹងរសជាតិ ឈឺលើផ្ទៃមុខ ឬឈឺក្បាល ឈឺធ្មេញជួរខាងលើ ធ្ងន់ក្បាល ដេកស្រមុក រមាស់ភ្នែក ឬច្រមុះជាដើម ។ ទាំងអស់នេះ សុទ្ធសឹងជារោគសញ្ញា ដែលបង្ហាញឱ្យដឹងថាជារោគសញ្ញាដុះសាច់ច្រមុះ ។
ចំពោះផលប៉ះពាល់នៃការដុះសាច់ច្រមុះនេះមានដូចជា៖
១-ស្ទះផ្លូវដង្ហើមមួយភ្លែតៗនៅពេលគេង
២-ងាយរលាកថង់ខ្យល់របស់ឆ្អឹងមុខ
៣-បង្កឱ្យជំងឺហឺតធ្វើទុក្ខខ្លាំង
៤-អាចបង្កទៅជារលាកស្រោមខួរក្បាល ។
ដើម្បីការពារការដុះសាច់ច្រមុះ ប្រសិនជាកូនរបស់លោកអ្នកមានជំងឺប្រតិកម្មច្រមុះ ឬជំងឺហឺតត្រូវនាំកូនទៅជួបជាមួយគ្រូពេទ្យជំនាញ ដើម្បីឱ្យគ្រូពេទ្យព្យាបាល និងគ្រប់គ្រងជំងឺនោះឱ្យបានទាន់ពេលវេលា កុំឱ្យវិវឌ្ឍន៍ទៅជាធ្ងន់ធ្ងរ ។ លោកអ្នកត្រូវការពារកូនៗកុំឱ្យប៉ះពាល់នូវសារធាតុមួយចំនួន ដែលធ្វើឱ្យឆួលច្រមុះ ដូចជាធូលីក្នុងផ្ទះ ផ្សែងបារីចំហាយ ផ្សែងប្រេងឥន្ធនៈ និងកម្ទេចកម្ទីល្អិតផ្សេងៗទៀត ។ មានអនាម័យល្អដោយការលាងដៃឱ្យបានស្អាតមុនកាន់ចាប់អាហារបរិភោគ ៕
ចែករំលែកព័តមាននេះ