រាជធានីភ្នំពេញ ៖ ផ្សែងខ្មៅហុយខ្មួលខ្មាញ់ពេញក្នុងបន្ទប់ដាក់សម្ភារៈចាស់ៗ បង្កការភ្ញាក់ផ្អើលដល់កម្មករ និងអ្នកមើលការខុសត្រូវនាំគ្នាទាញយកបំពង់ពន្លត់អគ្គិភ័យអន្តរាគមន៍បាញ់ពន្លត់ភ្លាមៗអស់ជាច្រើនបំពង់ និងទាក់ទងហៅរថយន្តពន្លត់អគ្គីភ័យមកជួយអន្តរាគមន៍បន្ថែមទៀត កាលពីវេលាម៉ោង៧និង៤០នាទីយប់ថ្ងៃទី២៤ ខែមិនា ឆ្នាំ២០២០ នៅចំណុចផ្ទះគ្មានលេខ ជាប់នឹងអគារកំពុងសាងសង់ ផ្លូវ២១៤ សង្កាត់បឹងរាំង ខណ្ឌដូនពេញ ។
យោងតាមប្រភពព័ត៌មានពីកម្មករនៅកន្លែងកើតហេតុបានប្រាប់អោយដឹងថា បន្ទប់ដែលអគ្គីភ័យឆាបឆេះនោះ មានទំហំ៤ម៉ែត្រ គុណនឹង៤ម៉ែត្រ ជាបន្ទប់ដាក់សម្ភារៈសំណង់ចាស់ៗ នៅជាន់ទី១ ក្រោមជណ្ដើរឡើងទៅជាន់លើ និងដាក់សម្ភារៈសំណង់ចាស់ៗមានដូចជា ក្រដាស ធុងជ័រ ក្តារកុងប្លាកេ និងស័ង្កសី ជាដើម ។ ចំពោះមូលហេតុដែលបណ្ដាលអោយមានការឆាបឆេះ នោះគឺបណ្តាលមកឆ្លងចរន្តអគ្គិសនី។
តាមប្រភពដដែលបានបន្តទៀត មុនពេលកើតហេតុ គេឃើញមានផ្សែងហុយខ្មួលខ្មាញ់ពេញក្នុងបន្ទប់កើតហេតុខាងលើចេញមកក្រៅ បង្កការភ្ញាក់ផ្អើលដល់កម្មករ និងអ្នកមើលការខុសត្រូវនៅទីតាំងកើតហេតុនាំគ្នាទាញបំពង់ពន្លត់អគ្គិភ័យបាញ់ពន្លត់ភ្លាមៗផងដែរប៉ុន្តែភ្លើងនៅមិនទាន់រលត់ ក៏បានរាយការណ៍ទៅសមត្ថកិច្ចមូលដ្ឋានទាក់ទងហៅរថយន្តពន្លត់អគ្គីភ័យស្នងការរាជធានីភ្នំពេញចេញរថយន្តមកជួយអន្តរាគមន៍ភ្លាមៗជាច្រើនគ្រឿង ។
នៅក្នុងប្រតិបត្តិការអន្តរាគមន៍បាញ់ពន្លត់ខាងលើនេះដែរ កម្លាំងជំនាញបង្ការ និងពន្លត់អគ្គីភ័យនៃស្នងការដ្ធាននគបាលរាជធានីបានប្រើប្រាស់រថយន្តពន្លត់អគ្គីភ័យអស់ចំនួនមួយគ្រឿង និងប្រើរយៈពេលពន្លត់អស់ជាងកន្លះម៉ោង ទើបភ្លើងរលត់ទៅវិញ ដោយមិនឆេះឆ្លងរាលដាលឡើយ។ ចំណែកសម្ភារៈដែលខូចខាតរួមមានបន្ទប់ដាក់អីវ៉ាន់ និងសម្ភារៈសំណង់មួយចំនួននៅក្នុងបន្ទប់ តែមិនបង្កឱ្យមនុស្សណាម្នាក់រងរងរបួសឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ