រាជធានីភ្នំពេញ ៖ រថយន្តកុងតឺន័រមួយគ្រឿងបើកជ្រុលចង្កូតទៅបុករថយន្តកូរ៉ូឡាបើកបញ្រ្ចាសទិសគ្នាពេញទំហឹង បណ្តាលឱ្យរថយន្តកូរ៉ូឡាខ្ទេចមួួយកំណាត់មុខទាំងស្រុង ចំណែករថយន្តកុងតឺន័រដាច់កង់មុខខាងឆ្វេង សំណាងល្អអ្នកបើកបរមិនមានរងរបួស ។ ហេតុការណ៍នេះកើតឡើងកាលពីវេលាម៉ោង ១០ យប់ ថ្ងៃទី ២០ កញ្ញា ២០១៤ នៅលើកំណាត់ផ្លូវជាតិលេខ៤ ស្ថិតក្នុងភូមិអូរឌឹម សង្កាត់ចោមចៅ ខណ្ឌពោធិ៍សែនជ័យ ។ម្ចាស់រថយន្តកូរ៉ូឡា ឈ្មោះ សោម ពៅ អាយុ៣៤ឆ្នាំ រស់នៅក្នុងសង្កាត់ចោមចៅ ខណ្ឌពោធ៍សែនជ័យ ។
ប្រភពព័ត៌មាននៅនឹងកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តកុងតឺន័រម៉ាក ហ្វ៊ុយហ្សួ មួួយគ្រឿង ពាក់ស្លាកលេខភ្នំពេញ 3B-6178 បើកបរដោយបុរសម្នាក់ក្នុងល្បឿនយ៉ាងលឿន តាមផ្លូវជាតិលេខ៤ ក្នុងទិសដៅពីលិច ទៅកើត ខណៈមកដល់ចំណុចកើតហេតុ ក៏ជ្រុលចង្កូតទៅបុកចំពីមុខពេញទំហឹងរថយន្តកូរ៉ូឡា ពណ៌ឈាមជ្រូក ពាក់ស្លាកលេខភ្នំពេញ 2G-2886 ដែលធ្វើដំណើរបញ្រ្ចាសទិសគ្នា បណ្តាលឱ្យរថយន្តកូរ៉ូឡាខ្ទេចមួយកំណាត់មុខទាំងស្រុង ចំណែករថយន្តកុងតឺន័រដាច់កង់មុខខាងឆ្វេង សំណាងល្អអ្នកបើកបរមិនមានរងរបួស ។
ក្រោយពេលកើតហេតុតៃកុងរថយន្តកុងតឺន័របានចុះពីលើរថយន្តរត់គេចខ្លួនបាត់ស្រមោល ចំណែករថយន្តទាំងពីរគ្រឿងត្រូវសមត្ថកិច្ចយកទៅរក្សាទុកនៅអធិការដ្ឋានខណ្ឌពោធិ៍សែនជ័យ រងចាំដោះស្រាយគ្នាតាមនិតិវិធីច្បាប់ ។
ចែករំលែកព័តមាននេះ