គូឡាឡាំពួរ ៖ រដ្ឋមន្ត្រីក្រសួងសុខាភិបាលម៉ាឡេស៊ី បានថ្លែងនារសៀលថ្ងៃទី១៨ ខែមីនានេះថា ម៉ាឡេស៊ីរកឃើញករណីអ្នកឆ្លង Covid-19 ចំនួន ១១៧ករណីបន្ថែមថ្មីទៀត ដែលនាំឲ្យចំនួនសរុប នៅក្នុងប្រទេសនេះ កើនដល់ ៧៩០នាក់ហើយ ។
លោក Datuk Seri Dr Adham Baba រដ្ឋមន្ត្រីក្រសួងសុខាភិបាល បានបញ្ជាក់ថា ៨០ករណីក្នុងចំណោម ១១៧ករណីថ្មី គឺបានទាក់ទងជាមួយនឹងការប្រមូលផ្តុំគ្នា នៅឯវិហារអ៊ីស្លាម នៅទីក្រុងគូឡាឡាំពួរ ក្នុងតំបន់ Jamek Sri Petaling Mosque ។
ក្រសួងសូមជម្រាបជូនថា ក្នុងចំណោមសរុប ៧៩០ករណី ដែលបានរាយការណ៍មកទល់ថ្ងៃនេះ មាន ៥១៣នាក់ ត្រូវបានទាក់ទងទៅនឹងនៅឯវិហារអ៊ីស្លាមខាងលើនេះ ។ ប៉ុន្តែនៅថ្ងៃនេះ គ្មានសេចក្តីរាយការណ៍ថាមានអ្នកជំងឺណាម្នាក់បានស្លាប់ទាក់ទងនឹង Covid-19 នោះទេ ពោលគឺរក្សា តួលេខចាស់ដដែល គឺស្លាប់២នាក់ ។
សូមជម្រាបថា នាយករដ្ឋមន្ត្រី Muhyiddin Yassin បានចេញបទបញ្ជាតឹងរឹងមួយ កាលពីថ្ងៃចន្ទថា ប្រទេសម៉ាឡេស៊ី នឹងបញ្ឈប់សកម្មភាពទាំងអស់ ដែលមិនចាំបាច់ សម្រាប់រយៈពេលពីរសប្តាហ៍ ចាប់ពីថ្ងៃទី១៨ ខែមីនា រហូតដល់ថ្ងៃទី៣១ ខែមីនា ដើម្បីបញ្ឈប់ការរីករាលដាល នៃវីរុស Covid-19 ទូទាំងប្រទេស ។ ក្រោមបទបញ្ជាគ្របដណ្ដប់លើប្រទេសម៉ាឡេស៊ីទាំងមូលនេះ រួមមានការហាមឃាត់ ការជួបជុំជាសាធារណៈ រួមមានព្រឹត្តិការណ៍ សាសនា កីឡា ព្រឹត្តិការណ៍សង្គម និងវប្បធម៌ លើកលែងតែផ្សារទំនើប ហាងទំនិញ ផ្សារ និងកន្លែងផ្សេងទៀតដែលលក់របស់របរប្រើប្រាស់ប្រចាំថ្ងៃ ឬរបស់របរដែលមនុស្សត្រូវការចាំបាច់ប្រចាំថ្ងៃរបស់ពួកគេ ៕
ចែករំលែកព័តមាននេះ