តារាចម្រៀងលោក នេន ទុំ បានគេចផុតពីហានិភ័យ ក្រោយពីជួបហេតុការណ៍គ្រោះថ្នាក់ចរាចរណ៍តាមបណ្តោយផ្លូវទៅខេត្តព្រះសីហនុ កាលពីរាត្រីថ្ងៃទី១១ ខែមីនា ខណៈមកដល់នៅចំណុចស្រុកព្រៃនប់ ដោយសារតែរថយន្តរបស់លោកបានបុកជាមួយនឹងសត្វក្របីមួយក្បាល។
ដំណឹងនៃគ្រោះថ្នាក់របស់ នេន ទុំ នេះ បានធ្វើឲ្យមហាជនមានការភ្ញាក់ផ្អើល ក្រោយពេលដែលមិត្តភក្កិរបស់លោកបានបង្ហោះរូបភាពរថយន្តរបស់លោកទទួលរងការខូចខាតយ៉ាងធ្ងន់ធ្ងរ។
មហាជនជាច្រើនបាននាំគ្នាសន្និដ្ឋានថា បើតាមមើលសភាពរថយន្ត នេន ទុំ អាចនឹងមានគ្រោះថ្នាក់ធ្ងន់ធ្ងរ រហូតអាយុជីវិតថែមទៀតផង ខណៈពេលដែលដំណឹងសុខទុក្ខរបស់លោកក្រោយជួបហេតុការណ៍នោះក៏មិនមានអ្នកណាអាចផ្តល់ភ្លាមៗដែរ។
យ៉ាងណាក្រោយហេតុការណ៍បានកើតឡើង ពោលគឺ១ថ្ងៃក្រោយគ្រោះថ្នាក់ចរាចរណ៍ នេន ទុំ បានចេញវីដេអូឃ្លីប បកស្រាយនូវហេតុការណ៍ និងបានធ្វើការបដិសេធចោលទាំងស្រុងនូវការលើកឡើងថា លោកមានរបួសធ្ងន់ធ្ងរ។
តាមរយៈវីដេអូឃ្លីបដែលបានបង្ហោះតាមបណ្តាញសង្គមហ្វេសប៊ុក នេន ទុំ បានអះអាងថា រូបលោក និងមិត្តភក្តិដែលបានរួមដំណើរជាមួយគ្នាទាំងអស់មិនមានគ្រោះថ្នាក់អ្វីធ្ងន់ធ្ងរឡើយ គ្រាន់តែហើមដៃតិចតួចប៉ុណ្ណោះ។
លោកបញ្ជាក់ថា ក្នុងការធ្វើដំណើរនេះលោក និងមិត្តភក្តិទាំងអស់មិនបានទទួលទានសុរានោះឡើយ ហើយពួកលោកបានដូរគ្នាបើកម្តងម្នាក់ ដោយរូបលោកជាអ្នកបើកចុងក្រោយ នៅពេលដែលជួបហេតុការណ៍បុកសត្វក្របីនោះ។
លោកបន្ថែមថា ពេលធ្វើដំណើរដល់ចំណុចយាយម៉ៅ លោកបានចុះទៅអុជធូបធម្មតា ហើយក៏សុំបើករថយន្តវិញ ដោយបើកក្នុងល្បឿនប្រមាណជា៨០ ហើយពេលនោះពួកយើងមិនបានឃើញសត្វក្របីនោះរត់មកទេ ដោយសារក្របីវាខ្មៅ រួមទាំងពេលយប់ផងនោះ។ ត្រង់ចំណុចជិតផ្លូវបំបែកព្រលានយន្តហោះ និងសល់ប្រមាណជា៣០គីឡូទៀតដល់ខេត្តព្រះសីហនុ គឺយើងជួបហេតុការណ៍នេះតែម្តង ដោយក្របីនោះបានលោតមកពីមុខឡានប្រមាណជា៣ទៅ៤ម៉ែត្រ។
លោកថា ដោយសារស្មារតីរឹងលោកបានខិតខំកាន់ដៃចង្កូត និងចាប់ហ្វ្រាំងគេចពីដើមឈើ ដោយសារតែក្របីបានបោលបុកវេក្បាល ជាមួយពោងដៃបានផ្ទុះចេញមក ហើយសំណាងយើងបានគេចផុតពីការប៉ះទង្គិចរថយន្តមួយគ្រឿងដែលយើងបានរេចូលគន្លងផ្លូវគេ។
យ៉ាងណា បន្ទាប់ពីជួបហេតុការណ៍នោះហើយ លោកពិតជាសម្តែងការកោតសរសើរ និងអរគុណដល់សមត្ថិកិច្ចនៅទីនោះ ដែលបានខ្នះខ្នែងយ៉ាងខ្លាំងក្នុងការជួយរូបលោក និងមិត្តភក្តិលោកទាំងអស់ ជាមួយនឹងការជូនទៅពេទ្យ និងស្ទូចរថយន្តមកភ្នំពេញ។
លោកក៏បានថ្លែងអំណរគុណផងដែរ ដល់ទស្សនិកជនទាំងអស់ដែលបានព្រួយបាម្ភពីសុខទុក្ខរបស់លោក និងបានសួរនាំយ៉ាងច្រើន តែលោកសូមទោសដែលមិនបានឆ្លើយតបទាន់ពេលវេលា ដោយសារលោកនៅមានភាពតក់ស្លុត និងមិនដឹងនិយាយពីណាទៅណា។
បើតាមលោក នេន ទុំ ក្រោយជួបហេតុការណ៍នេះ លោកក៏បានសូមអំពាវនាវដល់ម្ចាស់ដែលមានគោ ក្របី សូមយកចិត្តទុកថែរក្សាឲ្យជាប់ជៀសវាងដើរឆ្វេលឆ្វាច និងសូមចូលរួមបើកបរដោយប្រុងប្រយ័ត្នទាំងអស់គ្នា ដើម្បីបញ្ចៀសពីគ្រោះថ្នាក់ចរាចរណ៍៕ (កែសម្រួលដោយ ៖ បុប្ផា)
ចែករំលែកព័តមាននេះ