មន្ត្រីសុខាភិបាលមួយរូបក្នុងប្រទេសថៃ បាននិយាយកាលពីព្រឹកថ្ងៃពុធ (១១ មីនានេះ) ថា មន្ត្រីអន្តោប្រវេសន៍ ២នាក់ នៅព្រលានយន្តហោះទីក្រុងបាងកក មានផ្ទុកវីរុស Covid-19…
មន្ត្រីសុខាភិបាលមួយរូបក្នុងប្រទេសថៃ បាននិយាយកាលពីព្រឹកថ្ងៃពុធ (១១ មីនានេះ) ថា មន្ត្រីអន្តោប្រវេសន៍ ២នាក់ នៅព្រលានយន្តហោះទីក្រុងបាងកក មានផ្ទុកវីរុស Covid-19 ហើយប្រហែលជាបានត្រួតពិនិត្យលិខិតឆ្លងដែនរបស់អ្នកទេសចរមកកាន់ប្រទេសថៃផងដែរ នេះបើតាមការចុះផ្សាយពី Channel News Asia ។
បុរសទាំង២នាក់ ដែលកំពុងធ្វើការនៅអាកាសយានដ្ឋានសុវណ្ណភូមិ បានធ្លាក់ខ្លួនឈឺនៅថ្ងៃទី៧ និង៨ ខែមីនា ហើយបានមានទំនាក់ទំនងជាមួយអ្នកដំណើរ ដែលបានមកដល់អាកាសយានដ្ឋាននេះក្នុងប៉ុន្មានថ្ងៃកន្លងមក មុនពេលធ្វើរោគវិនិច្ឆ័យ ។
មន្ត្រីម្នាក់ក្នុងចំណោមក្រុមមន្ត្រីទាំងនោះ ស្ថិតក្នុងចំណោមក្រុមដែលដឹកនាំការតាមដានសុខភាព របស់ក្រុមអ្នកដំណើរថៃ មកពីប្រទេសកូរ៉េខាងត្បូង ដែលជាកន្លែងឆ្លងវីរុសនេះច្រើនជាងគេលំដាប់ទី២នៅអាស៊ី បន្ទាប់ពីប្រទេសចិន ។
លោក សុផុន អ៊ីសឺរីរិនថន ប្រធាននាយកដ្ឋានគ្រប់គ្រងជំងឺរបស់ថៃ បានមានប្រសាសន៍ថា «ពួកគេមិនបានធ្វើការនៅកន្លែងតែមួយនោះទេ។ ពួកគេមានឱកាសទំនាក់ទំនងជាមួយជនបរទេស ឬប៉ះផ្ទាល់លិខិតឆ្លងដែន» ។
រដ្ឋមន្ត្រីក្រសួងមហាផ្ទៃថៃ បានចេញមកនិយាយកាលពីព្រឹកថ្ងៃពុធថា ខ្លួននឹងផ្អាកការមកដល់របស់ភ្ញៀវទេសចរណ៍ ដោយមិនចាំបាច់មានទិដ្ឋាការពីប្រទេសកូរ៉េខាងត្បូង ហុងកុង និងអ៊ីតាលី រួមទាំងប្រទេសចំនួន១៨ផ្សេងទៀត ក្នុងនោះរួមមានចិន និងឥណ្ឌាផងដែរ។
អ្នកទេសចរដែលរងផលប៉ះពាល់ទាំងអស់ ត្រូវដាក់ពាក្យសុំទិដ្ឋាការនៅឯស្ថានទូតថៃក្នុងប្រទេសរបស់ពួកគេ ហើយបង្ហាញលិខិតបញ្ជាក់ពីវេជ្ជសាស្ត្រផងដែរ។
ប្រទេសថៃបានរាយការណ៍ថា មានករណីឆ្លងវីរុសថ្មីចំនួន ៥៩ករណី ប៉ុន្តែមានការព្រួយបារម្ភថា តួលេខទាបអាចជាការឆ្លុះបញ្ចាំងពីកម្មវិធីនៃការតេស្តមានកំណត់។
សូមបញ្ជាក់ ក្រុមហ៊ុនអាកាសចរណ៍ Thai Airways បាននិយាយកាលពីថ្ងៃសុក្រថា ខ្លួននឹងផ្អាករាល់ជើងហោះហើរទាំងអស់ទៅកាន់ប្រទេសអ៊ីតាលី ដែលមានមនុស្សជាង ៦៣០នាក់បានស្លាប់ និងអ្នកឆ្លងប្រហែលជាជាង ១០.០០០នាក់ ៕
ចែករំលែកព័តមាននេះ