ខេត្តកំពង់ចាម ៖ «សូមបងប្អូនប្រជាពលរដ្ឋត្រូវតែរួមគ្នាគោរពច្បាប់ចរាចរណ៍រាល់ពេលជិះម៉ូតូត្រូវពាក់មួកសុវត្ថិភាព ព្រោះថាគ្រោះថ្នាក់ចរាចរណ៍ដែលបានកើតឡើងកន្លងមកក្នុងនោះអ្នកបាត់បង់ជីវិតមានចំនួន៧០% គឺមិនបានពាក់មួកសុវត្ថិភាពនោះទេ» ។ នេះជាការក្រើនរំលឹករបស់លោកអ៊ុន ចាន់ដា ប្រធានគណៈកម្មាធិការសាខាកាកបាទក្រហមខេត្តកំពង់ចាម និងជាអភិបាលខេត្តកំពង់ចាម បានថ្លែងកាលពីព្រឹកថ្ងៃទី ២៨កុម្ភៈ ២០២០ ក្នុងឱកាសចុះចែកអំណោយជូនដល់ប្រជាពលរដ្ឋក្រីក្រចំនួន១៣៩ គ្រួសារនៅវត្តស្ដើងជ័យ ឃុំស្តើងជ័យ ស្រុកជើងព្រៃ។
ក្នុងកិច្ចសំណេះសំណាលនោះលោកអ៊ុន ចាន់ដា ប្រធានគណៈកម្មាធិការសាខាកាក បាទក្រហមខេត្ត បានលើកឡើងថា សម្រាប់អំណោយដែលមកចែកជូនដល់លោកតា លោកយាយ នាឱកាសនេះគឺមិនប្រកាន់និន្នាការនយោបាយ ពណ៌សម្បុរ ឬសាសនានោះទេហើយអ្នកដែលអញ្ជើញមក គឺសុទ្ធសឹងតែមានជីវភាពខ្វះខាតនិងក្រីក្រ។
លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមខេត្តមានប្រសាសន៍បន្តថា អាជ្ញាធរមូលដ្ឋានបានរាយការណ៍ពីកង្វះខាតរបស់បងប្អូននៅទីនេះទៅថ្នាក់ស្រុកឲ្យបានដឹងនឹងបន្តមកថ្នាក់ខេត្ត។
សូមបញ្ជាក់ថា លោក ម៉ា ឈឿន និងលោក វេង សាខុន បានខិតខំរួមគ្នាដោះស្រាយតាមសំណើររបស់ប្រជាពលរដ្ឋមានជាហូរហែនៅក្នុងស្រុកជើងព្រៃតាមរយៈវេទិកាសាធារណៈ។ អំណោយទាំងនេះជារបស់កបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន តែងតែណែនាំដល់អ្នកនៅតាមមូលដ្ឋានត្រូវតែខិតខំដោះស្រាយធ្វើយ៉ាងណាឱ្យជីវភាពរបស់ប្រជាពលរដ្ឋកាន់តែប្រសើរឡើង។
នៅចុងរដូវនេះបងប្អូនប្រជាកសិករបានជួបនូវបញ្ហាគ្រោះរាំងស្ងួតហើយផលស្រូវដែលទទួលបានក៏មិនជាច្រើនប៉ុន្មានដែរ ក្នុងនោះក៏មានអ្នកខ្លះទទួលទានមិនបានគ្រប់គ្រាន់នោះទេ។ ដោយមើលឃើញនៅការលំបាកបែបនេះហើយទើបសាខាកាកបាទក្រហមកម្ពុជាខេត្តកំពង់ចាម បានរៀបចំអំណោយចុះមកចែកជូនដល់ប្រជាពលរដ្ឋមកពីស្រម៉៩៨ គ្រួសារ និងស្ដើងជ័យ៤១គ្រួសារ។
លោកអ៊ុន ចាន់ដា បានបញ្ជាក់ថា នៅឆ្នាំ២០២២ ខាងមុខនិងមានការរៀបចំបោះឆ្នោតឃុំសង្កាត់ សូមបងប្អូនមេត្តានាំគ្នាទៅបោះឆ្នោតជូនមេឃុំឬចៅសង្កាត់ជាគណបក្សរបស់ប្រជាជនកម្ពុជា ដើម្បីរួមចំណែកជួយស្ដារនិងការអភិវឌ្ឍនៅមូលដ្ឋានឲ្យទទួលបានការរីកចម្រើនបន្តទៀត។
មួយចំណុចទៀតប្រសិនបើចង់សាងសង់ផ្ទះឬធ្វើអ្វីមួយសូមនាំគ្នាមកដាក់ពាក្យនៅការិយាល័យច្រកចេញចូលតែមួយនៅសាលាស្រុកជើងព្រៃ ដែលមានមន្ត្រីរងចាំបម្រើការងារជូនដល់ប្រជាពលរដ្ឋដោយរាក់ទាក់និងឆាប់រហ័សហើយក៏ជាផ្នែកមួយបំបាត់នូវអំពើពុករលួយផងដែរ។ ដើម្បីឲ្យភូមិឃុំមានសុវត្ថិភាពល្អប្រសិនណាបើបានឃើញពីសកម្មភាពបើកលេងតែងស៊ីសង ឬគ្រឿងញៀន សូមប្រញាប់រាយការណ៍មកសមត្ថកិច្ចជាបន្ទាន់ ដើម្បីមានវិធានការចុះបង្ក្រាប។ ក្នុងរដូវប្រាំងអាកាសធាតុក្តៅសូមលោកតា លោកយាយប្រកាន់យក «ហូបស្អាត ផឹកស្អាត រស់នៅស្អាត» ហើយប្រសិនបើមានបញ្ហាសុខភាពឈឺដោយប្រការណាមួយសូមប្រញាប់ទៅកាន់មណ្ឌលសុខ ភាពឬក៏មន្ទីរពេទ្យដែលស្ថិតនៅកៀកនឹងលំនៅឋាន។
សម្រាប់អំណោយដែលចែកជូននាឱកាសនោះក្នុង១គ្រួសារទទួលបានអង្ករ៥០គីឡូក្រាម ទឹកស៊ីអុីវ១យួរត្រីខ១យួរ ថវិកាចំនួន៣ម៉ឺនរៀល ។ ដោយឡែកក្មេងពិការម្នាក់នៅស្រម៉ ត្រូវបានឧបត្ថម្ភថវិការ៦០ម៉ឺនរៀល។ ជាមួយនោះប្រគេនចៅអធិការវត្តស្ដើងជ័យ អង្ករ១០០គីឡូក្រាម មី២កេះ និងថវិកា៥០ម៉ឺនរៀលផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ