រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អ្នករស់នៅក្នុងរាជធានីភ្នំពេញ ដែលភាគច្រើនប្រើប្រាស់រថយន្តទំនើបៗ គឺតែងតែជួបគ្រោះថ្នាក់ ដោយត្រូវក្រុមចោរលួចកាច់កញ្ចក់ចំហៀងមើលក្រោយ ។ ដូច្នេះពេលនេះ សមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អ្នករស់នៅក្នុងរាជធានីភ្នំពេញ ដែលភាគច្រើនប្រើប្រាស់រថយន្តទំនើបៗ គឺតែងតែជួបគ្រោះថ្នាក់ ដោយត្រូវក្រុមចោរលួចកាច់កញ្ចក់ចំហៀងមើលក្រោយ ។ ដូច្នេះពេលនេះ សមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ បានបង្ហាញមុខក្រុមជនសង្ស័យជាចោរកាច់កញ្ចក់រថយន្ត២នាក់ ដើម្បីឲ្យជនរងគ្រោះបានមើញ និងចំណាំមុខ ព្រោះពួកគេជាប់គុកក៏មិនយូរទេ ហើយចេញមកវិញ នៅតែប្រកបមុខរបរនេះដដែល ។
សូមបញ្ជាក់ថា កាលពីថ្ងៃទី២៤ ខែកុម្ភៈ ឆ្នាំ២០២០ កម្លាំងសមត្ថកិច្ចនគរបាលការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ បានស្រាវជ្រាវ និងឈានដល់ការឃាត់ខ្លួនបានជនសង្ស័យ២នាក់ ពាក់ព័ន្ធបទល្មើស.លួច (កាច់កញ្ចក់ចំហៀងខាងស្តាំរថយន្តម៉ាក TOYOTA LEXUS NX 200T គ្មានស្លាកលេខ) ប្រព្រឹត្តនៅចំណុចមុខផ្ទះ៨ដេអឺ០ ផ្លូវលេខ៣៣៨ ភូមិ៤ សង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ កាលពីថ្ងៃទី២១ ខែកុម្ភៈ ម៉ោង៦និង៤៧នាទីព្រលប់ ។
ជនសង្ស័យខាងលើ គឺ១-ឈ្មោះ អៃ ដារ៉ា ហៅ រិទ្ធ ភេទប្រុស អាយុ៣៥ ឆ្នាំ មុខរបរ ស្នាក់នៅមិនពិតប្រាកដ ឃាត់ខ្លួននៅផ្ទះសំណាក់មិនចាំយីហោ ផ្ទះលេខ៩៥ ផ្លូវលេខ៨១ ភូមិ១០ សង្កាត់បឹងរាំង ខណ្ឌដូនពេញ និង២-ឈ្មោះ មាស ធីចំរើន ហៅ ប៊ុណ្ណា ភេទប្រុស អាយុ៣៥ឆ្នាំ មុខរបររត់ម៉ូតូកង់៣ឥណ្ឌា ស្នាក់នៅផ្ទះលេខ១១៨ ផ្លូវលេខ៣៤៨ ក្រុម៤ សង្កាត់ទួលស្វាយព្រៃ២ ខណ្ឌបឹងកេងកង ហើយត្រូវឃាត់ខ្លួនបាននៅចំណុចផ្លូវលេខ១៩៣ កែងផ្លូវ៣៤៨ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
សូមបញ្ជាក់ទៀតថា វត្ថុតាងដែលចាប់មានមួកប៉ារេ ពណ៌កាហ្វេ ចំនួន១, កាំបិតតាំងតោធ្វើពីអ៊ីណុក ពណ៌ស ដងឈើ, ម៉ូតូកង់បី ពណ៌ស ១គ្រឿង ។ រីឯជនរងគ្រោះឈ្មោះ ប៉ូច នរ៉ា ភេទប្រុស អាយុ២៥ឆ្នាំ ស្នាក់នៅផ្ទះ៨ដេអឺ០ ផ្លូវលេខ៣៣៨ ភូមិ៤ សង្កាត់ទួលស្វាយព្រៃ១ ខណ្ឌបឹងកេងកង ហើយជនរងគ្រោះបាត់បង់សម្ភារៈដូចជាកញ្ចក់ចំហៀងខាងស្តាំរថយន្ត។
ទាក់ទិនករណីឃាត់ខ្លួន ក្រុមជនសង្ស័យជាចោរកាច់កញ្ចក់រថយន្តខាងលើនេះ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានថ្លែងឲ្យដឹងថា កិច្ចប្រតិបត្តិការបង្ក្រាបក្រុមកាច់កញ្ចក់រថយន្ត គឺធ្វើឡើងតាមការស្រាវជ្រាវ និងឆែកមើលតាមកាមេរ៉ាសុវត្ថិភាព ដែលក្រុមចោរបានធ្វើសកម្មភាពទៅលើជនរងគ្រោះ ។ ជនសង្ស័យ និងវត្ថុតាង សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ