ខេត្តស្វាយរៀង ៖ កាលពីវេលាម៉ោង១០ព្រឹកថ្ងៃទី២៣ ខែកុម្ភៈ ឆ្នាំ២០២០ មានករណីភ្លើងឆេះចម្ការអំពៅរបស់ក្រុមហ៊ុនសុផាតសំណាងអស់ចំនួន២៥ហិកតាដែលស្ថិតនៅក្នុងភូមិបាត់ ថង់ឃុំគគីរសោម ស្រុកស្វាយទាប ខេត្តស្វាយរៀង។ បើតាមមន្ត្រីនគបាលប៉ុស្ត៍រដ្ឋបាលឃុំគគីរសោមបានឲ្យដឹងថា…
ខេត្តស្វាយរៀង ៖ កាលពីវេលាម៉ោង១០ព្រឹកថ្ងៃទី២៣ ខែកុម្ភៈ ឆ្នាំ២០២០ មានករណីភ្លើងឆេះចម្ការអំពៅរបស់ក្រុមហ៊ុនសុផាតសំណាងអស់ចំនួន២៥ហិកតាដែលស្ថិតនៅក្នុងភូមិបាត់ ថង់ឃុំគគីរសោម ស្រុកស្វាយទាប ខេត្តស្វាយរៀង។
បើតាមមន្ត្រីនគបាលប៉ុស្ត៍រដ្ឋបាលឃុំគគីរសោមបានឲ្យដឹងថា ចំការអំពៅស្ករក្រុមហ៊ុនសុផាតសំណាងនេះត្រូវភ្លើងឆេះអស់ចំនួន២៥ហិកតា ហើយត្រូវបានក្រុមហ៊ុនពន្លត់ភ្លើងរលត់ទៅវិញនៅវេលាម៉ោង១០និង៤៣នាទីព្រឹក ។
នៅដើមខែកុម្ភៈ ឆ្នាំ២០២០កន្លងទៅគឺភ្លើងឆេះអស់៨៣ហិកតា ហើយក្រុមហ៊ុនដាក់ការសង្ស័យនិងចោទថា មូលហេតុមកពីជនមិនស្គាល់មុខលួចដុត។ នៅថ្ងៃទី២៣ កុម្ភៈនេះភ្លើងឆេះអស់២៥ហិកតាទៀត និងប្តឹងសមត្ថកិច្ចថា មូលហេតុជនមិនស្គាល់មុខលួចដុត ហើយបានសុំឲ្យអាជ្ញាធរផ្តល់ច្បាប់អនុញ្ញាតកាប់ប្រមូលផលដើម្បីកុំឲ្យខូចគុណភាពស្ករ។
ទាក់ទិននឹងករណីភ្លើងឆេះចំការអំពៅខាងលើនេះដែរ មានមន្ត្រីអាជ្ញាធរម្នាក់បានបង្ហើបឲ្យដឹងថា ការពិតចំការអំពៅស្ករនៃក្រុមហ៊ុនសុផាតសំណាងនេះគឺគ្រាន់តែមានច្បាប់អនុញ្ញាត ចំពោះការដាំដុះគឺជាក្រុមហ៊ុនវៀតណាមជាអ្នកដាំថែទាំ និងប្រមូលផលនាំទៅប្រទេសវៀតណាមដោយខ្លួនឯង ។ ក្រុមហ៊ុនខ្មែរសុផាតសំណាងគ្រាន់តែជាអ្នកជួលដីពីប្រជាពលរដ្ឋ រួចក្រុមហ៊ុនវៀតណាមជាអ្នកជួលដីបន្តពីក្រុមហ៊ុនសុផាតសំណាងដើម្បីដាំអំពៅស្ករ លុះពេលប្រមូលផលគឺតម្រូវឲ្យក្រុមហ៊ុនសុផាតសំណាងជាអ្នកសុំច្បាប់អនុញ្ញាតពីអាជ្ញាធរខេត្ត ដើម្បីប្រមូលផលអំពៅនាំចេញទៅប្រទេសវៀតណាម។
រាល់ពេលដែលអំពៅត្រូវប្រមូលផលតែងតែមានករណីមនុស្សលួចដុតចំការអំពៅ ហើយវៀតណាមតែងតែឲ្យក្រុមហ៊ុនខ្មែរសុំច្បាប់ប្រមូលផល និងនាំចេញទៅវៀតណាម បើយឺតយ៉ាវអំពៅត្រូវខូច និងថយគុណភាពស្កររោងចក្រមិនទទួលទិញឬឲ្យតម្លៃថោក។
ចំណែកអ្នកលួចដុត ត្រូវបានសមត្ថកិចមិនដែលរកមុខសញ្ញាយកមកផ្តន្ទាទោសបានទេ រីឯអំពៅគឺអាជ្ញាធរតែងតែអនុញ្ញាតច្បាប់នាំចេញទៅប្រទេសវៀតណាមបានទាន់ពេលរាល់លើកដែរ ទើបមហាជនមួយចំនួនដាក់ចម្ងល់ចង់ដឹងការពិត តើមានរឿងអ្វីពិតប្រាកដ ក៏ប៉ុន្តែចំការអំពៅគឺត្រូវភ្លើងឆេះខូចចោលតែម្តង៕ (កែសម្រួលដោយ ៖ ធីតា)
ចែករំលែកព័តមាននេះ