ថ្ងៃនេះ តំណាងអយ្យការសម្រេចហើយ រឿងថៃ ស្រីនាង ថតវីដេអូសិចស៊ី(វីដេអូ)
- ភ្នំពេញ
រាជធានីភ្នំពេញ ៖ សេចក្តីរាយការណ៍បឋមឲ្យដឹងថា នាព្រឹកថ្ងៃទី២១ ខែកុម្ភៈ ឆ្នាំ២០២០ នេះ លោក គុជ គឹមឡុង…
រាជធានីភ្នំពេញ ៖ សេចក្តីរាយការណ៍បឋមឲ្យដឹងថា នាព្រឹកថ្ងៃទី២១ ខែកុម្ភៈ ឆ្នាំ២០២០ នេះ លោក គុជ គឹមឡុង ព្រះរាជអាជ្ញារអមសាលាដំបូងរាជធានីភ្នំពេញ ដែលកាន់សំណុំរឿងអ្នកស្រី វ៉ែន រចនា ហៅ ថៃ ស្រីនាង បានសម្រេចធ្វើការចោទប្រកាន់លើ ថៃ ស្រីនាង ជាផ្លូវការហើយ ។
លោក គុជ គឹមឡុង ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ បានថ្លែងឲ្យដឹងថា ក្រោយពីតំណាងអយ្យការបើកការសាកសួរ អ្នកស្រី ថៃ ស្រីនាង ត្រូវបានសម្រេចធ្វើការចោទប្រកាន់តាមមាត្រា៣៨ និងមាត្រា៣៩ ច្បាប់ស្តីពីការធ្វើអាជីវកម្មផ្លូវភេទ និងមាត្រា២៤៩ នៃក្រមព្រហ្មទណ្ឌ ច្បាប់ស្តីពីការបង្ហាញកេរ្តិ៍ភេទដែលនាំឲ្យអ្នកដទៃមើលឃើញនៅក្នុងទីកន្លែងមួយដែលសាធារណជនអាចមើលឃើញ ដែលបទល្មើសនេះតម្រូវឲ្យផ្តន្ទាទោលើជនជាប់ចោទដាក់ពន្ធនាគារចាប់ពី ១ខែ ទៅ១ឆ្នាំ ។
បន្ទាប់ពីតំណាងងអយ្យការចោទបានធ្វើប្រកាន់ជាផ្លូវការហើយនោះ សំណុំរឿងនេះបានចាត់បញ្ជូនទៅចៅក្រមស៊ើបសួររួច ដើម្បីសម្រេចឃុំខ្លួន ឬមិនឃុំខ្លួនជាឆន្ទានុសិទ្ធិរបស់លោកចៅក្រមនោះ ។ ប៉ុន្តែទោះជាយ៉ាងណា គិតត្រឹមម៉ោង៦និង៣០នាទីយប់ ថ្ងៃទី២០ ខែកុម្ភៈ លោក គុជ គឹមឡុង ព្រះរាជអាជ្ញារង បានបញ្ចប់ការសាកសួរបឋមនោះ ហើយតំណាងអយ្យក៏បានផ្ញើ ថៃ ស្រីនាង ទៅសមត្ថកិច្ចវិញ នឹងតម្រូវឲ្យព្រឹកថ្ងៃទី២១ ខែកម្ភៈ យកមកសាកសួរម្តងទៀត ។
នារសៀលថ្ងៃទី២០ ខែកុម្ភៈ កម្លាំងសមត្ថកិច្ចនគរបាលខណ្ឌទួលគោក បានបញ្ជូនអ្នកស្រី វ៉ែន រចនា ហៅ ថៃ ស្រីនាង អ្នកលក់ផលិតផលតាមអនឡាញមិនគិតពីកេរ្តិ៍ខ្មាស់ ទៅកាន់សាលាដំបូងរាជធានីភ្នំពេញ ពាក់ព័ន្ធបទល្មើស ផុសរូបភាព និង សម្ភារៈអាសអាភាស ស្តីពីការបង្ហាញកេរ្ត៍ភេទ ដែលនាំឲ្យអ្នកដទៃ និងសាធារណជនមើលឃើញ ដែលសំណុំរឿងនេះក៏បានស្ថិតនៅដៃលោក គុជ គឹមឡុង ព្រះរាជអាជ្ញារង ។
គួបញ្ជាក់ថា កាលពីថ្ងៃទី១៨ ខែកុម្ភៈ អ្នកស្រី ថៃ ស្រីនាង ត្រូវបានកម្លាំងសមត្ថកិច្ចនគរបាលខណ្ឌទួលគោក នាំខ្លួនទៅធ្វើការអប់រំ ណែនាំ និងឲ្យធ្វើកិច្ចសន្យាចំពោះមុខ ដើម្បីទទួលកំហុសឆ្គង ដែលគេបានផុសរូបភាព និងវីដេអូឃ្លីប តាមសង្គមហ្វេសប៊ុក ធ្វើឲ្យប៉ះពាល់ដល់ទំនៀមទម្លាប់ប្រពៃណីខ្មែរ ជាពិសេសធ្វើប៉ះពាល់យ៉ាងធ្ងន់ធ្ងរដល់កិត្តិយសរបស់ស្ត្រីទៀតផង ។ ហើយ ថៃ ស្រីនាង ក៏បានយល់ព្រមថតជាវីដេអូឡាយ ដើម្បីសុំទោសសាធារណជន នូវកំហុសខុសឆ្គងទាំងឡាយនោះ ។
បន្ទាប់ពីធ្វើកិច្ចសន្យា និងសារភាពកំហុសរួចហើយ នៅម៉ោង១១និង៣០នាទីព្រឹក សមត្ថកិច្ចបានអនុញ្ញាតអ្នកស្រីត្រឡប់ទៅផ្ទះវិញ ។ លុះស្រាប់តែម៉ោង២និង៣៥នាទីរសៀលថ្ងៃដដែលនោះ ថៃ ស្រីនាង នៅតែមិនរាងចាល ថែមទាំងផុសរូបអាក្រាតកាយ ស្លៀកពាក់សល់តែអាវទ្រនាប់ និងខោលីអូ បង្ហោះឌឺដងថែមទៀត ។
ដោយយល់ឃើញ ថៃ ស្រីនាង នៅតែប្រព្រឹត្តបទល្មើសម្តងហើយម្តងទៀត មិនគោរពកិច្ចសន្យា លោក កែវ សុធា ព្រះរាជអាជ្ញាអមសាលាដំបូងរាជធានីភ្នំពេញ បានបញ្ជាឲ្យកម្លាំងមានសមត្ថកិច្ចធ្វើការឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់តែម្តងទៅ ។ ហើយបើតាមអ្នកសង្កេតការបានពិនិត្យមើលទំហំបទល្មើសដែលតំណាងអយ្យការ បានធ្វើការចោទប្រកាន់នោះ ថៃ ស្រីនាង ទំនងមិនអាចគេចផុតពីការឃុំខ្លួនដាក់ពន្ធនាគារជាបណ្តោះអាសន្ននោះទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ