ខេត្តព្រះសីហនុ ៖ នៅសាលប្រជុំសាលាខេត្តព្រះសីហនុ កាលពីព្រឹកថ្ងៃទី១២ កុម្ភៈ លោកគួច ចំរើន អភិបាលនៃគណ:អភិបាលខេត្តព្រះសីហនុ បានដឹកនាំកិច្ចប្រជុំដើម្បីពិនិត្យលើសំណើសុំអនុញ្ញាត និងការគាំទ្រគោលការណ៍ដល់ការងារជួសជុល កែលំអ និងពង្រីកឆ្នេរខ្សាច់លំហែកាយ កោះពស់ ដោយមានការចូលរួមពីអស់លោកប្រធានមន្ទីរពាក់ព័ន្ធ អាជ្ញាធរសង្កាត់ ក្រុង និងការយាល័យជំនាញចំណុះសាលាខេត្តព្រះសីហនុផងដែរ ។
លោក Karkov Pavel ជាតំណាងក្រុមហ៊ុនចង់អភិវឌ្ឍឆ្នេរបានឲ្យដឹងថា គម្រោងអភិវឌ្ឍន៍កោះពស់លើផ្ទៃដីដែលមានទំហំ១១៦ហិកតា ។ បន្ទាប់ពីទទួលបានការអនុញ្ញាតអភិវឌ្ឍពីរាជរដ្ឋាភិបាលកម្ពុជា បានសាងសង់ស្ពានឆ្លងសមុទ្រប្រវែង៩០០ម៉ែត្រ និងសាងសង់ហេដ្ឋារចនាសម្ព័ន្ធលើកោះពស់ មានដូចជា ផ្លូវបេតុងបាន៦០ភាគរយ នៃផ្លូវប្រវែងជាង ៥គីឡូម៉ែត្រ និងហេដ្ឋារចនាសម្ពន្ធ័ភូមិគ្រឹះ៣៦កន្លែង ក៏ប៉ុន្តែមកដល់បច្ចុប្បន្ន ក៏បានសាងសង់ភូមិគ្រឹះបាន១៨ហើយ ។
ទន្ទឹមនោះ បានរក្សាព្រៃឈើនៅលើកោះពស់ឱ្យបាន៦០% ព្រមទាំងបានរៀបចំប្រព័ន្ធទឹកស្អាត ប្រព័ន្ធភ្លើងហើយរួចរាល់ ក្រៅពីប្រព័ន្ធផ្លូវមេក៏បានសាងសង់ផ្លូវតូចៗជាច្រើនខ្សែទៀតនៅលើកោះ ។ ការអភិវឌ្ឍន៍នៅលើកោះពស់ គឺដើម្បីបំរើសេវាទេសចរណ៍ ម្យ៉ាងទៀតការសុំអភិវឌ្ឍកែលំអឆ្នេរកម្សាន្ត មានប្រវែង៨៥០ម៉ែត្រ ទទឹងពី៣០ទៅ៣៥ម៉ែត្រ ដើម្បីបំរើឱ្យវិស័យទេសចរណ៍ផងដែរ ។
លោក គួច ចំរើន អភិបាលខេត្តព្រះសីហនុ បានធ្វើការណែនាំមកវិញថា នៅកោះពស់ ទី១-នៅថ្ងៃទី២២ កុម្ភៈខាងមុខនេះ រដ្ឋបាលខេត្តព្រះសីហនុ និងដឹកនាំមន្ត្រីជំនាញចុះពិនិត្យពីស្ថានភាព នៃការអភិវឌ្ឍនាពេលបច្ចុប្បន្ន ដើម្បីបញ្ជាក់ភាពជាក់ច្បាស់, និងទី២-ក្រុមហ៊ុនដែលអភិវឌ្ឍន៍ ត្រូវធ្វើផែនការមេឱ្យខាងតែបាន បើមានផែនការមេ រដ្ឋបាលខេត្តគាំទ្រនិងឯកភាពដោយផ្អែកតាមផែនការមេ គោរពទៅតាមបទដ្ឋានបច្ចេកទេស ដែលទទួលស្គាល់ដោយមន្ត្រីមន្ទីរនិងស្ថាប័នជំនាញ ។
ចែករំលែកព័តមាននេះ