ខេត្តព្រះសីហនុ ៖ នាព្រឹកថ្ងៃទី៥ ខែកុម្ភៈ ឆ្នាំ២០២០ នៅសាលាខេត្តព្រះសីហនុ មន្ទីរទេសចរណ៍ខេត្តព្រះសីហនុបានបើកកិច្ចប្រជុំដើម្បីធ្វើបទបង្ហាញ ស្តីពីការគ្រប់គ្រងនិងកំណត់តំបន់អភិវឌ្ឍមណ្ឌលកម្សាន្តមនុស្សពេញវ័យ នៅខេត្តព្រះសីហនុ ក្រោមអធិបតីភាព លោក គួច ចំរើន អភិបាលនៃគណៈអភិបាលខេត្តព្រះសីហនុ ដោយមានការចូលរួមពីមន្ទីរ អង្គភាពពាក់ព័ន្ធ អាជ្ញាធរក្រុង ស្រុក និងតំណាងអាជីវកម្មទេសចរណ៍ក្នុងខេត្តព្រះសីហនុ បានមកចូលរួមផងដែរ ។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានធ្វើបទបង្ហាញ ស្តីការគ្រប់គ្រង និងការកំណត់តំបន់អភិវឌ្ឍមណ្ឌលកម្សាន្តមនុស្សពេញវ័យ ក្នុងរយ:ពេល២ទៅ៣ឆ្នាំចុងក្រោយបន្ទាប់ពីការអភិវឌ្ឍន៍ខាងលើ ខេត្តព្រះសីហនុ និងមានការរីកចម្រើនប្រកបដោយស្តង់ដារខ្ពស់ ដែលអាចផ្តល់នូវការទាក់ទាញ និងកម្សាន្តសំរាប់ភ្ញៀវទេសចរណ៍ ។
លោកប្រធានមន្ទីរទេសចរណ៍បានបន្តឲ្យដឹងទៀតថា ការរៀបចំការកំណត់តំបន់អភិវឌ្ឍមណ្ឌលកម្សាន្តទេសចរណ៍សំរាប់មនុស្សពេញវ័យ ជាការឆ្លើយតបតាមការណែនាំ តាមអនុក្រឹត្យ និងការប្រកាសរបស់ក្រសួងទេសចរណ៍ ហើយមានសារ:ប្រយោជន៍ដល់វិស័យឯកជននិងចូលរួមការកាត់បន្ថយផលប៉ះពាល់ជាអវិជ្ជមានផងដែរ ។
លោកប្រធានមន្ទីរទេសចរណ៍បន្តថា ខេត្តព្រះសីហនុ ត្រូវបានរាជរដ្ឋាភិបាលកម្ពុជា កំណត់ក្នុងគោលនយោបាយសេដ្ឋកិច្ច និងទេសចរណ៍ អភិវឌ្ឍជាតំបន់សេដ្ឋកិច្ចពិសេស គំរូពហុបំណង ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ របស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍ទេសចរណ៍ជាតិ គឺជាគោលដៅសំខាន់មួយក្នុងចំណោមប៉ូលអទិភាពទាំងបួនរួមមានរាជធានីភ្នំពេញ, ខេត្តសៀមរាប, ខេត្តតំបន់ឆ្នេរសមុទ្រ, និងខេត្តភូមិភាគឦសាន និងបានប្រសិទ្ធនាម «តារារះនាទិសនិរតី» នៃតំបន់ឆ្នេររបស់ព្រះរាជាណាចក្រកម្ពុជា ក្នុងការអភិវឌ្ឍ និងទាក់ទាញទេសចរទេសចរណ៍កម្ពុជា គឺជាគោលដៅទេសចរណ៍វប្បធម៌ និងធម្មជាតិ ។
លោកប្រធានមន្ទីរទេសចរណ៍បន្តថា នៅឆ្នាំ២០១៩ មន្ទីរបានចុះត្រួតពិនិត្យ និងធ្វើបច្ចុប្បន្នភាពមណ្ឌលកម្សាន្តទេសចរណ៍មនុស្សពេញវ័យចំនួន២៦លើក ស្មើនឹង៥១ទីតាំង ត្រួតពិនិត្យច្រកសុវត្ថិភាពត្រឹមត្រូវចំនួន៣២ទីតាំង អាជីវកម្មដែលមានប្រព័ន្ធគ្រប់គ្រងអគ្គិសនីតាមស្តង់ដារចំនួន៣៣ទីតាំង ក្នុងនោះកម្រិតមធ្យម១៨កម្រិត កម្រិតល្អ១ ទីតាំងល្អបង្គួរ១៤ទីតាំង និងការប្រើប្រាស់បំពង់អគ្គិសនីមានចំនួន៣៣ទីតាំង ។
លោក គួច ចំរើន អភិបាលខេត្តព្រះសីហនុ បានធ្វើការណែរនាំឱ្យមន្ទីរទេសចរណ៍ ខេត្តរកទីតាំង (ឬហ្សូន ) ដើម្បីរៀបចំមណ្ឌលកម្សាន្តសម្រាប់មនុស្សពេញវ័យ ពិសេសត្រូវស្ទង់មតិ ស្វែងរកការគាំទ្រពីប្រជាពលរដ្ឋក្នុងក្រុងព្រះសីហនុ ឈានទៅចេញជាគោលការណ៍ ប្រមូលផ្តុំសំរាប់មណ្ឌលកម្សាន្តមនុស្សពេញវ័យ ដើម្បីកាត់បន្ថយផលប៉ះពាល់ ធានាបានសន្តិសុខ សុវត្ថិភាពសាធារណជូនដល់ភ្ញៀវទេសចរ និងប្រជាពលរដ្ឋផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ