ប្រទេសអង់គ្លេស-សហភាពអឺរ៉ុប ៖ ២ថ្ងៃមុនអង់គ្លេសចាកចេញពីសហភាពអឺរ៉ុប ហៅBREXIT សភាអឺរ៉ុបបានអនុម័តកាលពីថ្ងៃទី២៩មករា ដោយសំឡេងភាគច្រើនលើសលុប លើសន្ធិសញ្ញានៃការដកខ្លួនថយរបស់អង់គ្លេសចេញពីសហភាពអឺរ៉ុប ហើយធ្វើការលាគ្នាពោរពេញដោយការក្ដុកក្ដួល ក្រោយការអនុម័តដែលពុំមានការភ្ញាក់ផ្អើលលើកិច្ចព្រមព្រៀង ដោយ៦២១សំឡេង ៤៩សំឡេងប្រឆាំងនិង១៣សំឡេងអនុប្បវាទ។
នេះជាដំណាក់កាលចម្បងចុងក្រោយ ចំពោះការផ្ដល់សច្ចាប័នលើកិច្ចព្រមព្រៀងនោះ៣ឆ្នាំកន្លះ បន្ទាប់ពីការបោះប្រជាមតិលើBREXITនិងជិតកន្លះសតវត្សក្រោយពីអង់គ្លេសចូលក្នុងសហភាពអឺរ៉ុប។ ភ្លាមៗបន្ទាប់ពីការអនុម័តនោះដែលនាំឲ្យបណ្ដាសមាជិកសភាអឺរ៉ុបមកពីអង់គ្លេសចាកចេញ សមាជិកសភា ច្រើនរួបបានចាប់ដៃលាគ្នាពោរពេញដោយការក្ដុកក្ដួល។
តំណាងរបស់អង់គ្លេសប្រចាំសហភាពអឺរ៉ុបលោកទីមបារ៉ូវ កាលពីព្រឹកថ្ងៃទី២៩មករាបានដាក់ជូនក្រុមប្រឹក្សាអឺរ៉ុប នូវឯកសារផ្លូវការដែលបង្ហាញថាក្រុងឡុងដ៏បានបំពេញរាល់កាតព្វកិច្ចស្របច្បាប់សម្រាប់ចាកចេញពីសហភាពអឺរ៉ុប។ ថ្ងៃទី៣១មករា ១ម៉ោងមុនពាក់កណ្ដាលយប់ អង់គ្លេសចាកចេញពីសហភាពអឺរ៉ុបដាច់ស្រឡះហើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ