រាជធានីភ្នំពេញ ៖ លោក យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍ វិស័យកសិកម្ម និងជនបទ តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ…
រាជធានីភ្នំពេញ ៖ លោក យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍ វិស័យកសិកម្ម និងជនបទ តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា ទោះបីជាក្រសួងអភិវឌ្ឍន៍ជនបទសម្រេចបានជោគជ័យជាច្រើនក៏ដោយ ក៏នៅមានបញ្ហាមួយចំនួនពុំទាន់ដោះស្រាយ អស់នៅឡើយ ដូចជាការកើនឡើងយ៉ាងគំហុកនូវតម្រូវការប្រើប្រាស់ផ្លូវជនបទ ការដឹកជញ្ជូនលើសទម្ងន់កម្រិតកំណត់ ការអភិវឌ្ឍនៅទីដាច់ស្រយាល ចំណេះជំនាញ មូលដ្ឋាន នៅពុំទាន់គ្រប់គ្រាន់ ការយល់ដឹងអំពីការរស់នៅស្អាត និងសុខភាពអនាម័យនៅខ្វះចន្លោះជាច្រើននៅតំបន់ជនបទដាច់ស្រយាល។
ការលើកឡើងនេះ លោក យឹម ឆៃលី ឧបនាយករដ្ឋមន្ត្រីបានថ្លែងក្នុងឱកាសបិទសន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងអភិវឌ្ឍន៍ជនបទ នៅសណ្ឋាគារសុខាភ្នំពេញ កាលពីរសៀលថ្ងៃទី ២៩ ខែមករា ឆ្នាំ២០២០ ។
យោងតាមរបាយការណ៍របស់ក្រសួងអភិវឌ្ឍន៍ជនបទដែលចែកឲ្យជូនមន្ត្រីដែលចូលរួមបានលើកឡើងថា កត្តាប្រែប្រួលអាកាសធាតុនៅតែជាបញ្ហាប្រឈមមួយផងដែរ សម្រាប់ហេដ្ឋារចនាសម្ព័ន្ធផ្លូវថ្នល់ជនបទ និងហេដ្ឋរចនាសម្ព័ន្ធ រូបវ័ន្តដទៃទៀត ដែលទាមទារឲ្យមានការជំរុញ និងយកចិត្តទុកដាក់បន្ថែមទៀត។ ការងារអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ការអភិវឌ្ឍវិស័យហេដ្ឋារចនាសម្ព័ន្ធ និងគមនាគមន៍ គឺជាកត្តាដ៏សំខាន់សម្រាប់ទ្រទ្រង់កំណើនសេដ្ឋកិច្ច ព្រមទាំងពង្រឹងការប្រកួតប្រជែង និងជំរុញពិពិធកម្មសេដ្ឋកិច្ចកម្ពុជា ជាពិសេសសម្រាប់ជំរុញកំណើនសេដ្ឋកិច្ច និងកាត់បន្ថយភាពក្រីក្ររបស់ប្រជាជន។
ក្នុងន័យនេះ ដើម្បីជំរុញឲ្យតំបន់ជនបទមានការវិវឌ្ឍរីកចំរើនយ៉ាងឆាប់រហ័ស ក្រសួងបានរៀបចំផែនការយុទ្ធសាស្ត្រអភិវឌ្ឍន៍ជនបទ ២០១៩-២០២៣ សម្រាប់ការតភ្ជាប់មួយដែលមានលក្ខណៈគ្រប់ជ្រុងជ្រោយ គ្របដណ្តប់លើផ្នែកគមនាគមន៍ដឹកជញ្ជូន ទឹកស្អាត និងអនាម័យជនបទ ដែលផ្តល់អត្ថប្រយោជន៍ទាំងលើវិស័យសេដ្ឋកិច្ច និងទាំងលើវិស័យសង្គមកិច្ច ក្រសួងមានប្រភពធនធានទាំងថវិកាជាតិ ថវិកាដៃគូរ និងអង្គការសង្គមនានា សម្រាប់អនុវត្ត រួមមាន ៖
២.១.គម្រោងដែលអនុវត្តដោយថវិកាជាតិ ទី១-ការសាងសង់ស្ពានបេតុងចំនួន ១៩កន្លែង ប្រវែងសរុបចំនួន ៨៤០ម, ការសាងសង់សំណង់សិល្បការ្យ ចំនួន ៤៩៤កន្លែង និងការស្ថាបនាផ្លូវជនបទ ចំនួន ១០០គម្រោង ប្រវែងសរុបចំនួន ៥១៨.១៩គ.ម ក្នុងនោះ (១).ផ្លូវក្រាលកៅស៊ូពីរជាន់ ប្រវែងចំនួន ១០១.១៦គ.ម, (២).ផ្លូវក្រាលបេតុងប្រវែងចំនួន ២៩.៩១គ.ម និង(៣).ផ្លូវក្រាលក្រួសក្រហម មានប្រវែងចំនួន ៣៨៧.១២គ.ម សម្រេចបានលទ្ធផលទាន់ពេលវេលាកំណត់ មានសោភ័ណ្ឌភាព និងគុណភាពល្អដែលបម្រើដល់ការប្រើប្រាស់ប្រកបដោយសក្តានុពល។
ទី២-ការងារថែទាំសំណង់សិល្បការ្យមានលក្ខណៈខួប សម្រេចបានចំនួន ៥៨កន្លែង ហើយការងារថែទាំផ្លូវជនបទមានលក្ខណៈខួប សម្រេចបានចំនួន ៦៨ខ្សែ ប្រវែងសរុបចំនួន ៤០៩.១៥គ.ម ដែលក្នុងនោះ ផ្លូវក្រាលក្រួសក្រហម ប្រវែងចំនួន ៣៩៥.៦៣គម និងផ្លូវក្រាលកៅស៊ូពីរជាន់ ប្រវែង ១៣.៥២គ.ម។
ចំណែកការងារថែទាំផ្លូវជនបទមានលក្ខណៈប្រចាំវិញ សម្រេចបានចំនួន ៣២៧ខ្សែ ប្រវែងសរុបចំនួន ២ ៨១១.២៣គ.ម ដែលក្នុងនោះ ផ្លូវក្រាលក្រួសក្រហម ប្រវែង ២២៣៣.៥៩គ.ម និងផ្លូវកៅស៊ូ ប្រវែង ៥៧៧.៦៤គ.ម។ការងារថែទាំទាំងពីរប្រភេទនេះ បានជួយសម្រួលដល់ការធ្វើដំណើរ កាត់បន្ថយគ្រោះថ្នាក់ចរាចរណ៍ រក្សាបានគុណភាពផ្លូវឲ្យមានអាយុកាលប្រើប្រាស់បានយូរអង្វែងជានិរន្តរ៍ ហើយចៀសវៀងបាននូវការជួសជុលធំ ដែលនាំឲ្យចំណាយថវិកាជាតិច្រើន។
ទី៣-អាស្រ័យដោយមានការជួសជុលបន្ទាន់ជាច្រើនកន្លែង រួមមាន៖ ផ្លូវប្រវែង ២៨៥.១៤គ.ម និងលូមូលចំនួន ២៣កន្លែង លូប្រអប់បានចំនួន ០១កន្លែង និងស្ពាន ចំនួន ០៩កន្លែង នោះទើបនៅទូទាំងប្រទេសពុំដែលមានការដាច់ផ្លូវ បាក់ស្ពាន ដាច់លូ ដែលបង្កឲ្យមានការរាំងស្ទះចរាចរណ៍អស់រយៈពេលយូរឡើយ។
លើសពីនេះទៀត ក្រសួងបានទំនាក់ទំនង និងសហការជាមួយក្រសួង ស្ថាប័នមានសមត្ថកិច្ច នគរបាលចរាចរណ៍ និងអាជ្ញាធរមូលដ្ឋាន ចុះទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ និងយានយន្តខុសទំហំលើបណ្តាញផ្លូវជនបទ បានចំនួន ៥១ករណី នៅតាមបណ្តាខេត្តចំនួន ២៤។ ការលើកកម្ពស់អនាម័យ ជនបទ ត្រូវបានទទួលការយកចិត្តទុកដាក់យ៉ាងខ្លាំង។
ជាក់ស្តែងនៅក្នុងឆ្នាំ២០១៩ ការងារនេះ សម្រេចបានលទ្ធផល ចំបងៗ ដូចតទៅ៖ (១).ចុះបំផុសការសាងសង់បង្គន់អនាម័យដល់សហគមន៍តាមភូមិគោលដៅ និងវាយ តម្លៃនៅក្នុងខេត្ដចំនួន១២៖ ខេត្តកែប, កោះកុង, ក្រចេះ, ប៉ៃលិន, ឧត្ដរមានជ័យ, សៀមរាប, កំពង់ចាម, កំពង់ស្ពឺ, កំពង់ឆ្នាំង, ស្វាយរៀង, ត្បូងឃ្មុំ និងខេត្តព្រះសីហនុ ដែលមានពលរដ្ឋចូលរួមសរុបចំនួន ៣ ៧៧៦គ្រួសារ, (២).សាងសង់បង្គន់អនាម័យចាក់ទឹកតាមផ្ទះឯកជនចំនួន ២៩ ៨៩៩បង្គន់,
(៣).ចុះត្រួតពិនិត្យតាមដាន និងបំផុសការលើកកម្ពស់អនាម័យ នៅតាមសហគមន៍ ចំនួន ២៩សង្កាត់ ចំនួន០៨លើក និងនៅខណ្ឌឫស្សីកែវ រាជធានីភ្នំពេញ ចំនួន ០១លើក មាន ប្រជាជនចូលរួមចំនួន ១ ០៥១នាក់,
(៤).រៀបចំវគ្គបណ្តុះបណ្តាល មន្ត្រីជាគ្រូបង្គោលតាម មន្ទីរ អភិវឌ្ឃន៍ជនបទ ខេត្តកំពត កំពង់ធំ ព្រៃវែង ស្វាយ រៀង កំពង់ស្ពឺ កំពង់ឆ្នាំង តាកែវ ក្រចេះ រតនគីរី និង ខេត្តព្រះវិហារ ចំនួន ០៨វគ្គ ស្តីពីការគ្រប់គ្រងទិន្ន័យអនាម័យតាមរយៈការកត់ត្រា និងការគូសផែនទីអនាម័យភូមិ បច្ចេកទេសផ្ទៀងផ្ទាត់ភូមិ ODF ការប្រើប្រាស់ GPS ក្នុងការកំណត់ទីតាំងបង្គន់កើនថ្មី,
(៥).ចុះពិនិត្យតាមដាននិងវាយតម្លៃជាមួយអង្គការ (UNICEF, SNV) លើកម្មវិធី CLTS និង SC WASH និងភូមិ ODF ចំនួន០៦លើក ក្នុងខេត្តសៀមរាប ពោធិ៍សាត់ ក្រចេះ កំពង់ស្ពឺ និងបាត់ដំបង ផ្តោតសំខាន់លើការផ្ទៀងផ្ទាត់ភូមិ ODF ការអនុវត្តកម្មវិធី CLTS និង SC WASH និងកាពិនិត្យ លើ ការកត់ត្រា សៀវភៅ ភូមិនិងផែនទីអនាម័យភូមិ,
(៦).ផ្តល់ចានបង្គន់ដល់ប្រជាពលរដ្ឋចំនួន ៣៤២ និងសាងសង់បង្គន់ចាក់ទឹកចំនួន ២ ០១៧បង្គន់នឹងបង្គន់ចាក់ផេះចំនួន ២ ០៤៣បង្គន់។
នៅក្នុងឱកាសបិទសន្និបាតនោះដែរ លោកយឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍ វិស័យកសិកម្មនិងជនបទលោកក៏បានអំពាវនាវដល់.ក្រសួងអភិវឌ្ឍន៍ជនបទត្រូវបន្តខិតខំសម្រេចឲ្យខានតែបាននូវទិសដៅដែលបានដាក់ចេញសម្រាប់ឆ្នាំ ២០២០ និងឆ្នាំបន្តបន្ទាប់, ក្រសួងស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ដៃអភិវឌ្ឍន៍ អង្គការក្រៅរដ្ឋាភិបាល និងប្រជាជនគ្រប់រូប ចូលរួមគាំទ្រឲ្យការអនុវត្តផែនការឆ្នាំ ២០២០ របស់ក្រសួងអភិវឌ្ឍន៍ជនបទសម្រេចបានផ្លែផ្កាថ្មីៗថែមទៀត, និង.ដៃគូរអភិវឌ្ឍន៍ អង្គការក្រៅ រដ្ឋាភិបាល និងវិស័យឯកជនទាំងអស់ បន្តកិច្ចសហការគាំទ្រធនធានសម្រាប់ការអនុវត្តគម្រោងបន្ត បន្ទាប់ទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ