រាជធានីភ្នំពេញ ៖ ក្នុងវិស័យសិល្បៈចម្រៀង ក្នុងនាមជាចៅស្រីអធិរាជសំឡេងមាសស៊ីន សាមុត តារាចម្រៀងវ័យក្មេងកញ្ញាស៊ីន សេដ្ឋសុជ្ឈតា តាំងចិត្តថានឹងបន្តលើកតម្លៃវង្សត្រកូលរបស់ខ្លួននៅក្នុងវិស័យសិល្បៈចម្រៀង បើទោះបីជាពេលនេះនាងទើបតែចាប់អាជីពក៏ដោយ ។…
រាជធានីភ្នំពេញ ៖ ក្នុងវិស័យសិល្បៈចម្រៀង ក្នុងនាមជាចៅស្រីអធិរាជសំឡេងមាសស៊ីន សាមុត តារាចម្រៀងវ័យក្មេងកញ្ញាស៊ីន សេដ្ឋសុជ្ឈតា តាំងចិត្តថានឹងបន្តលើកតម្លៃវង្សត្រកូលរបស់ខ្លួននៅក្នុងវិស័យសិល្បៈចម្រៀង បើទោះបីជាពេលនេះនាងទើបតែចាប់អាជីពក៏ដោយ ។
ការសន្យារបស់កូនស្រីលោកស៊ីន ច័ន្ទឆាយ៉ា នេះបន្ទាប់ពីបងប្រុសបង្កើតរបស់ខ្លួនគឺលោកស៊ីន សេដ្ឋកុល បានទទួលមរណភាពកាលពីពេល ថ្មីៗកន្លងមក ហើយធ្វើឲ្យវង្សត្រកូលស៊ីន ស៊ីសាម៉ុត ហាក់ពិបាកស្វែងរកអ្នកបន្តវេនលើវិស័យសិល្បៈចម្រៀង ។ ដ្បិតបងប្រុសលោកស៊ីន សេដ្ឋកុល បានកសាងកេរ្តិ៍ឈ្មោះក្នុងវិស័យសិល្បៈមានភាពល្អប្រសើរជាងខ្លួនបន្តិចក៏ដោយ ប៉ុន្តែស៊ីន សេដ្ឋសុជ្ឈតា បាន និងកំពុងបញ្ជ្រៀបខ្លួនជា បណ្តើរៗក្នុងវិស័យចម្រៀងប្រកបដោយភាពមោះមុត និងជឿជាក់តាមការចង់បានពីក្រុមគ្រួសារ ។
ស៊ីន សេដ្ឋសុជ្ឈតា បានអះអាងប្រាប់កោះសន្តិភាពតាមសារអេឡិចត្រូនិកកាលពីពេល ថ្មីៗកន្លងមកថា បច្ចុប្បន្នជានិស្សិតផ្នែកទំនាក់ទំនង និងប្រព័ន្ធផ្សព្វផ្សាយ ។ ចំពោះវិស្ស័យសិល្បៈ នាងកំពុងតែចាប់ផ្ដើមជំហានដំបូង ដោយបានផលិតចម្រៀងមួយចំនួនរួចហើយជាមួយផលិតកម្មក្លាបយ៉ាហ៊ែន( KlapYaHandz) ហើយនឹងមានបទចម្រៀង ថ្មីៗជាបន្តបន្ទាប់ទៀត ។
សម្រាប់បទចម្រៀងរបស់នាងនោះគឺមានទាំងបទនិពន្ធថ្មី និងបទខ្លះគឺច្រៀងឡើងវិញពីបទជីតារបស់នាងគឺលោក ស៊ីន ស៊ីសាមុត ដោយបានរៀបចំជាបទភ្លេងថ្មី ។
បើតាមស៊ីន សេដ្ឋសុជ្ឈតា សម្រាប់ឆន្ទៈរបស់នាងផ្ទាល់ គឺនឹងនៅតែបន្តថែរក្សាអ្វីដែលគ្រួសារ ជាពិសេសលោកតាស៊ីន ស៊ីសាមុត ផ្ទាល់បានបន្សល់ទុកឲ្យ ធ្វើយ៉ាងណាឲ្យគ្រប់គ្នានៅតែបានទទួលដឹងឮពីឈ្មោះត្រកូលមួយនេះ ។
ចៅស្រីរបស់អធិរាជសំឡេងមាស ស៊ីន ស៊ីសាមុត ពិតជាមានទេពកោសល្យមិនអន់ទេ ដោយនាងអាចច្រៀងបានពីរោះទាំងភាសាខ្មែរ អង់គ្លេស រ៉េបផង លឿនផងយឺតផង ពោលគឺនាងអាចច្រៀងបានចម្រុះតែម្ដង ។ នាងក៏ធ្លាប់បានបង្ហាញវត្តមានឡើងច្រៀងតាមកញ្ចក់ទូរទស្សន៍ផងដែរ កាលពីពេលកន្លងទៅ ហើយនាងហូរទឹកភ្នែកពេលច្រៀងបទលោកឪពុក នៅស្ថានីយទូរទស្សន៍PNN ដោយសារតែនាងនឹករលឹកយ៉ាងខ្លាំងដល់ឪពុកដែលបានលាចាកលោកទៅ ។
ស៊ីន សេដ្ឋសុជ្ឈតា ក៏ធ្លាប់បានបង្ហាញវត្តមានច្រៀងក្នុងកម្មវិធីចម្រៀងគ្រួសារខ្មែរ ហើយជាងនេះទៅទៀតនាងក៏បានធ្វើឲ្យមហាជន ជាពិសេសបណ្តាអ្នកលេងអុីនធើរណេតមានការចាប់អារម្មណ៍ខ្លាំងតាមរយៈការច្រៀងCover បទជីតារបស់ខ្លួនក្រោមចំណងជើងថា៖ «ចំប៉ាបាត់ដំបង» ជាមួយការកែច្នៃសាច់ភ្លេងបែបថ្មីយ៉ាងពីរោះរណ្តំ ។
មហាជនរំពឹងថា ស៊ីន សេដ្ឋសុជ្ឈតា នឹងធ្វើដំណើរលើវិថីសិល្បៈចម្រៀងបន្តពីក្រុមគ្រួសារបានយ៉ាងល្អ បន្ទាប់ពីបងប្រុសលោកស៊ីន សេដ្ឋកុល ជាគ្រាប់ពេជ្រនៃត្រកូលស៊ីន ស៊ីសាមុត ដែលអាចស្នងតំណែងតែម្នាក់គត់នោះ បានទទួលមរណភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ