ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ស្ត្រីគ្រូទាយម្នាក់ពូកែប្រើល្បិចខ្ពស់ រហូតដល់ធ្វើឱ្យអ្នកភូមិជឿជាក់ ក៏បានឱកាសល្អបោកប្រាស់ប្តីប្រពន្ធ១គ្រួសារ អស់លុយជាង៤លានរៀល ខណៈមានបងប្អូនណែនាំប្រាប់ថា ស្ត្រីរូបនោះ ពូកែទាយឆុត…
ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ស្ត្រីគ្រូទាយម្នាក់ពូកែប្រើល្បិចខ្ពស់ រហូតដល់ធ្វើឱ្យអ្នកភូមិជឿជាក់ ក៏បានឱកាសល្អបោកប្រាស់ប្តីប្រពន្ធ១គ្រួសារ អស់លុយជាង៤លានរៀល ខណៈមានបងប្អូនណែនាំប្រាប់ថា ស្ត្រីរូបនោះ ពូកែទាយឆុត និងចេះមើលជោគជាតារាសី លុះឃើញទាយត្រូវចំណុច ក៏ជឿស្លុងរហូតដល់គេបោកអស់ប្រាក់ជាច្រើនតែម្តង ។
សេចក្តីរាយការណ៍បន្តថា មិនត្រឹមតែប៉ុណ្ណោះ ស្ត្រីគ្រូទាយបានបោកប្រាស់អ្នកភូមិជាបន្តបន្ទាប់ រហូតដល់ប្រជាពលរដ្ឋរស់នៅក្បែរព្រំដែនកម្ពុជា-ថៃក៏អស់ប្រាក់ជាច្រើនថែមទៀតផងដែរ ។
សេចក្តីរាយការណ៍បន្តថា ហេតុការណ៍នេះ ត្រូវបានបុរសម្នាក់រៀបរាប់ឱ្យភ្នាក់ងារសារព័ត៌មានដឹងកាលពីម៉ោង១០និង៣០នាទីព្រឹក ថ្ងៃទី២៣ ខែមករា ឆ្នាំ២០២០ ថា ជនរងគ្រោះ មានដែលត្រូវគ្រូទាយបោកឈ្មោះ ភាន សុភា ភេទប្រុស អាយុ៤១ឆ្នាំ និងប្រពន្ធឈ្មោះ អ៊ុត តន់ អាយុ៣៩ឆ្នាំ ត្រូវបានស្ត្រីជាគ្រូទាយបោកអស់លុយជាង៤លានរៀល រស់នៅភូមិដំណាក់កន្សែង ឃុំប្រមោយ ស្រុកវាលវែង ខេត្តពោធិ៍សាត់ ដោយចាញ់បោកគេកាលពីរសៀលថ្ងៃទី១៩ ខែមករា ឆ្នាំ២០២០ ស្ថិតនៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ចំណែកជនសង្ស័យជាគ្រូទាយមានឈ្មោះ ចាន់ ភេទស្រី អាយុប្រហែល៤០ឆ្នាំ រស់នៅស្រុកសំពៅលូន ខេត្តបាត់ដំបង ។
ប្រភពព័ត៌មានពីបុរសម្នាក់ឈ្មោះ ភាន សុភា បានឱ្យដឹងថា គាត់មានបងប្អូនម្នាក់ឈ្មោះ អ៊ុក ទូច រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ដោយប្រពន្ធគាត់ស្គាល់គ្នាជាមួយនឹងស្ត្រីគ្រូទាយខាងលើ ហើយក៏ប្រាប់ឱ្យគាត់ពីរនាក់ប្តីប្រពន្ធឱ្យធ្វើដំណើរពីខេត្តពោធិ៍សាត់ ទៅជួបនឹងស្ត្រីគ្រូទាយរូបនោះ ។
គាត់បន្តទៀតថា គ្រាន់តែឮដំណឹងភ្លាម រូបគាត់ក៏ប្រញាប់ប្រញាល់ទៅ ក្រែងទៅមិនទាន់ជួបមុខគ្រូ ព្រោះមានអ្នកទាក់ទងឱ្យទៅទាយជាច្រើននាក់ទៀត ។ លុះពេលធ្វើដំណើរទៅដល់ ស្រាប់តែគ្រូទាយបានប្រាប់ពួកគាត់ថា ប្រពន្ធគាត់ត្រូវអំពើគេធ្ងន់ធ្ងរហើយ ដោយបំភ័យឱ្យគាត់ភ័យខ្លាចថា បើមិនឆាប់ដោះអំពើចេញទេ ប្រពន្ធរបស់ខ្លួនអាចនឹងបាត់បង់ជីវិតចោលប្តីនៅខែកុម្ភ: ឆ្នាំ២០២០ឆាប់ៗនេះ ជាក់ជាមិន ។
បុរសរងគ្រោះបន្តថា ពេលនោះ គ្រូទាយចាប់ផ្តើមនិយាយរឿងរ៉ាវដែលកើតមានឡើងត្រូវនឹងអ្វីដែលជីវិតប្រពន្ធរបស់ខ្លួនកំពុងជួបប្រទះមែន ហើយអ្វីដែលគួរឱ្យចង់សើចនោះ គឺគ្រូទាយបានឱ្យប្រពន្ធខ្លួនចូលក្នុងបន្ទប់ដោះខោអាវ ខោលីអូ និងដកសក់យកឱ្យគ្រូទាយ ដើម្បីយកទៅរំដោះគ្រោះ ហើយត្រូវរកសម្លៀកបំពាក់ផ្សេងស្លៀកទៅផ្ទះវិញ ។
គ្រូទាយចាប់ផ្តើមប្រាប់ថា ការទស្សន៍ទាយមិនត្រូវបង់លុយនោះឡើយ បើចង់ដាក់ឱ្យប៉ុន្មានក៏បានដែរ តែដោយសារស្ត្រីរងគ្រោះត្រូវអំពើគេខ្លាំងអាចនឹងឈានដល់បាត់បង់ជីវិត ដូច្នេះត្រូវតែបង់លុយចំនួន២លានរៀល ដើម្បីឱ្យទៅគ្រូទាយយកទៅទិញខ្លាញ់ខ្មោច ព្រោះអ្នកធម្មតាមិនអាចរកទិញខ្លាញ់នោះបានទេ ទាល់តែគ្រូ ទើបអាចទិញបាន ។ បន្ទាប់ពីបង់លុយរួច គ្រូទាយប្រាប់ថា គាត់ប្រញាប់ទៅរកទិញរបស់ទាំងនោះយកមករំដោះគ្រោះចង្រៃឱ្យទាន់ពេលវេលា ។
ប្រភពដដែលបន្តថា លុះព្រឹកស្អែកឡើងថ្ងៃទី២០ ខែមករា ស្រាប់តែគ្រូទាយបានទូរស័ព្ទប្រាប់ថា គាត់ត្រូវការចំនួន២លានរៀលទៀត ដើម្បីយកទៅទិញឈាមចំនួន៥សាក់ យកទៅដាក់បណ្តេញអំពើអំព័ន្ធនោះចេញ និងដាក់អំពើតបទៅអ្នកដែលដាក់មកលើប្រពន្ធជនរងគ្រោះ ។
គាត់បន្ថែមទៀតថា គ្រាន់តែឮសម្តីគ្រូទាយភ្លាម ក៏ប្រញាប់ដើរខ្ចីប្រាក់បងប្អូនពេញភូមិ រួចក៏វេរឱ្យស្ត្រីគ្រូទាយនោះ ព្រោះខ្លាចប្រពន្ធបាត់បង់ជីវិតចោលរូបខ្លួន លុះបន្ទាប់ពីបានប្រាក់ហើយ នាងប្រាប់ថា ធ្វើដំណើរមកជិតដល់ហើយ ទើបដល់ស្រុកមោងឫស្សី ខេត្តបាត់ដំបង លុះទាក់ទងទៀត ចូលដែល តែអត់មានអ្នកលើកទូរស័ព្ទ រួចក៏បិទចោលភ្លាម ទើបដឹងថាខ្លួនពិតជាចាញ់បោកគ្រូទាយនោះមែន ។
ជនរងគ្រោះបញ្ជាក់បន្ថែមទៀតថា មានអ្នកភូមិជាច្រើន ដោយអ្នកខ្លះប្តីមានស្រី ចង់ឱ្យប្តីស្រឡាញ់ខ្លួនវិញ ក៏ឱ្យគ្រូបញ្ចុះមន្តស្នេហ៍អស់លុយរាបលានរៀល ខ្លះទៀតជំពាក់បំណុលគេ ចង់ឱ្យលក់ដីដាច់ឆាប់រហ័ស ក៏យកប្រាក់ទៅឱ្យគ្រូទាយអស់រាប់ម៉ឺនបាត (ប្រាក់ថៃ) ។ ចំណែកអ្នកផ្សេងៗទៀត ចង់ឱ្យរកស៊ីមានលឿន ឱ្យជួបតែមិត្តភក្តិល្អៗ កុំឱ្យគេបោកប្រាស់ ក៏យកប្រាក់ទៅឱ្យគ្រូទាយស្ទើរពេញភូមិតែម្តង ។
ជនរងគ្រោះបញ្ជាក់ទៀតថា គាត់នឹងដាក់ពាក្យបណ្តឹងទៅប៉ុស្តិ៍នគរបាលរដ្ឋបាល ដើម្បីឱ្យតាមស្វែងរកចាប់ស្ត្រីឆបោកខាងលើ ដើម្បីយកមកផ្តន្ទាទោសតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ