រាជធានីភ្នំពេញ ៖ ម៉ូតូកង់បីត្រូវបានរដ្ឋបាលខណ្ឌដូនពេញកែច្នៃដាក់ធុងទឹក ដាក់ម៉ូទ័រ សម្រាប់ធ្វើអនាម័យ លាងការ៉ូឡាតាមផ្លូវសាធារណៈជាពិសេសជួយអន្តរាគមន៍បាញ់ពន្លត់អគ្គិសភ័យដែលកើតឡើងក្នុងមូលដ្ឋាន(អគ្គីភ័យតូចតាច) ។ លោកសុខ ពេញវុធ អភិបាលនៃគណៈអភិបាលខណ្ឌដូនពេញបានឲ្យដឹងថា…
រាជធានីភ្នំពេញ ៖ ម៉ូតូកង់បីត្រូវបានរដ្ឋបាលខណ្ឌដូនពេញកែច្នៃដាក់ធុងទឹក ដាក់ម៉ូទ័រ សម្រាប់ធ្វើអនាម័យ លាងការ៉ូឡាតាមផ្លូវសាធារណៈជាពិសេសជួយអន្តរាគមន៍បាញ់ពន្លត់អគ្គិសភ័យដែលកើតឡើងក្នុងមូលដ្ឋាន(អគ្គីភ័យតូចតាច) ។
លោកសុខ ពេញវុធ អភិបាលនៃគណៈអភិបាលខណ្ឌដូនពេញបានឲ្យដឹងថា ម៉ូតូកង់បីរបស់រដ្ឋបាលខណ្ឌដូនពេញមានចំនួន៤គ្រឿង ជាយានយន្តសម្រាប់ជួយអន្តរាគមន៍ពន្លត់អគ្គិភ័យដែលកើតឡើងព្រោះក្នុងម៉ូតូមួយគ្រឿងបំពាក់ដោយធុងទឹកចំណុះពី២០០ទៅ៤០០លីត្រនិងបំពាក់ម៉ាស៊ីនបូមទឹក ។
លោកអភិបាលខណ្ឌបានបន្តថា ម៉ូតូកង់បីនេះសម្រាប់ដឹកកំលាំងប្រជាការពារចុះរៀបចំសណ្តាប់ធ្នាប់ ធ្វើអនាម័យ លាងការ៉ូឡា និងអាចជួយសម្រួលដល់កិច្ចការជាច្រើនផ្សេងទៀតសម្រាប់បម្រើផលប្រយោជន៍រដ្ឋបាលខណ្ឌ និងសម្រាប់បម្រើផលប្រយោជន៏ទូទៅផងដែរ។ ជាពិសេសម៉ូតូកង់បីតូចល្មមនេះបានកែច្នៃទៅជាម៉ូតូដឹកទឹក, ដឹកសំភារៈអនាម័យ, ដឹកសម្ភារៈសម្រាប់ធ្វើលូ និងដឹកសំភារៈជួសជុលផ្លូវសំបុកមាន់តូចតាចជាដើម។
លោកអភិបាលខណ្ឌបានបន្តថា ម៉ូតូកង់បីចំនួន៤គ្រឿងរបស់រដ្ឋបាលខណ្ឌដូនពេញបានប្រតិបត្តិការដូចជា ៖ ១-បាញ់ទឹកពន្លត់អគ្គីភ័យតាមគេហដ្ឋានប្រជាពលរដ្ឋក្នុងមូលដ្ឋាន ដែលបានកើតឡើងជាយថាហេតុ(អគ្គីភ័យតូចតាច), ២-ជួយដឹកសំរាមក្រោយពេលក្រុមហ៊ុនស៊ីនទ្រីប្រមូលនៅសេសសល់, ៣-ជួយដឹកសំភារៈសំណង់បានមួយចំនួន, ៤-ជួយបាញ់ទឹកលាងសំអាតការ៉ូឡាតាមសួនច្បារ និងតាមទីតាំងនានា ដែលស៊ីនទ្រីប្រមូលសំរាមរួចនៅសល់កាកសំណល់មិនទាន់សំអាតបានល្អ និង៥-ជួយសម្រួលដឹកជញ្ជូនប្រជាការពារក្នុងការចុះរៀបចំសំអាតអនាម័យ រៀបចំសណ្ហាប់។ល។ នេះជាអត្ថប្រយោជន៏ដ៏សំខាន់ និងចាំបាច់បំផុតសម្រាប់បំរើការងារទូទៅក្នុងមូលដ្ឋានដែលគិតថាមិនអាចខ្វះបាន។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)
ចែករំលែកព័តមាននេះ