រាជធានីភ្នំពេញ ៖ ព្រឹកថ្ងៃទី១០ មករា នៅមជ្ឈមណ្ឌលជាតិហ្វឹកហ្វឺនកីឡា មានរៀបចំពិធីប្រគល់ប្រាក់រង្វាន់លើកទឹកចិត្តរបស់រាជរដ្ឋា ភិបាលដល់ជ័យលាភីនៃការប្រកួតកីឡាគុនដាវជើងឯកអាស៊ី និងការប្រកួតកីឡាការ៉ាតេជើងឯកអាស៊ី និងអាស៊ីអាគ្នេយ៍ ។ ពិធីនេះបានការអញ្ជើញចូលរួមពីលោក ស សុខា រដ្ឋលេខា ធិការក្រសួងអប់រំ យុវជន និងកីឡា ព្រមទាំងមន្ត្រីក្រោមឱវាទជាច្រើនរូបទៀត ។
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឱ្យដឹងថា ក្រសួងអប់រំ យុវជន និងកីឡា បានប្រមូលផ្ដុំក្រុមកីឡាជម្រើសជាតិចំនួន៥០៤នាក់លើ៣៥ប្រភេទកីឡា និង១ក្រុម
កីឡាជនពិការរយៈពេល៧ខែគិតចាប់ពីថ្ងៃទី២៥មេសាដល់២៥វិច្ឆិកាឆ្នាំ២០១៩ដើម្បីហ្វឹកហាត់ត្រៀមចូលរួមប្រកួតកីឡាស៊ីហ្គេមលើកទី៣០នៅប្រទេសហ្វីលីពីន និងការប្រកួតជាលក្ខណៈអន្តរជាតិនានា ។
ប្រមូលផ្ដុំកីឡាករថ្នាលចំនួន៥០០នាក់លើ៣១ប្រភេទកីឡារយៈពេល៨ខែចាប់ពីថ្ងៃទី១ ឧសភា ដល់ថ្ងៃទី៣១ ធ្នូ ឆ្នាំ២០១៩ដើម្បីឆ្ពោះទៅស៊ីហ្គេមលើកទី៣២ឆ្នាំ២០២៣ ។ ប្រភេទកីឡាដែលត្រូវទទួលបានប្រាក់រង្វាន់លើកទឹកចិត្តពីរាជរដ្ឋាភិបាលលើកនេះមានកីឡាគុនដាវត្រូវបានក្រសួងអប់រំ យុវជន និងកីឡា បញ្ជូនឱ្យទៅចូលរួមក្នុងក្របខណ្ឌ«កីឡាគុនដាវសាកលវិទ្យាល័យជើងឯកអាស៊ីអាគ្នេយ៍»កាលពីឆ្នាំ២០១៩នៅប្រទេសម៉ាឡេស៊ី ដែលមានអត្តពលិក១២នាក់ក្នុងនោះស្រី៥នាក់ ។
ចំពោះលទ្ធផលអត្តពលិកកម្ពុជាទទួលបានមេដាយប្រាក់ចំនួន៣គ្រឿង មេដាយសំរឹទ្ធចំនួន២គ្រឿង សរុប៥គ្រឿង ដែលមានប្រាក់រង្វាន់សរុប៩៣លានរៀល ។ រីឯប្រភេទកីឡាការ៉ាតេវិញនោះបានមកពីការប្រកួត«កីឡាការ៉ាតេជើងឯកអាស៊ីអាគ្នេយ៍លើកទី៨ឆ្នាំ២០១៩»នៅប្រទេសថៃ ។ ក្រសួងអប់រំ យុវជន និងកីឡាបានបញ្ជូនប្រតិភូកីឡាជម្រើសជាតិឱ្យទៅចូល រួមចំនួន២២នាក់ ក្នុងនោះស្រីចំនួន៦នាក់ ។ ជាលទ្ធផលក្រុមជម្រើសជាតិកម្ពុជារកបានមេដាយសំរឹទ្ធចំនួន៥គ្រឿង រីឯប្រាក់រង្វាន់លើកទឹកចិត្តសរុបមានចំនួន៦០.៩០០.០០០រៀល។
លោក ប៉ុន សុខ បន្តថា ចំពោះព្រឹត្តិការណ៍កីឡាអាស៊ីវិញនោះក្រសួងអប់រំ យុវជន និងកីឡាបានបញ្ជូនប្រតិភូកីឡាចំនួន១៨នាក់ ស្រី៤នាក់ទៅប្រកួតកីឡាការ៉ាតេជើងឯកអាស៊ីលើកទី១៨ ឆ្នាំ២០១៩ នៅប្រទេសម៉ាឡេស៊ីចាប់ពីថ្ងៃទី២០ដល់២៩មេសា ។ ជាលទ្ធផលកម្ពុជាដណ្ដើមបានមេដាយសំរឹទ្ធ១គ្រឿង ដែលមានប្រាក់រង្វាន់សរុបចំនួន២២លានរៀល ។
ចំណែកការប្រកួត«កីឡាគុនដាវសាកលវិទ្យាល័យជើងឯកអាស៊ី»នៅប្រទេសសិង្ហបូរី ចាប់ពីថ្ងៃទី២ដល់៤មិថុនា ឆ្នាំ២០១៩ ក្រសួងអប់រំ យុវជន និងកីឡាបញ្ជូនប្រតិភូកីឡាឱ្យទៅចូលរួមចំនួន១៣នាក់(ស្រី៣នាក់) ។ ជាលទ្ធផល អត្តពលិកកម្ពុជាទទួលបានមេដាយប្រាក់១គ្រឿងនិងមេដាយសំរឹទ្ធ៥គ្រឿង ដែលមានប្រាក់រង្វាន់សរុបចំនួន២០៨លានរៀល ៕ (កែសម្រួលដោយ ៖ បុប្ផា)
ចែករំលែកព័តមាននេះ