រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាថ្មីៗនេះត្រូវបានជ្រើសតាំងជា «ឯកអគ្គរដ្ឋទូតសុច្ឆន្ទៈទេសចរណ៍អន្ដរជាតិ និងគោលដៅនៃការអភិវឌ្ឍប្រកបដោយចរីភាព» ក្នុងនោះផងដែរ រាជធានីភ្នំពេញក៏ទទួលបានជ័យលាភីជា «រាជធានីនៃវប្បធម៌ និងទេសចរណ៍ពិភពលោក» ដែលផ្តល់ជូនដោយក្រុមប្រឹក្សាទេសចរណ៍ និងពាណិជ្ជកម្មអឺរ៉ុប។
ដើម្បីចូលរួមអបអរសារទរសម្រាប់ការទទួលបានកិត្តិយសធំធេងនោះ រដ្ឋបាលរាជធានីភ្នំពេញនារាត្រីថ្ងៃទី០៩ ធ្នូនេះ បានធ្វើពីធីលៀងសាយភោជអបអរសាទរការជ្រើសតាំងសម្តេចតេជោ ជា «ឯកអគ្គរដ្ឋទូតសុច្ឆន្ទៈទេសចរណ៍អន្ដរជាតិ និងគោលដៅនៃការអភិវឌ្ឍប្រកបដោយចរីភាព» និងការទទួលបានជ័យលាភី ដែលពិធីនេះប្រារព្ធធ្វើនៅសណ្ឋាគារផ្កាយ៥ សុខ អូតែល ស្ថិតក្នុងសង្កាត់ជ្រោយចង្វា ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ, លោក ថោង ខុន រដ្ឋមន្ត្រីក្រសួងទេសចរណ៍, លោកសាស្ត្រាចារ្យបណ្ឌិត អាន តុន ការ៉ាគា ( Anton Caragea ) ប្រធានក្រុមប្រឹក្សាទេសចរណ៍ និងពាណិជ្ជកម្មអឺរ៉ុប និងមានការចូលរួមពីមន្ត្រីចំណុះឱ្យរដ្ឋបាលរាជធានីភ្នំពេញជាច្រើននាក់ទៀត។
លោក ឃួង ស្រេង បានមានប្រសាសន៍លើកឡើងថា ការជ្រើសតាំងសម្តេចតេជោ ហ៊ុន សែន នាយករដ្ឋមន្ត្រីជា «ឯកអគ្គរដ្ឋទូតសុច្ឆន្ទៈទេសចរណ៍អន្ដរជាតិ និងគោលដៅនៃការអភិវឌ្ឍប្រកបដោយចរីភាព» និងជ័យលាភីរាជធានីភ្នំពេញ ជារាជធានីនៃវប្បធម៌ និងទេសចរណ៍ពិភពលោក ផ្តល់ជូនដោយក្រុមប្រឹក្សាទេសចរណ៍ និងពាណិជ្ជកម្មអឺរ៉ុប មិនមែនជាការជ្រើសរើសដោយភាពចៃដន្យនោះទេ។ តែវាជាគម្រោងនៃការរៀបចំផែនការច្បាស់លាស់ កិច្ចការចាត់តាំងអនុវត្តដ៏មានប្រសិទ្ធភាព និងការជំនះរាល់ការលំបាកស្មុគស្មាញក្រោមម្លប់សន្តិភាព៕
ចែករំលែកព័តមាននេះ