កាលពីប្រមាណពីរសប្តាហ៍មុន ក្រុមហ៊ុនហ្វេសប៊ុក (Facebook) បានប្រកាសថា ពួកគេបានលុបការ Post របស់អ្នកប្រើប្រាស់រាប់សិបដងទៅហើយក្នុងកំឡុងពេល៦ខែកន្លងមកនេះ ព្រោះតែការ Post ទាំងនោះមានការល្មើសនឹងវិធាននៃការប្រើប្រាស់របស់ក្រុមហ៊ុន…
កាលពីប្រមាណពីរសប្តាហ៍មុន ក្រុមហ៊ុនហ្វេសប៊ុក (Facebook) បានប្រកាសថា ពួកគេបានលុបការ Post របស់អ្នកប្រើប្រាស់រាប់សិបដងទៅហើយក្នុងកំឡុងពេល៦ខែកន្លងមកនេះ ព្រោះតែការ Post ទាំងនោះមានការល្មើសនឹងវិធាននៃការប្រើប្រាស់របស់ក្រុមហ៊ុន ។
ប្រសិនបើអ្នកស្ថិតក្នុងចំណោមអ្នករកស៊ីលើហ្វេសប៊ុកដែលពឹងផ្អែកលើប្រព័ន្ធសង្គមនេះ ដើម្បីផ្សព្វផ្សាយផលិតផល ឬសេវាកម្មនោះអ្នកគួរតែមានការប្រុងប្រយ័ត្នចាប់ពីពេលនេះតទៅ ។ ហ្វេសប៊ុក មានប្រព័ន្ធបច្ចេកវិទ្យា និងក្រុមការងារដ៏ធំដែលចាំតាមដានសកម្មភាពរបស់អ្នកប្រើប្រាស់ ហើយក្រុមហ៊ុននេះពិតជាលឿនណាស់ក្នុងការបិទ Page របស់អាជីវកម្មដែលព្យាយាមលក់ផលិតផល ឬមានសកម្មភាពដែលពួកគេមិនអាចទទួលយកបាន ។
ជាដំបូងអ្នកត្រូវតែប្រុងប្រយ័ត្នពីអ្វីដែលអ្នកកំពុងលក់ ។ ប្រាកដណាស់ហ្វេសប៊ុក មិនអនុញ្ញាតឲ្យអ្នកលក់អ្វីដែលខុសច្បាប់ ឬផលិតផលក្លែងក្លាយឡើយ ។ ប៉ុន្តែប្រព័ន្ធសង្គមនេះក៏មានហាមឃាត់មិនឲ្យមានការលក់ផលិតផលដទៃជាច្រើនទៀតដែរទោះជាវាមិនល្មើសច្បាប់ក្នុងប្រទេសមួយចំនួនពិតមែនក្តី ។
ផលិតផលទាំងនោះរួមមានបារី អាវុធ និងគ្រាប់រំសេវ សត្វចិញ្ចឹម សេវាកម្មទាក់ទិននឹងផ្លូវភេទ គ្រឿងស្រវឹង និងការ Post មួយចំនួនដែលអនុញ្ញាតឲ្យមនុស្សទាញអ្វីមួយជាដើមដូចជា PDF បទចម្រៀង ហ្គេម ឬភាពយន្តជាដើម ។ ប្រសិនបើអ្នកធ្វើការលក់ផលិតផលទាំងនេះ អ្នកនឹងអាចត្រូវបានហាមមិនឲ្យប្រើហ្វេសប៊ុកនៅថ្ងៃមុខ ។
ហ្វេសប៊ុក ក៏ចាំតាមដានសកម្មភាពរបស់អ្នកប្រើប្រាស់ដែរដោយលុបការចែករំលែកដែលទាក់ទិននឹងរឿងដែលភ្ញាក់ផ្អើលខ្លាំង មិនគួរឲ្យគោរពដល់អ្នកដទៃ ឬបង្ហាញពីអំពើហឹង្សាជ្រុលជ្រួសជាដើម ។ ប្រសិនបើករណីនេះកើតមានឡើង ហ្វេសប៊ុក នឹងព្យាយាមបិទដំណើរការគណនីហ្វេសប៊ុករបស់អ្នក ។
ដូច្នេះតើអ្នកគួរធ្វើដូចម្តេចដើម្បីជៀសវាងបញ្ហាទាំងនេះ?ជាដំបូងអ្នកគួរតែអានវិធាននៃការប្រើប្រាស់របស់ ហ្វេសប៊ុក ឡើងវិញ ឬសាកសួរអ្នកដែលមានព័ត៌មានទាក់ទិននឹងផ្នែកនេះច្រើនដើម្បីជៀសវាងប្រព្រឹត្តិអំពើល្មើសដោយមិនដឹងខ្លួន ។
បន្ទាប់មកទៀត អ្នកមិនគួរធ្វើការចែករំលែកច្រើនពេកទេព្រោះវានឹងធ្វើឲ្យហ្វេសប៊ុកចាប់អារម្មណ៍លើអ្នក ។ ហើយចុងក្រោយគឺកុំចែករំលែកអ្វីដែលមិនមែនជារបស់ខ្លួនដូចជារូបភាព ឬវីដេអូដែលមានការរក្សាសិទ្ធិច្បាស់លាស់ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ