អ្នកប្រហែលជាចង់ឲ្យរបួសដែលកើតមានលើរាងកាយជាទៅវិញលឿនបំផុតណាស់ ។ នៅពេលមានដំបៅ ឬរបួសលើរាងកាយ ដំបូងឡើយចូរប្រាកដថា អ្នកបានលាងសម្អាតវាបានល្អហើយ ។ ការរុំរបួសបានត្រឹមត្រូវនឹងជួយការពារវាពីការបង្ករោគ ។ ការលេបថ្នាំជួយឲ្យរបួសនោះឆាប់សះ និងចៀសវាងការបង្ករោគដែរ ។
ការរុំរបួសក៏ជួយឲ្យរបួសមានសំណើម និងក្តៅ ឧណ្ហៗ សម្រាប់ជំរុញដល់ការជាសះរបស់របួសផង ។ ការអនុវត្តតែប៉ុន្មានចំណុចនេះមិនទាន់គ្រប់គ្រាន់ឡើយក្នុងការជំរុញឲ្យរបួសកាន់តែជាលឿន លុះត្រាតែមានបញ្ចូលរបបអាហារផងដែរ ។ តើគួរញ៉ាំអាហារបែបណាទើបឆាប់ជារបួសទៅ ? ចូរញ៉ាំប្រូតេអុីនពី១១០ ទៅ១៤០ក្រាមក្នុងបាយ មួយពេលៗ ។
រាងកាយត្រូវការប្រើប្រាស់ប្រូតេអ៊ីនដើម្បីបង្កើតជាលិកាសាច់ឡើងវិញ ។ តាមរយៈការបញ្ចូលប្រូតេអ៊ីនសុទ្ធក្នុងរបបអាហារ អ្នកអាចជំរុញដល់ការជាសះរបួសកាន់តែលឿនជាងមុនបាន ។ ប្រូតេអុីនសុទ្ធដែលល្អនោះមានដូចជា ស៊ុត សាច់ទ្រូងមាន់ និងសាច់សម្លកជាដើម ។
១-គួរតែមានបន្លែពណ៌បៃតងផង ៖ បន្លែពណ៌បៃតងផ្ទុកទៅដោយវីតាមីន និងជាតិរ៉ែជាច្រើន ដែលសំខាន់សម្រាប់ជួយឲ្យរបួសឆាប់ជា ជាពិសេសវីតាមីន K និង C។ យកល្អគួរតែញ៉ាំបន្លៃពណ៌បៃតងយ៉ាងហោចណាស់ ២ពេលដែរក្នុងមួយថ្ងៃ ។ បន្លែពណ៌បៃតងដែលល្អមានដូចជា ស្ពៃស្ពីណាច ត្រកួន ប្រូខូលីជាដើម។
២-អាហារសម្បូរវីតាមីន C ៖ វីតាមីន C មាននាទីជំរុញដល់ការលូតលាស់កូឡាជែន ដែលសំខាន់សម្រាប់ជួយឲ្យរបួសជាលឿន ។ ចូរបញ្ចូលអាហារសម្បូរវីតាមីន C ក្នុងរបបអាហារប្រចាំថ្ងៃផងដូចជា ម្ទេសប្លោក ក្រូច ស្ត្របឺរី ល្ហុង ផ្កាខាត់ណា ស្វាយ និងម្នាស់ជាដើម។
៣-ចូរចៀសវាងអាហារដែលធ្វើឲ្យរបួសក្រជា ៖ ជាតិផ្អែមនិងប្រេង Hydrogenated នឹងបង្កើនការរលាក ដែលបន្ថយល្បឿននៃការជាសះរបួសបាន ។ ក្រៅពីនេះ អាហារកៃឆ្នៃក៏ធ្វើឲ្យរបួសក្រជាដែរ ។
៤-ញ៉ាំទឹកឲ្យបានគ្រប់គ្រាន់ជាប្រចាំថ្ងៃ ៖ ការខ្សោះជាតិទឹកក៏បន្ថយល្បឿននៃការជាសះរបួសដែរ ។ បើសិនអ្នកជាមនុស្សស្រី ចូរប្រាកដថា អ្នកបានញ៉ាំប្រហែល៣,៧លីត្រក្នុងមួយថ្ងៃ។ បើសិនអ្នកជាមនុស្សស្រី ចូរប្រាកដថា អ្នកបានញ៉ាំទឹក២,៧លីត្រក្នុងមួយថ្ងៃ។
៥-ចូរគេងឲ្យបាន៩ ទៅ១០ម៉ោងក្នុងមួយយប់ ៖ ការគេងគឺជារឿងសំខាន់ដោយសារតែវាជួយឲ្យរាងកាយមានពេលជួសជុលកោសិកាដែលខូចខាត ។ ដូច្នេះចូរចូលគេងឲ្យបានទៀងម៉ោង ហើយត្រូវប្រាកដថា អ្នកបានគេងយ៉ាងហោចណាស់៩ម៉ោងក្នុងមួយយប់ហើយ។ បើសិនជាអ្នកភ្ញាក់ពីគេងម៉ោង ៦ព្រឹកទៅសាលា ឬធ្វើការ ចូរប្រាកដថា អ្នកចូលគេងម៉ោង ៩ ឬ១០(ប្រភពពី៖ Health.com.kh) ៕ (កែសម្រួលដោយ ៖ បុប្ផា)
ចែករំលែកព័តមាននេះ