រាជធានីភ្នំពេញ ៖ បង្គោលស្លាកសញ្ញាចរាចរណ៍ចំនួន២ដើមបានរងការចខូចខាតដោយមួយដើមបាក់រាបដល់ដី និងមួយដើមទៀតគ្រាន់តែទ្រេតបន្តិចបន្ទួចដោយសារតែរថយន្តម៉ាកសាំយ៉ុងមួយគ្រឿងដែលមានដឹកឈើប្រណិតប្រភេទសុក្រំពេញខាងក្នុងពេញដឹកតាំងពីខេត្តបាត់ដំបងចូលមកភ្នំពេញមកបុកទាំងព្រឹករួចហើយបុរសម្នាក់ និងស្ត្រីវ័យក្មេងម្នាក់(សរុប២នាក់)នាំគ្នាចុះរត់គេចខ្លួនបាត់ស្រមោលអស់នោះ ។
ករណីគ្រោះថ្នាក់ចារចរណ៍នេះដែរបានកើតឡើងកាលពីវេលាម៉ោង៩និង០០នាទីព្រឹក ថ្ងៃទី ០១ ខែមករា ឆ្នាំ២០១៩ នៅត្រង់ចំណុចផ្លូវលេខព្រះស៊ីសុវត្ថិ កែងផ្លូវលេខ៨០ ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុគឺរថយន្តម៉ាកសាំយ៉ុង ពណ៌ស ពាក់ផ្លាកលេខ បាត់ដំបង ២B-២១៣២ មួយគ្រឿង ដែលបើកបរដោយបុរសម្នាក់ និង ស្ត្រីម្នាក់ទៀតដែលមានវ័យក្មេងៗប្រហាក់ប្រហែលគ្នារួមដំណើរជាមួយគ្នាបានបើកបរតាមបណ្តោយផ្លូវលេខ៨០ក្នុងទិសដៅពីលិចទៅកើត ។
លុះមកដល់ចំណុចកើតហេតុខាងលើបុរសជាអ្នកបើកបរក៏បានបួងចង្កូតរថយន្តក្នុងគោលបំណងបត់ស្តាំដៃតែជាន់ហ្វ្រាំងមិនស៊ីក៏រ៉េចង្កូតឡើងទៅលើចិញ្ចើមផ្លូវទៅបុកផ្លាកសញ្ញាចរាចរណ៍មួយដើមបណ្តាលអោយបាក់រាបដល់ដី និងមួយដើមទៀតធ្វើអោយទ្រេតស្ទើរតែដួលមួយដើមទៀត និងជាប់ទៅមុខលែងរួចជាប់តែម្តង ។
តាមប្រភពដដែលបានប្រាប់បន្តទៀតថា ក្រោយរថយន្តម៉ាកសាំយ៉ុងបុកបង្គោលស្លាកសញ្ញាចរាចរណ៍ទាំង២ដើមជាប់រួចហើយបុរសជាអ្នកបើកបរ និងស្ត្រីម្នាក់ដែលរួមដំណើរបាននាំគ្នាចុះពីរថយន្តហៅម៉ូតូឌុបជិះរត់គេចខ្លួនបាត់ស្រមោលអស់ពីកន្លែងកើតហេតុ ។ ភ្លាមនោះកម្លាំងមានសមត្ថកិច្ចមូលដ្ឋានក៏បានចុះមកដល់ធ្វើការត្រួតពិនិត្យក្នុងរថយន្តម៉ាកសាំយ៉ុងមួយគ្រឿងនោះមានដឹកឈើប្រណិតប្រភេទសុក្រំជាច្រើនកំណាត់ពេញមួយរថយន្តតែម្តង ។
ពាក់ព័ន្ធទៅនឹងករណីគ្រោះថ្នាក់ចរាចរណ៍នេះដែរ គឺបង្ករឡើងដោយសារតែរថយន្តម៉ាកសាំយ៉ុងខាងលើដាច់ហ្វ្រាំងជាន់មិនស៊ីដោយឈើប្រណិតទាំងប្រភេទសុក្រំទាំងនេះត្រូវបានគេដឹងថា «គេបានដឹកយកមកតាំងពីខេត្តបាត់ដំបង និងក្នុងបំណងយកទៅអោយឈ្មួញនៅឯម្តុំបឹងត្របែក» មិនទាន់នឹងដល់ផងក៏បង្កគ្រោះថ្នាក់ចរាចរណ៍បែបនេះតែម្តង ។
ក្រោយពេលកើតហេតុកម្លាំងមានសមត្ថកិច្ចមូលដ្ឋានក៏បានចុះមកដល់កន្លែងកើតហេតុ និងរាយការណ៍ប្រាប់ទៅខាងកម្លាំងនគរបាលចរាចរណ៍ផ្លូវគោករាជធានភ្នំពេញអោយយករថយន្តស្ទូចមកស្ទូចយកទៅរក្សាទុក លុះរហូតដល់ម៉ោង ១១ និង ១៥នាទីព្រឹកថ្ងៃដដែលជាង២ម៉ោងក្រោយមកទើបគេបានឃើញបុរសជាអ្នកបើកបររថយន្ត និងស្ត្រីវ័យក្មេងម្នាក់ជាអ្នករួមដំណើរជិះម៉ូតូឌុមមួយគ្រឿងមកកាន់កន្លែងកើតហេតុវិញ ។
ភា្លមនោះកម្លាំងមានសមត្ថកិច្ចសម្រេចបញ្ជូនទាំងរថយន្តសាំយ៉ុងដឹកឈើប្រណិតបង្ក និងម្ចាស់ប្រុសស្រីទាំងពីរនាក់ទៅកាន់ការិយាល័យចរាចរណ៍ផ្លូវគោករាជធានីភ្នំពេញដើម្បីធ្វើការដោះស្រាយគ្នាជាបន្តទៅទៀតផងដែរ ៕
ចែករំលែកព័តមាននេះ