រាជធានីភ្នំពេញ ៖ ទោះបីមិនបានបញ្ចេញឈ្មោះក្តី អ្នកនាំពាក្យគណបក្សប្រជាជនកម្ពុជាលោក សុខ ឥសាន បានប្រៀបធៀបក្រុមប្រឆាំងនៅក្រៅប្រទេស គឺជាសត្វឆ្កែដែលកំពុងព្រុសមនុស្ស តែមនុស្សមិនព្រុសវិញទេ ។
លោកសុខ ឥសាន បានឲ្យដឹង នៅថ្ងៃទី២ វិច្ឆិកា ឆ្នាំ២០១៨ថា ពេលដែលឆ្កែព្រុសយើងជាមនុស្សមិនព្រុសតបទៅឆ្កែវិញទេ ។ ព្រោះថា នៅពលដែលសភាពការណ៍នយោបាយកម្ពុជាបាន និងកំពុងរីកចម្រើនទៅមុខមានពពួកឆ្កែទាំងក្នុងស្រុកទាំងក្រៅស្រុក នាំគ្នាបំផុសបញ្ហាផ្សេងៗជាចំណុចអវិជ្ជមាន ដើម្បីបំភិតបំភ័យ និងបំភាន់មតិប្រជាជនកម្ពុជា ។ លោកបន្តថា នៅពេលថ្នាក់ដឹកនាំរាជរដ្ឋាភិបាលកម្ពុជានៅក្នុងស្រុកគេថា ចាំដល់ទៅក្រៅប្រទេសអន្តរជាតិនឹងដាក់គម្នាបបង្ខំឲ្យស្តាឡើងវិញលទ្ធិប្រជាធិបតេយ្យ និងសិទ្ធិមនុស្ស ហើយនៅពេលប្រមុខរាជរដ្ឋាភិបាលនៅក្រៅប្រទេសគេថា មានការគាបសង្កត់ ហើយដល់ចូលប្រទេសវិញនឹងមានការចរចារកដំណោះស្រាយដូចពួកគេចង់បានជាមិនខាន ។
លោកបញ្ជាក់ថា «ទោះពួកគេនិយាយថា យ៉ាងណាក៏សភាពការណ៍នៅតែវិវត្តន៍ទៅមុខជាធម្មតាដដែល ស្ថិរភាពនយោបាយនៅតែមានជីវភាពរស់នៅរបស់ប្រជាជន នៅតែរីកចម្រើនទៅមុខ ប្រជាជនសប្បាយរីករាយនឹងសន្តិភាព ស្ថិរភាពនយោបាយគិតតែសប្បយ រីករាយនឹងធ្វើបុណ្យទានតាមទីវត្តអារាមតាមភូមិ ឃុំ មិនខ្វល់នឹងអាណាជាប់គុក អាណារត់ចោលស្រុក និងអាណាធ្វើបាតុកម្មឡើយ» ។ លោកបន្ថែមថា ដូច្នេះការនិយាយបំផុសពីបញ្ហាផ្សេងៗផ្ទុយពីការពិតគ្មានប្រសិទ្ធិភាពចំពោះប្រជាជនកម្ពុជាទាល់តែសោះ ទោះពួកគេនិយាយថា យ៉ាងណាក៏គ្មានបានការដែរ ពីព្រោះប្រជាជនបានដឹងការពិតអស់ហើយ ទុកឲ្យពួកគេទាំងនោះនិយាយអីនិយាយទៅមិនបាច់ខ្វល់ជាមួយពួកគេឡើយប្រៀបនឹងឆ្កែព្រុស យើងកុំព្រុសតាមឆ្កែអី ។ ជាមួយគ្នានោះដែរអ្នកនាំពាក្យគណបក្សកាន់អំណាចក៏បានលើកឡើងថា គ្មានការបោះឆ្នោតឡើងវិញ តាមការចង់បានរបស់ក្រុមប្រឆាំងនោះទេសម្រាប់នៅកម្ពុជា ។
លោកបន្តថា ការបោះឆ្នោតនីតិកាលទី៦ បានប្រព្រឹត្តទៅរួចហើយ នៅថ្ងៃទី២៩ ខែកក្កដា ឆ្នាំ២០១៨ ដោយមានប្រជាជនកម្ពុជាចូលរួម៨៣.០២ភាគរយបោះឆ្នោត ហើយគណបក្សប្រកួតប្រជែងទាំង២០គណបក្ស សុទ្ធតែទទួលបានសម្លេងឆ្នោត ។ លោកក៏បានលើកឡើងថា ក្រោយប្រកាសលទ្ធផលបោះឆ្នោតជាផ្លូវការ និងជាស្ថាពរហើយនៅថ្ងៃទី០៥ ខែកញ្ញា ២០១៨ មានការប្រជុំដំបូងរដ្ឋសភាក្រោមព្រះរាជាធិបតីភាពនៃព្រះមហាក្សត្រនៃព្រះរាណាចក្រកម្ពុជាស្របតាមស្មារតីរដ្ឋធម្មនុញ្ញបង្កើតបានក្បាលម៉ាស៊ីនរដ្ឋសភានីតិកាលទី៦ និងរដ្ឋសភាបានផ្តល់សេចក្តីទុកចិត្តលើសមាសភាពរាជរដ្ឋាភិបាលកម្ពុជានីតិកាលទី៦ ដែលមានសម្តេចតេជោហ៊ុន សែន ជានាយករដ្ឋមន្ត្រី ។
លោកបន្ថែមថា ក្រោយការបង្កើតរដ្ឋសភា និងរាជរដ្ឋាភិបាលកម្ពុជារួចហើយ បណ្តាប្រទេសលើពិភពលោករួមទាំងមហាអំណាចផងបានអបអរសាទរ និងគាំទ្ររាជរដ្ឋាភិបាលថ្មីព្រមទាំងបានអញ្ជើញប្រមុខរាជរដ្ឋាភិបាលកម្ពុជាចូលរួមប្រជុំមមហាសន្និបាតអង្គការសហប្រជាជាតិ (អ.ស.ប) លើកទី៧៣ នៅទីក្រុងញូវយ៉កប្រជុំកំពូលនៅជប៉ុនប្រជុំកំពូលនៅហ្សាការតាប្រទេសឥណ្ឌូណេស៊ី ប្រជុំកំពូលនៅទីក្រុងហ្សឺណែវ និងធ្វើទស្សនកិច្ចផ្លូវការនៅបណ្តាប្រ ទេសជាច្រើនទៀត លើពិភពលោកដែលបញ្ជាក់ថា អន្តរជាតិបានទទួលស្គាល់រាជរដ្ឋាភិបាល ថ្មីនីតិកាលទី៦ ។
ដូច្នេះលទ្ធភាពនៃការបោះឆ្នោតឡើងវិញ មុនចប់នីតិកាលទី៦ គឺគ្មានជាដាច់ខាត ។ អ្នកនាំពាក្យគណបក្សកាន់អំណាចរូបនេះក៏បានអះអាងថា លទ្ធភាពនៃការបោះឆ្នោតនីតិកាលទី៧ នាឆ្នាំ២០២៣ ពិតជានឹងត្រូវធ្វើស្របតាមស្មារតីរដ្ឋធម្មនុញ្ញ គឺ៥ឆ្នាំបោះឆ្នោតម្តង ។ ចំពោះឥស្សរជនអតីតបក្សប្រឆាំងដែលមាននីតិសម្បទានយោបាយឡើងវិញ តាមសាលដីកាស្ថាពររបស់តុលាការកំពូលនៃកម្ពុជាអាចមកធ្វើនយោបាយបានឡើងវិញ ដោយអាចបង្កើតគណបក្សនយោបាយថ្មីសម្រាប់ប្រកួតប្រជែងបោះឆ្នោតពីព្រោះអតីតបក្សប្រឆាំងបានងាប់បាត់ទៅហើយតាមសាលដីកាតុលាការកំពូលរួចហើយមិនអាចរស់ឡើងវិញជាដាច់ខាតមិនបាច់រង់ចាំឡើយ ៕
ចែករំលែកព័តមាននេះ