រាជធានីភ្នំពេញ ៖ រយៈពេល៨ខែដើមឆ្នាំនេះ ខេត្តសៀមរាបទទួលបានភ្ញៀវទេសចរសរុបជាង៤លាននាក់ ក្នុងនោះភ្ញៀវទេសចរអន្តរជាតិមានប្រមាណ១,៧លាននាក់ ក្នុងកំណើន៨,៤៧% បើធៀបនឹងគ្រាដូចគ្នានៃឆ្នាំមុន។ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប ។
ប្រធានមន្ទីរទេសចរណ៍ខេត្ត លោក ងូវ សេងកាក់ បានឲ្យដឹងថា ក្នុងចំណោមភ្ញៀវទេសចរអន្តរជាតិដែលចូលមកទស្សនានៅខេត្តសៀមរាប ទេសចរចិនស្ថិតក្នុងលំដាប់ថ្នាក់លេខ១ មានជាង៧៥ម៉ឺននាក់ ក្នុងកំណើនជាង៤៤% ។ លោកបន្ដថា ៖« ប៉ុន្មានខែចុងក្រោយនេះ ភ្ញៀវមកពីប្រទេសចិនមានកំណើនខ្ពស់គួរឲ្យចាប់អារម្មណ៍ ព្រោះថាបើតាមតួលេខថ្មីៗនេះ ក្នុង១ខែភ្ញៀវចិនមកកាន់ខេត្តសៀមរាប មានប្រមាណជិត១០ម៉ឺននាក់ ដូច្នេះហើយគោលដៅរបស់យើង គឺបាញ់ឆ្ពោះទៅការបំពេញតម្រូវការឬសេវាកម្មឲ្យទេសចរចិនជាអាទិភាព »។ លោកបន្ថែមថា នៅខេត្តសៀមរាប ពិសេសតំបន់អង្គរ ថ្នាក់ដឹកនាំខេត្ត រួមទាំងមន្ទីរទេសចរណ៍ និងផ្នែកពាក់ព័ន្ធ បាននិងកំពុងខិតខំរួមគ្នាពង្រឹងសន្តិសុខសណ្តាប់ធ្នាប់ សំខាន់ការពារសុវត្ថិភាពជូនភ្ញៀវទេសចរ ។ ទន្ទឹមនោះ បន្តយកចិត្តទុកដាក់ក្នុងការបង្កើតនូវផលិតផលទេសចរណ៍ថ្មីបន្ថែមទៀត ដើម្បីទាក់ទាញការស្នាក់នៅរបស់ភ្ញៀវទេសចរ ។
លោកប្រធានមន្ទីរបញ្ជាក់ថា ៖« ការបង្កើតផលិតផលទេសចរណ៍ថ្មីៗនេះ គឺយើងអនុវត្តតាមគោលការណ៍ការពារ និងពង្រឹងផលិតផលទេសចរណ៍ចាស់ៗឲ្យមានការប្រែប្រួល ឬអភិវឌ្ឍន៍ស្របតាមនិយាម(ស្ដង់ដា)និងកាលៈទេសៈ។ ទន្ទឹមនោះ យើងខិតខំពង្រីកផលិតផលទេសចរណ៍ថ្មីបន្ថែមទៀតតាមដែលអាចធ្វើទៅបាន ដើម្បីបំពេញតម្រូវការភ្ញៀវទេសចរ ឬអាចនិយាយថា ឲ្យភ្ញៀវទេសចរគាត់មានជម្រើសច្រើននៅពេលមកកម្សាន្តនៅខេត្តសៀមរាប »។ លោកបន្ថែមថា ៖« ចំពោះផលិតផលទេសចណ៍ថ្មីៗដូចជា សហគមន៍ទេសចរណ៍ ដែលយើងទើបនឹងបង្កើតឡើងនោះ ត្រូវធ្វើយ៉ាងណាប្រកបដោយស្តង់ដា រួមទាំងការទទួលខុស ត្រូវទាំងសោភ័ណភាព និងសេវាកម្ម សំខាន់ធ្វើយ៉ាងម៉េចតម្រូវចិត្តភ្ញៀវ »។
តាមការបញ្ជាក់ពីលោកប្រធានមន្ទីរ ភ្ញៀវទេសចរដែលមកទស្សនានៅខេត្តសៀមរាប គឺភាគច្រើនសំដៅទៅទស្សនានៅអង្គរ ។ បន្ទាប់មកតំបន់ក្រុងសៀមរាប ក៏ជាគោលដៅទាក់ទាញភ្ញៀវទេសចរផងដែរ ។ ចំណែករមណីយដ្ឋានផ្សេងទៀតដូចជា តំបន់បឹងទន្លេសាបដែលមាន៥គោលដៅ រួមមាន តំបន់ចុងភ្នាស កំពង់ភ្លុក កំពង់ឃ្លាំង សហគមន៍ជ្រាវ និងព្រែកជ្រៃ ក៏កំពុងទាក់ទាញចំណាប់អារម្មណ៍របស់ភ្ញៀវទេសចរជាតិ និងអន្តរជាតិផងដែរ ។ លោកប្រធានមន្ទីរបានអះអាងថា ដើម្បីពង្រឹងនិងពង្រីក ឬអភិវឌ្ឍន៍រមណីយដ្ឋានទេសចរណ៍ ឬផលិតផលទេសចរណ៍ថ្មីៗទទួលបានជោគជ័យ លុះត្រាតែមានការសហការឬការចូលរួមពីគ្រប់ផ្នែកទាំងអស់ ក្នុងនោះអ្វីដែលសំខាន់គឺដៃគូមិនអាចខ្វះបានពីវិស័យឯកជន ។
ទន្ទឹមនឹងនេះ លោករំពឹងថា តាមរយៈគោលនយោបាយរបស់រាជរដ្ឋាភិបាល រួមទាំងគោលការណ៍ និងការណែនាំជាប្រចាំរបស់ក្រសួងទេសចរណ៍ វិស័យទេសចរណ៍នៅទូទាំងប្រទេសនិយាយរួម ហើយនិយាយដោយឡែក នៅខេត្តសៀមរាប នឹងដំណើរការអភិវឌ្ឍប្រកបដោយចីរភាព ៕
ចែករំលែកព័តមាននេះ