ខេត្តបន្ទាយមានជ័យ ៖ ជនសង្ស័យប្រុសស្រី៩នាក់ ស្នាក់នៅបន្ទប់ជួលកាស៊ីណូក្រោនរីសតត្រូវបានឃាត់ខ្លួន ករណីជួញដូរចែកចាយប្រើប្រាស់គ្រឿងញៀនដែលត្រូវបានកសាងសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១៨ ខែកក្កដា ឆ្នាំ២០១៨ ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ជនសង្ស័យប្រុសស្រី៩នាក់ ដែលត្រូវចាប់ខ្លួនមាន១- ឈ្មោះ ង្វៀង ឌឹកញ៉ឹក(ហៅតាយួន) ភេទប្រុស អាយុ៤៨ឆ្នាំ (ជនជាតិវៀតណាម) ២- ឈ្មោះ អូល រ៉ូម៉ាកូឡាប ភេទស្រី អាយុ៣០ឆ្នាំ (ជនជាតិថៃ) ៣- ឈ្មោះ ផាន់ ស៊ីណា ហៅស្រីម៉ៅ ភេទស្រី អាយុ៣០ឆ្នាំ (ជនជាតិខ្មែរ) ៤-ឈ្មោះ សយ សុខឃឿន ភេទស្រី អាយុ៤២ឆ្នាំ (ខ្មែរ) ៥- ឈ្មោះ ស៊ឹម ពៅ ភេទប្រុស អាយុ២៥ឆ្នាំ (ខ្មែរ) ៦- ឈ្មោះ ឈួន សុក្រជាតិ ភេទប្រុស អាយុ៣៣ឆ្នាំ (ខ្មែរ) ៧- ឈ្មោះ ជា សុខា ភេទប្រុស អាយុ៣៤ឆ្នាំ (ខ្មែរ) ៨- ឈ្មោះ ផូរ សុភ័ក្រ ភេទប្រុស អាយុ៣៣ឆ្នាំ (ខ្មែរ) ៩- ឈ្មោះ អាយ ចិន្ត្រា (ហៅខ្លា) ភេទប្រុស អាយុ៤១ឆ្នាំ ជនសង្ស័យស្នាក់នៅបន្ទប់ជួយលេខ២២៩ ក្នុងកាស៊ីណូក្រោនរីសត ស្ថិតភូមិក្បាលស្ពានមួយ សង្កាត់ក្រុងប៉ោយប៉ែត ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានបញ្ជាក់ថា នៅពេលឃាត់ខ្លួនជនសង្ស័យប្រុសស្រី៩នាក់ មានជនជាតិថៃ និងវៀតណាម ខ្មែរ គឺកម្លាំងកងរាជអាវុធហត្ថក្រុងប៉ោយប៉ែតបានស្រាវជ្រាវមុខសញ្ញាហើយធ្វើការបង្ក្រាប និងឃាត់ខ្លួនបានចំនួន៩នាក់ ក្នុងបន្ទប់ជួលកាស៊ីណូក្រោនរីសត ព្រមទាំងដកហូតគ្រឿងញៀនប្រភេទមេតំហ្វេតាមីនខេទឹកកកចំនួន២៣ថង់តូច ស្មើរ១១.២៣ក្រាម យ៉ាម៉ាចំនួន៩គ្រាប់ គ្រឿងញៀន អ៊ិចស្តាស៊ី ចំនួន២គ្រាប់ និងឧបករណ៍ជក់មួយចំនួនទៀត ដែលបង្ក្រាបនៅម៉ោង២រសៀល ថ្ងៃទី១៧ ខែកក្កដា ឆ្នាំ២០១៨ នៅសង្កាត់ក្រុងប៉ោយប៉ែត ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានបញ្ជាក់ថា ក្រោយពេលឃាត់ខ្លួនជនសង្ស័យប្រុសស្រី៩នាក់ និងវត្ថុតាងគ្រឿងញៀនបានកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់ ហើយស្រាវជ្រាវរកមុខសញ្ញាជនល្មើសជួញដូរ និងចែកចាយនៅក្រុងប៉ោយប៉ែតដែលកំពុងធ្វើសកម្មភាពជួញដូរ និងចែកចាយ ដើម្បីចាត់ការតាមច្បាប់ ៕
ចែករំលែកព័តមាននេះ