ខេត្តកំពត ៖ មនុស្សពីរនាក់បានរងរបួសធ្ងន់ស្រាលខណៈម៉ូតូពីរគ្រឿងប៉ះទង្គិចគ្នាពេញទំហឹង នៅលើកំណាត់ផ្លូវជាតិលេខ៣ ក្នុងទិសដៅស្របគ្នា ។ ហេតុការណ៍នេះបានកើតឡើងនៅវេលាម៉ោង៦និង៣០នាទីព្រឹកថ្ងៃទី១០ ខែឧសភា ឆ្នាំ២០១៨ ត្រង់ចំណុចស្ពានព្រះពន្លា ក្នុងភូមិត្រពាំងជ្រៃ ឃុំត្រពាំងធំ ស្រុកទឹកឈូ ខេត្តកំពត ។
តាមប្រភពព័ត៌មាននៅកន្លែងកើតហេតុបាននិយាយថា មុនពេលប៉ះទង្គិចគ្នាយ៉ាងដំណំនេះគេឃើញម៉ូតូមួយគ្រឿងជិះម្នាក់ឯងក្នុងទិសដៅពីជើងទៅត្បូងក្នុងល្បឿនបង្គួរ ។ លុះមកដល់ចំណុចកើតហេតុក៏មានម៉ូតូមួយគ្រឿងទៀត ជិះម្នាក់ឯងដូចគ្នាបានបោះពួយតាមក្រោយ ក្នុងទិសដៅស្របគ្នា ដោយប្រើល្បឿនមិនធម្មតា ស្រាប់តែមកដល់ចំណុចគ្រោះថ្នាក់ ម៉ូតូនោះក៏ជ្រុលទៅបុកកន្ទុយម៉ូតូខាងមុខយ៉ាងពេញទំហឹង បណ្តាលឱ្យម៉ូតូទាំងពីរគ្រឿងដួលច្រងាប់ច្រងិលដូចគ្នា ។
ប្រភពដដែលបានបន្តថា ខណៈនោះគេឃើញម្ចាស់ម៉ូតូទាំងពីរគ្រឿងរងរបួសដេករដូករណែលដូចគ្នា ហើយយានយន្តទាំងពីរក៏រងការខូចខាតដូចគ្នាផងដែរ ។
ទាក់ទិននឹងករណីគ្រោះថ្នាក់ចរាចរណ៍ខាងលើ បើតាមសមត្ថកិច្ចជំនាញបានបញ្ជាក់ថា ផ្តើមដោយសារភាគីម៉ូតូខាងក្រោយ បើកបរក្នុងល្បឿនលើសកម្រិត និងខ្វះការប្រុងប្រយ័ត្ន ទើបងាយបង្កជាគ្រោះថ្នាក់យ៉ាងធ្ងន់ធ្ងរបែបនេះ ។
សមត្ថកិច្ចបានបញ្ជាក់ទៀតថា អ្នកបើកបរម៉ូតូខាងមុខឈ្មោះ ឡេង សុខណា ភេទប្រុស អាយុ២៤ឆ្នាំ(របួសស្រាល) រស់នៅភូមិព្រែកអំពិល ឃុំកោះតូច ស្រុកទឹកឈូ ខេត្តកំពត ជិះម៉ូតូម៉ាកសេ១២៥ ស៊េរីឆ្នាំ២០០៨ ពាក់ស្លាកលេខ កំពត 1B-6255 ។
ដោយឡែកភាគីម្ខាងទៀតបានរងរបួសធ្ងន់មិនស្គាល់អត្តសញ្ញាណ ដោយសារ ក្រោយពីកើតហេតុត្រូវបានក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យប្រទេសវៀតណាមភ្លាមៗ ហើយជនរងគ្រោះនេះជិះម៉ូតូម៉ាកសេ១២៥ ពណ៌ខ្មៅ ផលិតឆ្នាំ២០១៥ ពាក់ស្លាកលេខ កំពត 1I -7205 ។
បច្ចុប្បន្នមធ្យោបាយទាំងពីរគ្រឿងត្រូវបានសមត្ថកិច្ចជំនាញនាំយកទៅរក្សាទុកសម្រាប់ដោះស្រាយគ្នានៅពេលក្រោយ ៕
ចែករំលែកព័តមាននេះ