ខេត្តកំពង់ឆ្នាំង ៖ ប្រជាកសិកររស់នៅក្នុងឃុំសេដ្ឋី ស្រុកសាមគ្គីមានជ័យ ជាង១០គ្រួសារ បានជោគជ័យ លើមុខរបរចិញ្ចឹមត្រីអណ្តែងក្នុងរណ្តៅប្លាស្ទីក បន្ទាប់ពីទទួលការជួយបង្ហាត់បង្រៀនបច្ចេកទេសចិញ្ចឹមពីមន្ត្រី ខណ្ឌរដ្ឋបាលជលផលកំពង់ឆ្នាំង ក្រោមជំនួយឧបត្ថម្ភពីសហគមន៍អឺរ៉ុប។ មន្ត្រីជលផលបានឲ្យដឹងថា៖ ការចិញ្ចឹមត្រីអណ្តែងក្នុងរណ្តៅប្លាស្ទីកដូចនេះ គឺប្រើដើមទុនតិច មិនត្រូវការមានដីធំសម្រាប់ជីកស្រះឡើយ តែបាន ផ្តល់មកវិញនូវអត្ថប្រយោជន៍យ៉ាងច្រើនដល់សេដ្ឋកិច្ចគ្រួសារប្រជាកសិករនៅតាមមូលដ្ឋាន។ ប្រជាពលរដ្ឋជាយោធិន ពិការមួយរូបបានឲ្យដឹងថា ក្រោយពីបានចាប់យកមុខរបរចិញ្ចឹមត្រីអណ្តែងក្នុងរណ្តៅប្លាស្ទីកនៅក្នុងលំនៅដ្ឋាន បានបញ្ជាក់ឲ្យដឹងថា កាលមុនគាត់មានជីវភាពលំបាកណាស់ ប៉ុន្តែក្រោយពីជលផលបានជួយបណ្តុះបណ្តាល ចិញ្ចឹមត្រីអណ្តែងនៅក្នុងរណ្តៅថង់ប្លាស្ទីកមកគ្រួសារគាត់ មានជីវភាពសមរម្យ មិនជួបការខ្វះខាតដូចមុនទៀតឡើយ។
បច្ចុប្បន្នត្រីគាត់លក់ចេញបាន១គីឡូក្រាម ៥.៥០០រៀល គាត់លក់ម្តងបានពី៣០ទៅ៤០ម៉ឺន ហើយគាត់ត្រីគាត់មានលក់បន្ត។ លោក សោម ភិរុណ បានបញ្ជាក់ថា ដោយការយកចិត្តទុកដាក់ពីសំណាក់ប្រមុខរាជ រដ្ឋាភិបាលកម្ពុជា លើជីវភាពប្រជាកសិករ និងយោធិនពិការ រដ្ឋបាលជលផល ដែលមានខណ្ឌរដ្ឋបាលជលផលជា សេនាធិការ បានចុះដល់មូលដ្ឋានជួយផ្តល់នូវបច្ចេកទេស សម្ភារ កូនត្រីពូជ ចំណី សម្រាប់ការចិញ្ចឹមត្រីអណ្តែង ដោយវិធីសាមញ្ញៗជូនប្រជាពលរដ្ឋ និងអាចឲ្យពួកគាត់ចិញ្ចឹមត្រីអណ្តែងបានដោយងាយ ក្រោមជួយឧបត្ថម ពីមូលនិធិសហគមន៍អឺរ៉ុប។ នៅក្នុងការចិញ្ចឹមត្រីអណ្តែងនេះដែរ ប្រជាកសិករអាចប្រមូលផលក្នុងរយៈពេល៣ខែម្តង បានប្រមាណពី២៥០ទៅ៣០០គីឡូក្រាម ដែលអាចលក់ទៅកាន់ទីផ្សារបានកម្រៃប្រមាណ១លានប្រាំសែនរៀល ដែលក្នុង១ឆ្នាំពួកគាត់អាចចិញ្ចឹមបាន៣ដង។
តាមរយៈគម្រោងនេះដែរ ប្រជាកសិករបានផ្លាស់ប្តូរទម្លាប់ពីការនៅទំនេរ មកមើលថែត្រីរបស់ពួកគាត់ដែលជាមុខរបរបន្ទាប់បន្សំនៅក្នុងលំនៅដ្ឋាន និងអាចកាត់បន្ថយបានការនាំគ្នាទៅនេសាទ ក្នុងដែននេសាទសាធារណៈ ដោយចេះចិញ្ចឹមត្រីដើម្បីលើកស្ទួយជីវភាពក្នុងគ្រួសារ និងធ្វើឲ្យពួកគាត់មានត្រីហូបប្រចាំថ្ងៃ និងជួយដល់សុខមាលភាពកុមារជាកូនចៅមិនអោយកង្វះអារហាររូបត្ថម និងក៏បានលក់ចេញទៅកាន់ទីផ្សារបានចំណូល ផងដែរ។ នាយខណ្ឌរដ្ឋបាលជលផលរូបនោះ សូមអំពាវនាវដល់ប្រជាកសិករទាំងអស់សូមងាកមកចាប់យកមុខរបរនេះ ព្រោះជាការងារមួយមានភាពងាយស្រួលមិនប្រើប្រាស់ដើមទុនច្រើនទេ និងមានការជំនួយទាំងបច្ចេកទេស សម្ភារ ពូជត្រី ពីខណ្ឌរដ្ឋបាលជលផលផងដែរ ក្រោយជំនួយឧបត្ថម្ភរបស់សហគមន៍អឺរ៉ុប៕
ចែករំលែកព័តមាននេះ