រាជធានីភ្នំពេញ ៖ ព្រលានយន្តហោះនៅខេត្តព្រះសីហនុកាន់តែសកម្ម ដោយបច្ចុប្បន្នមានក្រុមហ៊ុនអាកាសចរណ៍ជាច្រើនបានហោះហើរមកកាន់ព្រលាននេះ ស្របពេលវិស័យអាកាសចរណ៍នៅកម្ពុជាកំពុងបង្ហាញសញ្ញាវិជ្ជមាន ។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សិរីវុត្ថា បានថ្លែងតាមទូរស័ព្ទនាព្រឹកថ្ងៃទី២៧ មីនា បច្ចុប្បន្នព្រលានយន្តហោះអន្តរជាតិកងកេង ខេត្តព្រះសីហនុ កំពុងមានសកម្មភាពកាន់តែច្រើន ដោយមកដល់ពេលនេះ មានក្រុមហ៊ុនអាកាសចរណ៍ក្នុងស្រុក និងអន្តរជាតិ ចំនួន៥បាននិងកំពុងហោះហើរត្រង់មកកាន់ព្រលាននេះ។ លោកបន្តថា ចំនួននេះមិនទាន់រាប់បញ្ចូលនូវអាកាសចរណ៍ដែលហោះហើរម្តងម្កាលជាលក្ខណៈជួលនៅឡើយទេ ។
លោកបន្តថា ៖« ជាក់ស្តែង ក្រុមហ៊ុន Ruili Airline បានចាប់ផ្តើមហោះហើរត្រង់មកពីខេត្តយូណាន ឆ្ពោះមកកាន់ខេត្តព្រះសីហនុ ។ អាកាសចរណ៍នេះនឹងហោះហើរ៣លើកក្នុង១សប្តាហ៍មកកាន់ខេត្តនេះ ដែលធ្វើឲ្យព្រលានយន្តហោះអន្តរជាតិនេះមានសកម្មភាពហោះហើរកាន់តែច្រើន » ។
លោកបន្ថែមថា ៖« បច្ចុប្បន្ន ព្រលានយន្តហោះខេត្តនេះ បានបញ្ចប់នូវការជួសជុលពង្រីកព្រលាន និងចំណតអ្នកដំណើរដំណាក់កាលទី១ហើយ និងចាប់ផ្តើមពង្រីកព្រលាន ឬផ្លូវរត់របស់យន្តហោះបន្ថែមទៀតនៅឆ្នាំ២០១៩ខាងមុខ ។ ព្រលាននេះបច្ចុប្បន្ន មានផ្លូវរត់២.៨០០ម៉ែត្រ និងគ្រោងពង្រីកដល់៣.២០០ម៉ែត្រ ដែលអាចអនុញ្ញាតឲ្យយន្តហោះខ្នាតធំ ដែលដាក់អ្នកដំណើរចន្លោះពី៣០០ទៅ៣៥០នាក់អាចចុះចតបាន » ។
ទាក់ទងនឹងអាកាសចរណ៍ថ្មី ដែលទើបហោះហើរមកកាន់ខេត្តព្រះសីហនុ លោកបានឲ្យដឹងថា ក្រុមហ៊ុនអាកាសចរណ៍ Ruili បច្ចុប្បន្ន កំពុងក្លាយជាក្រុមហ៊ុនអាកាសចរណ៍គំរូមួយ បន្ទាប់ពីបានចាប់បើកជើងហោះហើរនៅក្នុងស្រុកក្នុងរយៈពេល៣ឆ្នាំមកនេះ ។ ក្រុមហ៊ុននេះមានការយកចិត្តទុកដាក់ពីរដ្ឋាភិបាល អាជ្ញាធរគ្រប់ជាន់ថ្នាក់នៃប្រទេសចិន រួមជាមួយការខិតខំប្រឹងប្រែងរបស់បុគ្គលិកក្រុមហ៊ុនអាកាសចរណ៍ Ruili ផ្ទាល់ គឺបានធ្វើឲ្យអាកាសចរណ៍ Ruili ព្យាយាមកសាងកេរ្តិ៍ឈ្មោះរបស់ខ្លួនបានល្អបំផុតនៅក្នុងខេត្តយូណាន មុនពេលក្រុមហ៊ុនបន្តបើកដំណើរការជើងហោះហើរទៅកាន់ក្រៅស្រុកបន្ថែមទៀត ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានថ្លែងថា ការមកដល់នៃអាកាសចរណ៍កាន់តែច្រើន សុទ្ធតែជាសញ្ញាវិជ្ជមានសម្រាប់ទីផ្សារទេសចរណ៍ និងពាណិជ្ជកម្មរបស់កម្ពុជា ព្រោះការហោះហើរត្រង់មិនត្រឹមតែនាំមកនូវភ្ញៀវទេសចរទេ តែក៏នាំមកនូវពាណិជ្ជកម្ម និងការវិនិយោគផងដែរ ។
លោកបន្តថា ៖« ជាគំនិតខ្ញុំ អាកាសចរណ៍មកពីទីណាក៏ដោយ ក៏យើងស្វាគមន៍ ហើយកាលណាមានអាកាសចរណ៍កាន់តែច្រើន កាន់តែល្អ យើងពិតជាស្វាគមន៍ » ៕
ចែករំលែកព័តមាននេះ