រាជធានីភ្នំពេញ ៖ ដើម្បីផ្សព្វផ្សាយទេសចរណ៍កម្ពុជានៅលើទីផ្សារអាទិភាព ក្នុងគោលបំណងទាក់ទាញវិនិយោគិនឲ្យកាន់តែច្រើនបន្ថែមទៀតមកកម្ពុជា រាជរដ្ឋាភិបាលបានបន្ដពង្រឹង និងគ្រប់គ្រងស្ថានតំណាងនៅក្រៅប្រទេសឲ្យកាន់តែក្លាំងខ្លាថែមទៀត ។ យោងតាមរបាយការណ៍បូកសរុបលទ្ធផលការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ បានបង្ហាញថា…
រាជធានីភ្នំពេញ ៖ ដើម្បីផ្សព្វផ្សាយទេសចរណ៍កម្ពុជានៅលើទីផ្សារអាទិភាព ក្នុងគោលបំណងទាក់ទាញវិនិយោគិនឲ្យកាន់តែច្រើនបន្ថែមទៀតមកកម្ពុជា រាជរដ្ឋាភិបាលបានបន្ដពង្រឹង និងគ្រប់គ្រងស្ថានតំណាងនៅក្រៅប្រទេសឲ្យកាន់តែក្លាំងខ្លាថែមទៀត ។
យោងតាមរបាយការណ៍បូកសរុបលទ្ធផលការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ បានបង្ហាញថា ក្រសួងបានធ្វើការពង្រឹង និងគ្រប់គ្រងស្ថានតំណាងនៅក្រៅប្រទេសចំនួន១១ក្រុមហ៊ុនកាលពីឆ្នាំ២០១៧ ដែលបានបង្កើតឡើងនៅលើទីផ្សារអាទិភាពចំនួន១២ប្រទេស ក្នុងនោះរួមមាន ៖ ទីផ្សារចិនចំនួន២ក្រុមហ៊ុន, ជប៉ុនចំនួន១ក្រុមហ៊ុន,ឥណ្ឌា និងស្រីលង្កាចំនួន១ក្រុមហ៊ុន, មជ្ឈិមបូព៌៌ាចំនួន១ក្រុមហ៊ុន, អឺរ៉ុប ហុងគ្រី ប៉ូឡូញ អូទ្រីស១ក្រុមហ៊ុន, រុស្ស៊ី ១ក្រុមហ៊ុន, អាមេរិក១ក្រុមហ៊ុន, កូរ៉េ ១ក្រុមហ៊ុន និងអឺរ៉ុប អុីតាលី ចំនួន១ក្រុមហ៊ុន ។
ទីប្រឹក្សាសមាគមទីភ្នាក់ងារទេសចរណ៍ លោក ហូ វណ្ឌី បានថ្លែងតាមទូរស័ព្ទនៅថ្ងៃទី១៩ មីនា ម្សិលមិញថា ការពង្រឹង និងការគ្រប់គ្រងស្ថានតំណាង មិនថាក្រសួងពាណិជ្ជកម្មក្តី ក្រសួងការបរទេសក្ដី ឬតំណាងវិនិយោគិនរបស់ខ្មែរនៅក្រៅប្រទេសទេ ត្រូវចូលរួមទាំងអស់ ជាពិសេសខាងពាណិជ្ជកម្ម គឺផ្តោតសំខាន់ទៅលើការផ្សព្វផ្សាយទាក់ទងនឹងទេសចរណ៍ ព្រោះពាណិជ្ជកម្មត្រូវតែផ្សារភ្ជាប់ជាមួយទេសចរណ៍ ។
លោកថ្លែងថា ៖ « បើទេសចរណ៍នាំមុខហើយនោះ ភ្ញៀវក៏មកលេងកាន់តែច្រើន ធ្វើឲ្យការវិនិយោគកាន់តែខ្លាំងឡើងៗ ។ ជាក់ស្តែងបច្ចុប្បន្ននេះ មានកូរ៉េ ជប៉ុន និងចិន មិនត្រឹមតែមកលេងកម្សាន្តប៉ុណ្ណោះទេ គឺគេមកវិនិយោគថែមទៀតផង ។ អីចឹង ទេសចរណ៍នាំមុខពាណិជ្ជកម្ម ទេសចរណ៍នាំមុខការវិនិយោគ ហើយក្រសួងការបរទេស ដែលតំណាងឲ្យទូតខ្មែរទាំងអស់ ក៏បានយល់ដឹងច្រើន និងតែងតែជួយផ្សព្វផ្សាយទេសចរណ៍តាមរយៈពាណិជ្ជកម្មនេះផងដែរ » ។
របាយការណ៍ក្រសួងទេសចរណ៍បានបង្ហាញថា កំណើនភ្ញៀវទេសចរនាឆ្នាំកន្លងមក ជាពិសេសឆ្នាំ២០១៧ កម្ពុជាបានសម្រេចនូវភ្ញៀវទេសចរជាង៥,៦លាននាក់ កើនឡើងជិត១២%ប្រៀបធៀបនឹងឆ្នាំ២០១៦ ។ នេះបានបញ្ជាក់ឲ្យឃើញពីការរីកលូតលាស់ និងជាសញ្ញានៃការរីកចម្រើននាពេលអនាគត ជាហេតុធ្វើឲ្យក្រសួងទេសចរណ៍គ្រោងថា ក្នុងឆ្នាំ២០១៨នេះ កម្ពុជាគ្រោងនឹងទទួលទេសចរអន្តរជាតិប្រមាណ៦,១០លាននាក់ ។ នៅឆ្នាំ២០២០ កម្ពុជានឹងអាចសម្រេចបានទេសចរអន្តរជាតិប្រមាណ៧លាននាក់ និងទេសចរក្នុងស្រុកប្រមាណ១៣លាន ។ ឯឆ្នាំ២០២៥ នឹងទទួលទេសចរអន្តរជាតិ១០លាននាក់ និងឆ្នាំ២០៣០កម្ពុជាគ្រោងនឹងទទួលទេសចរអន្តរជាតិរហូតដល់១២លាននាក់ ។
ដូច្នេះ សរុបចំនួនទេសចរជាតិ និងអន្តរជាតិប្រមាណ២០លាននាក់នៅឆ្នាំ២០២០ នឹងអាចរកចំណូលពីវិស័យទេសចរណ៍ប្រមាណជាង៦ពាន់លានដុល្លារអាមេរិកចាក់បញ្ចូលទៅក្នុងចរន្តសេដ្ឋកិច្ចកម្ពុជា ជំរុញបង្កើនឱកាសការងារ ប្រាក់ចំណូល ការអភិវឌ្ឍផ្នែកហេដ្ឋារចនាសម្ព័ន្ធពាក់ព័ន្ធ និងការអភិវឌ្ឍប្រកបដោយបរិយាបន្ន ក្នុងឱកាសការងារប្រមាណជាង១លាននាក់ត្រូវបានបង្កើតឡើងក្នុងរយៈពេលប៉ុន្មានឆ្នាំខាងមុខនេះ ។
លោក ហូ វណ្ឌី បន្ថែមថា រាល់ផែនការដែលយើងគ្រោងទុក គឺតែងតែរំពឹងជានិច្ច ហើយការរំពឹងនេះទៀត យើងយកចំណុចវិជ្ជមានច្រើនជាងចំណុចអវិជ្ជមាន ។ ជាក់ស្តែង ក្រសួងទេសចរណ៍បានដាក់ផែនការទាំងនេះសម្រាប់អ្នកទាំងអស់គ្នា មិនថាវិស័យរដ្ឋ ឬឯកជនឡើយ ត្រូវតែគោរព និងពង្រឹងច្បាប់ទាំងអស់គ្នាដើម្បីឲ្យគោលនយោបាយនោះទទួលបានជោគជ័យ ។
លោកបន្តថា ៖« យើងមានគោលនយោបាយរដ្ឋ និងឯកជន អីចឹង យើងត្រូវពង្រឹងច្បាប់ធ្វើយ៉ាងណាឲ្យគោលនយោបាយនោះក្លាយជាការពិត ព្រោះអ្នកទាំងពីរជាដៃគូដែលកំពុងជិះទូកជាមួយគ្នា ហើយត្រូវធ្វើយ៉ាងណាឲ្យទទួលបានជោគជ័យ ព្រោះបើកាលណាផែនការទទួលបានលទ្ធផលល្អហើយ បានន័យថា យើងជោគជ័យទាំងអស់គ្នា សូម្បីចក្ខុវិស័យឆ្នាំ២០២០ ឬឆ្នាំ២០៣០ » ។
លោកបញ្ជាក់ថា ជាង១០ឆ្នាំមកនេះ អ្នកដែលគ្មានអាជ្ញាប័ណ្ណត្រឹមត្រូវ គ្មានចំណេះ ជំនាញច្បាស់លាស់ទៅបម្រើការងារក្នុងវិស័យមួយនេះ តែមិនទាន់លុបបំបាត់បាននៅឡើយ ហើយវាជាបញ្ហាមួយយ៉ាងធំ ។ ដូច្នេះ ដើម្បីឲ្យចក្ខុវិស័យទទួលជោគជ័យ ក្នុងនោះយើងទាមទារឲ្យប្រតិបត្តិករទាំងអស់ត្រូវតែសិក្សាពីផ្លូវច្បាប់ និងត្រូវផ្ដល់គុណភាពនៃសេវាកម្ម បើសិនជាគាត់ធ្វើមិនបាន មិនព្រមសហការ គឺក្រសួងនៅតែបន្តការឈឺក្បាលទៀត ។
គួររំលឹកថា ក្នុងឆ្នាំ២០១៧ ភ្ញៀវទេសចរអន្តរជាតិមកទស្សនាកម្ពុជាសរុបចំនួន៥,៦លាននាក់ កើនឡើង១១,៨% ធៀបនឹងឆ្នាំ២០១៦ ក្នុងនោះរួមមាន ផ្លូវអាកាសកើនឡើង២២,៥% ផ្លូវគោកថយចុះ០,៥% និងផ្លូវទឹកថយចុះ៥,២% ។
សូមបញ្ជាក់ដែរថា និន្នាការនៃតម្រូវការទេសចរមកពីក្រៅចូលមកកាន់ប្រទេសកម្ពុជាមានកំណើនខ្ពស់ និងសន្ទុះខ្លាំង ។ ក្នុងនោះមានទេសចរអន្តរជាតិជាង១២%នៅឆ្នាំកន្លងទៅ ហើយនៅប៉ុន្មានឆ្នាំខាងមុខនេះ ក្រសួងក៏រំពឹងនៅក្នុងកំណើនលេខ២ខ្ទង់ជាង១០%ប្រចាំឆ្នាំទៀត រហូតដល់ឆ្នាំ២០២០ ឬអាចរហូតដល់ឆ្នាំ២០៣០ ៕
ចែករំលែកព័តមាននេះ