រាជធានីភ្នំពេញ ៖ ប្រភេទសត្វស្លាបដែលជិតផុតពូជមួយចំនួនរស់នៅកម្ពុជា បច្ចុប្បន្ន កំពុងក្លាយជាគោលដៅទាក់ទាញភ្ញៀវទេសចរបរទេស ឱ្យចំណាយប្រាក់រាប់ពាន់ដុល្លារមកទស្សនានៅកម្ពុជា និងផ្តល់ជាប្រយោជន៍សម្រាប់សហគមន៍ និងស្ថាប័នពាក់ព័ន្ធ ។ នេះបើតាមការលើកឡើងពីនាយកកម្មវិធីអង្គការជីវិតសត្វស្លាបអន្តរជាតិប្រចាំកម្ពុជា…
រាជធានីភ្នំពេញ ៖ ប្រភេទសត្វស្លាបដែលជិតផុតពូជមួយចំនួនរស់នៅកម្ពុជា បច្ចុប្បន្ន កំពុងក្លាយជាគោលដៅទាក់ទាញភ្ញៀវទេសចរបរទេស ឱ្យចំណាយប្រាក់រាប់ពាន់ដុល្លារមកទស្សនានៅកម្ពុជា និងផ្តល់ជាប្រយោជន៍សម្រាប់សហគមន៍ និងស្ថាប័នពាក់ព័ន្ធ ។ នេះបើតាមការលើកឡើងពីនាយកកម្មវិធីអង្គការជីវិតសត្វស្លាបអន្តរជាតិប្រចាំកម្ពុជា ។
ថ្លែងក្នុងពិព័រណ៍សត្វស្លាបកម្ពុជា លើកទី១ ដែលរៀបចំឡើងកាលពីថ្ងៃទី១៧ មីនា លោក ប៊ូ វរសក្ស នាយកកម្មវិធីអង្គការរូបនេះបានឲ្យដឹងថា បច្ចុប្បន្នមានសត្វស្លាបយ៉ាងតិច៦០០ប្រភេទត្រូវបានកត់ត្រាថាកំពុងមានវត្តមានកម្ពុជា ហើយសត្វទាំងនោះកំពុងក្លាយជាគោលដៅទាក់ទាញភ្ញៀវទេសចរបរទេស ឱ្យចំណាយលុយរាប់ពាន់ដុល្លារចូលមកទស្សនានៅកម្ពុជា ។
លោកថ្លែងថា ៖« ពិតណាស់ភ្ញៀវទេសចរបរទេសមកទស្សនាស្រុកខ្មែរ គឺពួកគាត់ចង់មើលប្រភេទសត្វត្រយងយក្ស ដែលជានិមិត្តរូបបក្សីជាតិ វាមានប្រហែលតែ២៥០ក្បាលទេនៅលើពិភពលោក ក្នុងនោះរស់នៅក្នុងស្រុកខ្មែរមានប្រហែល៩០%។ អីចឹងបើគេចង់មើលសត្វត្រយង គឺត្រូវតែមកស្រុកខ្មែរ មិនអាចទៅប្រទេសណាបានទេ សូម្បីតែទៅថៃ ក៏រកមិនឃើញដែរ »។
លោកបញ្ជាក់ថា ៖« ប្រភេទសត្វត្រយងយក្សនេះរស់នៅខេត្តស្ទឹងត្រែង, ព្រះវិហារ,រតនៈគិរី ដែនជំរកសត្វព្រៃលំផាត់ និងជប់ព្រំប្រទល់រវាងខេត្តមណ្ឌលគិរី និងរតនៈគិរី ។ សត្វនេះមានលក្ខណៈអៀនប្រៀនខ្លាំង ត្រូវការព្រៃស្ងាត់រស់នៅ ហើយបើប្រជាជនរំខានសកម្មភាពអ្វីមួយ សត្វនោះនឹងបោះបង់សំបុកពងកូនវាចោល ពេលនោះចំនួនសត្វនេះនឹងថយចុះ »។
តាមតំណាងអង្គការសំវាសនា លោក គិត វាសនា បានឱ្យដឹងដែរថា កន្លងមក ភ្ញៀវទេសចរមកពីអឺរ៉ុបដែលចូលមកទស្សនាសត្វស្លាបនៅកម្ពុជាមានចំនួនច្រើន តែមួយរយៈចុងក្រោយនេះបានថមថយវិញបន្ដិច ។
លោកបន្ដថា ៖« ក្នុងឆ្នាំ២០១៨នេះ ដោយសារមានការមានការប្រែប្រួលស្ថានភាពនយោបាយបន្តិច បានធ្វើឱ្យចំនួនភ្ញៀវទេចរថយចុះប្រហែល៤០% ព្រោះអង្គការយើងផ្តោតទៅលើតែភ្ញៀវនៅអឺរ៉ុប ។ បញ្ហាមួយទៀត គឺយើងមានការប្រកួតប្រជែងនៅក្នុងស្រុកច្រើន ខណៈតម្លៃនៃការចូលរួមរបស់សហគមន៍មានការកើនឡើង អីចឹងធ្វើឱ្យការលក់កញ្ចប់ដើរកម្សាន្តទៅឱ្យភ្ញៀវត្រូវឡើងថ្លៃដែរ »។
អនុរដ្ឋលេខាធិការក្រសួងបរិស្ថាន លោក ស៊ូ សូវុធ មានប្រសាសន៍ថា៖« ក្នុងមួយឆ្នាំៗ មានអ្នកទេសចរជាច្រើនពាន់នាក់បានមកទស្សនាសត្វស្លាបកម្ររបស់យើងដែលមានវត្តមាននៅតាមតំបន់នានាក្នុងប្រទេសកម្ពុជា ហើយថវិកាដែលចំណាយដោយអ្នកទេសចរទាំងនោះ មិនត្រឹមតែជួយបង្កើនជីវភាពសហគមន៍មូលដ្ឋានប៉ុណ្ណោះទេ ថែមទាំងបានរួមចំណែកក្នុងការអភិវឌ្ឍសេដ្ឋកិច្ចជាតិផងដែរ »។
លោកបន្តថា កម្ពុជាត្រូវបានកត់ត្រាថាមានសត្វត្រយងចង្កំកដែលជិតផុតពូជរហូតដល់ជាង៨០%នៃចំនួនសត្វសរុបនៅលើពិភពលោក ស្មើនឹងចំនួន១.១០០ក្បាល,សត្វត្រយងយក្ស ជានិមិត្តរូបសត្វស្លាបកម្ពុជាចំនួន៩០%នៃចំនួនសរុបនៅលើពិភពលោក ស្មើនឹងចំនួន២៥០ក្បាល និងប្រភេទសត្វត្មាត ជិតផុតពូជ៣ប្រទេសទៀត ដែលប្រភេទទាំងនោះ គេដឹងថាបានបាត់បង់ និងផុតពូជពីបណ្តាប្រទេសជិតខាង ហើយក្រសួងបរិស្ថានកំពុងសហការជាមួយអង្គការដៃគូដើម្បីអភិរក្សសត្វត្មាត និងធ្វើការផ្តល់អាហារបន្ថែមឱ្យឈ្មោះថា «អាហារត្មាត»។
លោកបន្តថា ទន្ទឹមនឹងភាពសម្បូរបែបនៃជីវចម្រុះ និងធនធានសត្វស្លាប ក៏មានកត្តាគំរាមកំហែងជាច្រើនកំពុងកើតមាន ដូចជា ការបាត់បង់ទីជម្រក, ការបរបាញ់, ការបំពុល, ការខ្វះចំណី, ការរំខាន និងចាប់យកមកធ្វើចំណីជាដើម ។ ទោះជាយ៉ាងណា រាជរដ្ឋាភិបាល បាននិងកំពុងធ្វើការយ៉ាងសកម្មដើម្បីដោះស្រាយកត្តាគំរាមកំហែងទាំងនេះ។ ជាក់ស្តែងក្នុងឆ្នាំ២០១៦ តំបន់ព្រៃខាងលិចសៀមប៉ាង ដែលមានសត្វត្រយងជិតផុតពូជ២ប្រភេទ និងសត្វត្មាត៣ប្រភេទកំពុងរស់នៅ ត្រូវបានរាជរដ្ឋាភិបាលចាត់បញ្ចូលជាតំបន់ដែនជម្រកសត្វព្រៃ និងដាក់វិធានការការពារ ៕
ចែករំលែកព័តមាននេះ