រាជធានីភ្នំពេញ ៖ គម្រោងសាងសង់កំពង់ផែទេសចរណ៍ខេត្តកំពត ដែលតាមផែនការថាគ្រោងនឹងបញ្ចុះបឋមសីលាក្នុងខែមីនានេះ ប៉ុន្ដែរហូតមកទល់ពេលនេះ មិនទាន់ឃើញមានសកម្មភាពអ្វីចាប់ផ្ដើមនៅឡើយ ហើយអាជ្ញាធរដែនដីក៏មិនទាន់ទទួលបានលិខិតស្នាមណាមួយពីម្ចាស់គម្រោងដែរ ។
ថ្លែងតាមទូរស័ព្ទនាព្រឹកថ្ងៃទី៥ មីនា ម្សិលមិញ លោក ជាវ តាយ អភិបាលខេត្តកំពត បានឲ្យដឹងថា កំពង់ផែទេសចរណ៍ថ្មីដែលមានតម្លៃទឹកប្រាក់១០លានដុល្លារអាមេរិកក្រោមជំនួយរបស់ធនាគារអភិវឌ្ឍន៍អាស៊ី ហៅកាត់ថា(ADB)ដែលថា គ្រោងនឹងចាប់ផ្តើមបញ្ចុះបឋមសីលាក្នុងខែមីនានេះ គឺខាងអាជ្ញាធរខេត្តមិនទាន់បានទទួលព័ត៌មានច្បាស់ការណ៍ណាមួយនៅឡើយទេ ព្រោះអាស្រ័យទៅលើក្រសួងទេសចរណ៍ដែលជាម្ចាស់គម្រោង ចំណែកខេត្តគ្រាន់តែជាកន្លែងមូលដ្ឋានប៉ុណ្ណោះ ។
លោកថ្លែងយ៉ាងដូច្នេះថា ៖« ពាក់ព័ន្ធនឹងកំពង់ផែនេះ គឺខាងមន្ទីរទេសចរណ៍បានរាយការណ៍ប្រាប់ខ្ញុំតាំងពីខែមករាមកម្ល៉េះថា នៅក្នុងខែមីនា នឹងចាប់ផ្ដើមបើកការដ្ឋានសាងសង់ ប៉ុន្តែសម្រាប់ខ្ញុំអត់ទាន់បានទទួលលិខិតជាផ្លូវការ ក្នុងការអនុវត្តណាមួយបានជាក់លាក់នោះទេ ទាល់តែក្រសួងទើបដឹងច្បាស់ថា ថ្ងៃណាពិតប្រាកដ ព្រោះក្រសួងទេសចរណ៍ជាសាមីពាក់ព័ន្ធក្នុងការសាងសង់កំពង់ផែមួយនេះ ឯខេត្តគ្រាន់តែជាកន្លែងមូលដ្ឋាន » ។
ពាក់ព័ន្ធនឹងការលើកឡើងនេះ បើតាមមន្ត្រីក្រសួងទេសចរណ៍បានឲ្យដឹងតាមទូរស័ព្ទនៅថ្ងៃដដែលថា ពេលនេះ ក្រសួងនិងម្ចាស់ជំនួយ[ធនាគារអភិវឌ្ឍន៍អាស៊ី] កំពុងពិភាក្សា និងដាក់ដេញថ្លៃដើម្បីស្វែងរកក្រុមហ៊ុនសាងសង់ ។ ទោះបីយ៉ាងនេះក្ដី មន្ត្រីរូបនេះមិនបានបញ្ជាក់ពីពេលវេលាច្បាស់លាស់ថា គ្រោងនឹងដំណើរការសាងសង់នៅពេលណាទេ ។
មន្ត្រីដដែលបញ្ជាក់ថា ៖« នៅពេលរកដៃគូសាងសង់បានហើយ ក្រសួង និងធនាគារADB ត្រូវពិនិត្យ និងសិក្សាទៅលើក្រុមហ៊ុននោះទៀត មុននឹងអនុញ្ញាតឲ្យដំណើរការសាងសង់ » ។
កំពង់ផែទេសចរណ៍នេះ នៅពេលសាងសង់រួច នឹងចូលរួមចំណែកទាក់ទាញភ្ញៀវទេសចរមកពីតាមបណ្តាប្រទេសក្នុងតំបន់ ជាពិសេស ប្រទេសវៀតណាម និងថៃ តាមរយៈតភ្ជាប់ការធ្វើដំណើរតាមកប៉ាល់ល្បឿនលឿន ឬកប៉ាល់ទេសចរណ៍ខ្នាតធំ ហើយក៏បានរួមចំណែកបង្កើនសកម្មភាពសេដ្ឋកិច្ចរបស់ប្រជាពលរដ្ឋកាន់តែខ្លាំងថែមមួយកម្រិតទៀត ។
បើតាមលោកអភិបាលខេត្តកំពត ថ្លែងថា ៖« នៅពេលសាងសង់រួច កំពង់ផែនេះនឹងទាក់ទាញភ្ញៀវទេសចរមកពីក្រៅស្រុក ក្នុងការធ្វើដំណើរតាមកប៉ាល់ធំ គាត់អាចចុះចតនៅកន្លែងយើងបាន ហើយបើពេលណាមានភ្ញៀវទេសចរចូលមកខេត្តយើង អីចឹង ប្រជាពលរដ្ឋនៅក្នុងស្រុក គឺកាន់តែមានឱកាសការងារច្រើន ដែលអាចរកប្រាក់ផ្គត់ផ្គង់គ្រួសារ និងជួយកាត់បន្ថយភាពក្រីក្ររបស់ពួកគាត់បានមួយកម្រិតទៀត ។
ម្យ៉ាងវិញទៀត វាមានភាពងាយស្រួលដល់ភ្ញៀវទេសចរ ដែលមានបំណងចង់បន្តដំណើរពីតំបន់មួយទៅកាន់តំបន់មួយទៀតដូចជា ពីខេត្តកំពត ទៅភ្នំបូកគោ ខេត្តព្រះសីហនុ និងខេត្តសៀមរាប ជាដើម » ។
បើតាមលោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់កោះសន្តិភាពកាលពីពេលថ្មីៗថា កំពង់ផែនេះមានតម្លៃ១០លានដុល្លារអាមេរិក ក្រោមជំនួយរបស់ធនាគារអភិវឌ្ឍន៍អាស៊ី ហៅកាត់ថា (ADB) ស្ថិតនៅក្នុងភូមិជុំគ្រាល ឃុំជុំគ្រាល ស្រុកទឹកឈូ ខេត្តកំពត ដែលតាមគម្រោង នឹងបញ្ចុះបឋមសីលាក្នុងខែមីនា ឆ្នាំ២០១៨នេះ ហើយគ្រោងនឹងបញ្ចប់នៅឆ្នាំ២០១៩ ខាងមុខ ។
ការសម្រេចយកទីតាំងនេះ ដោយសារក្រសួងមើលឃើញថា តំបន់នេះមានភូមិសាស្ត្រនៅចំណុចកណ្តាលនៃតំបន់ទេសចរណ៍ ដោយនៅជិតភ្នំបូកគោ ជិតក្រុងកែប ជិតក្រុងកំពត និងអាចធ្វើដំណើរតាមរថយន្តពីព្រលានយន្តហោះអន្តរជាតិ ខេត្តព្រះសីហនុ ត្រឹមតែរយៈពេល១ម៉ោងប៉ុណ្ណោះ និងក្បែរប្រទេសវៀតណាម និងប្រទេសថៃ ថែមទៀត។
លោកបន្តថា ៖« កំពង់ផែនេះ គឺជាផ្នែកមួយដែលនឹងស្រូបយកភ្ញៀវទេសចរអឺរ៉ុបកាន់តែច្រើន ព្រោះវាផ្ដល់នូវសេវាកម្មទេសចរណ៍ជាកញ្ចប់ ដែលនាំភ្ញៀវទេសចរពីខេត្តកំពត ទៅកាន់កោះ Phu Quoc (កោះត្រល់) ប្រទេសវៀតណាម និងដែនសមុទ្រប្រទេសថៃផងដែរ » ។
« ប៉ុន្តែរហូតមកដល់ពេលនេះ យើងមិនទាន់ច្បាស់ថា នឹងចាប់ផ្ដើមពេលណាទេ គ្រាន់តែថាដំណើរការផ្សេងៗដែលទាក់ទងនឹងនីតិវិធី គឺយើងចប់អស់ហើយ នៅចាំតែដំណើរការសាងសង់ប៉ុណ្ណោះ ហើយខាងយើងក៏មិនទាន់បានទទួលលិខិតស្នាមអ្វីឡើយថា ចាប់ផ្ដើមកសាងនៅពេលណា » ។ នេះបើតាមលោកប្រធានមន្ទីរទេសចរណ៍ខេត្តកំពត។
បើតាមលោក ថោង ខុន រដ្ឋមន្ត្រីក្រសួងទេសចរណ៍ ធ្លាប់បានមានប្រសាសន៍ថា វិសាលភាពនៃកំពង់ផែទេសចរណ៍នេះ នឹងអាចឲ្យភ្ញៀវទេសចរឆ្លងកាត់បានចំនួន១,៥លាននាក់ក្នុង១ឆ្នាំ ៕
ចែករំលែកព័តមាននេះ