រាជធានីភ្នំពេញ ៖ ទោះបីជាការបោះឆ្នោតជ្រើសតាំងព្រឹទ្ធសភានីតិកាលទី៤ និងការបោះឆ្នោតជ្រើសតាំងអ្នកតំណាងរាស្ត្រមិនទាន់ដឹងលទ្ធផលយ៉ាងណាក្តី គណបក្សកាន់អំណាចបានសម្តែងសង្ឃឹមឈ្នះក្នុងការបោះឆ្នោតច្រើន ។ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១៨…
រាជធានីភ្នំពេញ ៖ ទោះបីជាការបោះឆ្នោតជ្រើសតាំងព្រឹទ្ធសភានីតិកាលទី៤ និងការបោះឆ្នោតជ្រើសតាំងអ្នកតំណាងរាស្ត្រមិនទាន់ដឹងលទ្ធផលយ៉ាងណាក្តី គណបក្សកាន់អំណាចបានសម្តែងសង្ឃឹមឈ្នះក្នុងការបោះឆ្នោតច្រើន ។ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១៨ កុម្ភៈ ថាមានសង្ឃឹមច្រើនទាំងបោះឆ្នោតព្រឹទ្ធសភាទាំងបោះឆ្នោតតំណាងរាស្ត្រ ។ យ៉ាងណាក្តីអ្នកនាំពាក្យគណបក្សកាន់អំណាចមិនបានបង្ហាញពីភាគរយនៃការឈ្នះប៉ុន្មានភាគរយនោះទេ ។
ការអះអាងរបស់មន្ត្រីជាន់ខ្ពស់គណបក្សប្រជាជនកម្ពុជានេះ ខណៈដែលអតីតគណបក្សសង្គ្រោះជាតិបានប្រកាសមិនទទួលស្គាល់ការបោះឆ្នោតព្រឹទ្ធសភានីតិកាលទី៤ដែលនឹងប្រព្រឹត្តិទៅនៅថ្ងៃទី២៥ ខែកុម្ភៈ ឆ្នាំ២០១៨ នេះ ។ ចំណែកការបោះឆ្នោតជ្រើសតាំងអ្នកតំណាងរាស្ត្រវិញនឹងប្រព្រឹត្តិទៅថ្ងៃទី២៩ ខែកក្កដា ឆ្នាំ២០១៨ ។
ការលើកឡើងរបស់លោក សុខ ឥសាន ស្របពេលដែលគណៈកម្មាធិការជាតិរៀបចំការបោះឆ្នោតបានឲ្យដឹងថាគណបក្សនយោបាយដែលដែលមានឈ្មោះក្នុងបញ្ជីបោះឆ្នោតព្រឹទ្ធសភាមានគណបក្សចំនួន៤ ប៉ុន្តែមានគណបក្សប្រជាជនកម្ពុជាបានធ្វើសកម្មភាពធ្វើយុទ្ធនាការឃោសនាបោះឆ្នោតនៅតាមបណ្តាខេត្តនានាមានភាពផុសផុលច្រើនជាងគណបក្សផ្សេងៗទៀត ។
លោក ទេព នីថា អគ្គលេខាធិការ គ.ជ.ប ធ្លាប់បានលើកឡើងក្នុងកិច្ចប្រជុំផ្សព្វផ្សាយស្តីពីការផ្តល់សុពលភាព និងប្រកាសផ្សាយបញ្ជីបោះឆ្នោតផ្លូវការឆ្នាំ២០១៧ កាលពីពេលកន្លងមកថា គណៈកម្មាធិការជាតិ រៀបចំការបោះឆ្នោត (គ.ជ.ប) នឹងបើកការចុះបញ្ជីឈ្មោះបេក្ខជនឈរជាតំណាងរាស្ត្រនីតិកាលទី៦រយៈពេល១៥ថ្ងៃ ចាប់ពីថ្ងៃទី៣០ ខែមេសា ខាងមុខតទៅនៅទីស្នាក់ការ គ.ជ.ប ផ្ទាល់ ។ លោកអគ្គលេខាធិការបានបញ្ជាក់យ៉ាងដូច្នេះថា «តាមប្រតិទិនរបស់ គ.ជ.ប ការចុះបញ្ជីឈ្មោះបេក្ខជននៃការបោះឆ្នោតតំណាងរាស្ត្រនីតិកាលទី៦ នឹងធ្វើនៅថ្ងៃទី៣០ ខែមេសា ឆ្នាំ២០១៨ ដែលការចុះឈ្មោះធ្វើនៅ គ.ជ.ប ដោយមានរយៈពេល១៥ថ្ងៃ» ។
សូមជម្រាបថាការបោះឆ្នោតជ្រើសរើងតាំងសមាជិកព្រឹទ្ធសភានីតិកាលទី៤មានគណបក្សនយោបាយចំនួន៤ និងមានលេខរៀងនៅក្នុងសន្លឹកឆ្នោតដូចជា ទី១-គណបក្សប្រជាជនកម្ពុជា, ទី២-គណបក្សយុវជនកម្ពុជា, ទី៣-គណបក្សខ្មែររួមរូបជាតិ និងទី៤-គណបក្សហ្វ៊ុន ស៊ិនប៉ិច ។ ការឃោសនាបោះឆ្នោតព្រឹទ្ធសភារបស់គណបក្សនយោបាយមានចំនួន១៤ថ្ងៃ ហើយ ការឃោសនាបោះឆ្នោតនឹងបញ្ចប់ត្រឹមថ្ងៃទី២៣ កុម្ភៈ ហើយថ្ងៃទី២៤ កុម្ភៈ ជាថ្ងៃស មានន័យថាគ្មានគណបក្សនយោបាយណាមានសិទ្ធិធ្វើឃោសនាទេ ហើយគណបក្សនយោបាយនីមួយៗមានសិទ្ធិហែក្បូឃោសនាជាទ្រង់ទ្រាយធំចំនួនពីរនៅក្នុងក្របខណ្ឌ មណ្ឌលភូមិភាគនីមួយៗ ៕
ចែករំលែកព័តមាននេះ