រាជធានីភ្នំពេញ ៖ តំណាងមូលនិធិរូបិយវត្ថុអន្តរជាតិ (IMF) បានថ្លែងថា កម្ពុជាទទួលបានជោគជ័យជាបន្តបន្ទាប់ក្នុងការអនុវត្តកំណែទម្រង់ហិរញ្ញវត្ថុសាធារណៈ និងការរៀបចំកិច្ចបញ្ជិការបានរហ័ស និងមានតម្លាភាពតាមស្ដង់ដាគណនេយ្យ ។ តំណាងមូលនិធិរូបិយវត្ថុអន្តរជាតិប្រចាំនៅកម្ពុជា…
រាជធានីភ្នំពេញ ៖ តំណាងមូលនិធិរូបិយវត្ថុអន្តរជាតិ (IMF) បានថ្លែងថា កម្ពុជាទទួលបានជោគជ័យជាបន្តបន្ទាប់ក្នុងការអនុវត្តកំណែទម្រង់ហិរញ្ញវត្ថុសាធារណៈ និងការរៀបចំកិច្ចបញ្ជិការបានរហ័ស និងមានតម្លាភាពតាមស្ដង់ដាគណនេយ្យ ។
តំណាងមូលនិធិរូបិយវត្ថុអន្តរជាតិប្រចាំនៅកម្ពុជា លោកស្រី យ៉ុង សារ៉ាជូ បានលើកឡើងនៅក្នុងវគ្គបណ្តុះបណ្តាល ស្តីពីការរៀបចំរបាយការណ៍ហិរញ្ញវត្ថុតាមស្តង់ដាគណនេយ្យសាធារណៈអន្តរជាតិ ជូនដល់មន្ត្រីជំនាញនៅក្នុងអគ្គនាយកដ្ឋានពាក់ព័ន្ធ នៅថ្ងៃទី៦ កុម្ភៈ ថា ការគ្រប់គ្រងហិរញ្ញវត្ថុសាធារណៈពិតជាមានសារសំខាន់ណាស់សម្រាប់ការកត់ត្រា, គ្រប់គ្រង, បែងចែក, អនុវត្តថវិកា និងកៀរគរប្រមូលចំណូល ព្រមទាំងជួយជំរុញល្បឿននៃការអនុវត្តកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈឱ្យឈានទៅសម្រេចបានតាមចក្ខុវិស័យពិតប្រាកដ ។
លោកស្រីបន្តថា ៖« យើងសូមចូលរួមអបអរសាទរចំពោះរាជរដ្ឋាភិបាលកម្ពុជា ដែលទទួលបានជោគជ័យជាបន្តបន្ទាប់ក្នុងការអនុវត្តកំណែទម្រង់ហិរញ្ញវត្ថុសាធារណៈ » ។ លោកស្រីបន្តថា ៖« កិច្ចសហការរវាងមូលនិធិរូបិយវត្ថុអន្តរជាតិ និងរាជរដ្ឋាភិបាល ក្នុងការផ្តល់ជាជំនួយបច្ចេកទេសនាពេលកន្លងមក គឺដើម្បីគាំទ្រកំណែទម្រង់ហិរញ្ញវត្ថុសាធារណៈនេះ » ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក ហ៊ាន សាហ៊ីប បានលើកឡើងថា ការគ្រប់គ្រងហិរញ្ញវត្ថុសាធារណៈ គឺបានផ្តល់អត្ថប្រយោជន៍យ៉ាងធំនៅក្នុងការគ្រប់គ្រងហិរញ្ញវត្ថុ និងថវិការួមមួយ, ការត្រួតពិនិត្យឥណទានថវិកាធ្វើឡើងដោយស្វ័យប្រវត្តិ, ធានាចំណាយ ទូទាត់ចំណាយ និងនិយ័តភាពថវិកា, តាមដាននិងរៀបចំកិច្ចបញ្ជិការបានរហ័ស និងមានតម្លាភាពតាមស្ដង់ដាគណនេយ្យ ។ នាពេលថ្មីៗនេះ ក្រសួងបានប្រកាសដាក់ឱ្យប្រើប្រាស់ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ FMIS ជាផ្លូវការនៅតាមក្រសួងចំនួន១០ និងប្រកាសបន្តអនុវត្តគម្រោង FMIS ទៅកាន់ក្រសួង-ស្ថាប័ន និងមន្ទីរសេដ្ឋកិច្ច និងហិរញ្ញវត្ថុ សម្រាប់ឆ្នាំ២០១៨ ផងដែរ ។
លោកបន្តថា ចំណែកវគ្គបណ្តុះបណ្តាលស្តីពីការរៀបចំរបាយការណ៍ហិរញ្ញវត្ថុតាមស្តង់ដាគណនេយ្យសាធារណៈអន្តរជាតិ គឺមានសារសំខាន់សម្រាប់មន្ត្រីទទួលបន្ទុកកិច្ចការគណនេយ្យសាធារណៈ ដើម្បីពង្រឹងសមត្ថភាព និងលើកកម្ពស់ការយល់ដឹងបន្ថែមទៀតសម្រាប់គ្រប់គ្រង និងព្យាករណ៍សាច់ប្រាក់ដើម្បីបំពេញតម្រូវការនៃការបើកផ្តល់សាច់ប្រាក់សម្រាប់ទូទាត់ការចំណាយជំរុញគាំទ្រដល់ប្រក្រតីភាព និងប្រសិទ្ធភាពនៃការអនុវត្តផែនការសកម្មភាពប្រចាំឆ្នាំដល់អង្គភាព ក៏ដូចជាក្រសួងស្ថាប័នពាក់ព័ន្ធផងដែរ ៕
ចែករំលែកព័តមាននេះ